អគ្គលេខាធិការអ.ស.ប លោកបានគីមូន ប្រកាសកាលពីថ្ងៃទី២សីហានៅទីស្នាក់ការអ.ស.ប នាទីក្រុងញូវយ៉កពីការសុំលាលែងរបស់បេសកជនពិសេសរួមអ.ស.ប និងសម្ព័ន្ធអារ៉ាប់សម្រាប់ស៊ីរីលោកកូហ្វីអាណាន់ ។
សេចក្តីប្រកាសមួយចេញផ្សាយដោយអ្នកនាំពាក្យរបស់លោកអគ្គលេខាធិការអ.ស.ប គូសបញ្ជាក់ថា លោកអាណាន់ បានជម្រាបប្រាប់លោកព្រមទាំងអគ្គលេខាធិការសម្ព័ន្ធអារ៉ាប់លោកប៊ីលអែលអារ៉ាប៊ី ពីបំណងរបស់លោកលែងបន្តអាណត្តិរបស់លោកដែលផុតត្រឹមថ្ងៃទី៣១ សីហាទៀត ។
លោកបានគីមូនគូសបញ្ជាក់ថា លោកសម្តែងការដឹងគុណយ៉ាងជ្រាលជ្រៅដល់លោកអាណាន់ចំពោះការខិតខំប្រឹងប្រែងប្រកបដោយការប្តេជ្ញាចិត្តនិងក្លាហានរបស់លោក ។
លោកកូហ្វីអាណាន់ អតីតអគ្គលេខាធិការអ.ស.ប ត្រូវបានតែងតាំងឱ្យកាន់តួនាទីនោះកាលពីថ្ងៃទី២៣ កុម្ភៈ ក្រោយការអនុម័តនាថ្ងៃទី១៦ កុម្ភៈ ដោយមហាសន្និបាតអ.ស.ប នូវដំណោះស្រាយមួយដែលស្នើដល់ស្ថាប័នដឹកនាំរបស់អ.ស.ប និងសម្ព័ន្ធអារ៉ាប់ឱ្យតែងតាំងបេសកជនពិសេសមួយរូបដើម្បីស្វែងរកដំណោះស្រាយមួយនៃវិបត្តិនៅស៊ីរី ៕
ចែករំលែកព័តមាននេះ