រាជធានីភ្នំពេញ ៖ សិក្ខាសាលាថ្នាក់ជាតិមួយ ដើម្បីផ្សព្វផ្សាយសេចក្តីព្រាងច្បាប់ស្តីពីចរាចរណ៍ផ្លូវគោកថ្មី ត្រូវបានរៀបចំឡើង កាលពីព្រឹកថ្ងៃទី២ សីហា នៅសណ្ឋាគារសាន់វេ ក្រោមអធិបតីភាពលោកត្រាំ អីុវតឹក រដ្ឋមន្រ្តីក្រសួងសាធារណការនិងដឹកជញ្ជូន និងជាប្រធានគណៈកម្មការជាតិសុវត្ថិភាពចរាចរណ៍ផ្លូវគោក។ អ្វីដែលជាការចាប់អារម្មណ៍នៅក្នុងច្បាប់ស្តីពីចរាចរណ៍ផ្លូវគោកថ្មីនោះគឺតម្រូវឱ្យអ្នកបើកបរទោចក្រយានយន្ត និងអ្នករួមដំណើរក្នុងនោះរួមមានទាំងកុមារផង ត្រូវពាក់មួកសុវត្ថិភាពរាល់ពេលធ្វើដំណើរ ។
នាឱកាសនោះ លោករដ្ឋមន្ត្រី ត្រាំ អីុវតឹក បានលើកឡើងថា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន កម្ពុជាមានការអភិវឌ្ឍយ៉ាងលឿនលើគ្រប់វិស័យ ពិសេសវិស័យហេដ្ឋារចនាសម្ព័ន្ធដឹកជញ្ជូន គឺស្ពាន ផ្លូវគោក ផ្លូវដែក ផ្លូវទឹក ផ្លូវអាកាស និងកំពង់ផែ ។ តាមរយៈក្រសួងសាធារណការនិងដឹកជញ្ជូនផ្លូវថ្នល់ និងស្ពានត្រូវបានស្តារ និងអភិវឌ្ឍន៍លើកកម្រិតចាក់កៅស៊ូតភ្ជាប់នៅគ្រប់រាជធានី-ខេត្ត ជនបទជិតឆ្ងាយទូទាំងប្រទេស និងភ្ជាប់ជាមួយប្រទេសជិតខាងក្នុងតំបន់ ដែលបង្កលក្ខណៈងាយស្រួលជូនប្រជាជនក្នុងការធ្វើចរាចរណ៍ និងដឹកជញ្ជូន ជំរុញឱ្យសេដ្ឋកិច្ចជាតិនិងគ្រួសារមានការលើកកម្ពស់គួរឱ្យមោទនភាព ។ ទន្ទឹមនោះ យានយន្តគ្រប់ប្រភេទក៏បានកើនឡើងជារៀងរាល់ឆ្នាំ ប៉ុន្តែជាការគួរឱ្យសោកស្តាយគ្រោះថ្នាក់ចរាចរណ៍មានការកើនឡើងបង្កជាសោកនាដកម្មគួរឱ្យព្រួយបារម្ភ។
លោករដ្ឋមន្រ្តីបានរំលឹកថា ក្នុងអំឡុងឆ្នាំ២០១១ កន្លងទៅនេះ គ្រោះថ្នាក់ចរាចរណ៍បណ្តាលឱ្យមានជនរងគ្រោះស្លាប់ចំនួន១.៩០៥នាក់ គិតជាមធ្យមគឺចំនួនស្លាប់ជាង៥នាក់ក្នុងមួយថ្ងៃ ។ មូលហេតុចម្បងដែលបង្កឱ្យមានគ្រោះថ្នាក់ចរាចរណ៍ គឺបណ្តាលមកពីកត្តាមនុស្សដែលមានរហូតដល់៩៥% ។ ចំណែកជនរងគ្រោះស្លាប់ដោយសារគ្រោះថ្នាក់ចរាចរណ៍ភាគច្រើន គឺប្រើប្រាស់ម៉ូតូមានចំនួនរហូតដល់៦៧%នៃជនរងគ្រោះសរុប ។ ក្នុងចំណោមនោះ អ្នករងគ្រោះដល់ស្លាប់ប្រមាណ៦៩% ដោយប៉ះទង្គិចក្បាលមិនពាក់មួកសុវត្ថិភាព ។លោករដ្ឋមន្រ្តីបញ្ជាក់ថា ប្រឈមនឹងស្ថានភាពគ្រោះថ្នាក់និងដើម្បីចូលរួមអនុវត្តសេចក្តីសម្រេចរបស់អង្គការសហប្រជាជាតិ ស្តីពីទសវត្សរ៍សុវត្ថិភាពចរាចរណ៍ផ្លូវគោក ក្រសួងសាធារណការ និងដឹកជញ្ជូន និងស្ថាប័នពាក់ព័ន្ធបានសហការគ្នារៀបចំសេចក្តីព្រាងច្បាប់ស្តីពីចរាចរណ៍ផ្លូវគោកថ្មីនេះឡើង ។
តាមសេចក្តីព្រាងច្បាប់ស្តីពីចរាចរណ៍ផ្លូវគោកថ្មី គឺមាន១២ជំពូក និង១០០មាត្រា ។ ខ្លឹមសារសំខាន់ៗនៃច្បាប់ថ្មីនេះ គឺតម្រូវឱ្យអ្នកបើកបរយានយន្តដែលមានទំហំស៊ីឡាំងចាប់ពី៤៩ សង់ទីម៉ែត្រគូបឡើងទៅត្រូវមានប័ណ្ណបើកបរតាមប្រភេទយានយន្ត ។ ទោចក្រយានយន្តអាចផ្ទុកមនុស្ស២នាក់ ព្រមទាំងកុមារមួយនាក់ហើយទាំងអស់គ្នាត្រូវពាក់មួកសុវត្ថិភាព ។ ហាមផ្ទុកមនុស្ស ឬទំនិញពីមុខអ្នកបើកបរ និងហាមក្មេងអាយុតិចជាង១០ឆ្នាំអង្គុយនៅលើកៅអីខាងមុខនៃរថយន្តដោយគ្មានមនុស្សចាស់អង្គុយជាមួយ និងគ្មានពាក់ខ្សែក្រវាត់សុវត្ថិភាព ។ ច្បាប់ថ្មីក៏បានចែងអំពីការផ្តន្ទាទោសនិងផាកពិន័យចំពោះអ្នកប្រើប្រាស់យានយន្តល្មើសនឹងច្បាប់ និងមន្រ្តីនគរបាលដែលបានប្រព្រឹត្តខុសច្បាប់ចរាចរណ៍ដែរ ។ ប៉ុន្តែនៅជំពូកទី១១ នៃអន្តរប្បញ្ញត្តិ ច្បាប់ថ្មីបានចែងថា យានយន្តជាកម្មសិទ្ធិរបស់ឯកជនដែលបានពាក់ស្លាកលេខរដ្ឋ នគរបាល និងខេមរភូមិន្ទ ត្រូវធ្វើបែបបទសុំប្តូរមកស្លាកលេខឯកជនឱ្យបានចប់សព្វគ្រប់ក្នុងរយៈពេល១ឆ្នាំ គឺគិតចាប់ពីថ្ងៃដែលច្បាប់នេះចូលជាធរមាន៕
ចែករំលែកព័តមាននេះ