ខេត្តកំពង់ស្ពឺ៖ មន្ត្រីជំនួយការឃុំត្រពាំងជោរម្នាក់ត្រូវស្លាប់ក្នុងជម្លោះជាមួយជំទប់ឃុំទី២ ដោយសារតែទាស់ពាក្យសម្តីគ្នាឈានទៅដល់ការផ្ទុះហិង្សានៅពេលសម្រាកប្រជុំក្នុងបរិវេណសាលាស្រុកឱរ៉ាល់ ស្តីពីការចុះអត្រានុកូលដ្ឋាន ។
នាយកងរាជអាវុធហត្ថស្រុកឱរ៉ាល់ លោកអនុសេនីយ៍ឯក សោម ពុទ្ធតារា បានឱ្យដឹងនូវ ហេតុការណ៍នោះថា នៅសាលាស្រុកឱរ៉ាល់កាលពីព្រឹកថ្ងៃទី២ សីហា មានការកោះប្រជុំមួយក្រោមអធិបតីភាពលោកអភិបាលស្រុក ដោយមានមេឃុំ ជំទប់ ស្មៀនឃុំ គ្រប់ឃុំចូលរូមប្រជុំពីការងារអនុវត្តន៍អត្រានុកូលដ្ឋានប្រជាពលរដ្ឋ។ លោកសោម ពុទ្ធតារា និយាយថា នៅពេលសម្រាកពីអង្គប្រជុំនោះឈ្មោះសូត្រ ចន្ថា ភេទប្រុស អាយុ៤៣ឆ្នាំ ជាជំទប់ទី២មកពីបក្សសិទ្ធិមនុស្សបានទាស់សម្តីគ្នាជាមួយឈ្មោះលី ម៉ៅ ជំនួយការឃុំត្រពាំងជោរ ក៏មានការវាយតប់ធ្វើឱ្យជំនួយការឈ្មោះលី ម៉ៅ ដួល ក្រោយពីអុកមួយជង្គង់ចំប្លោកនោម បណ្តាលឱ្យប្រកាច់ស្លាប់ដោយពុំអាចយកទៅសង្គ្រោះទាន់ ។ ពេលកើតហេតុនោះបានធ្វើឱ្យមន្ត្រីនានាមានការភ្ញាក់ផ្អើល ។ លោកសោម ពុទ្ធតារា មានប្រសាសន៍ថា ទាំងមន្ត្រី ប៉ូលិសនិងប៉េអឹមបានឃាត់ខ្លួនភ្លាមៗឈ្មោះសូត្រ ចន្ថា ជំទប់ទី២ ឃុំត្រពាំងជោរ នាំទៅអធិការដ្ឋានប៉ូលិសភ្លាមៗដែរ ។ នេះជាហតុការណ៍មួយដែលបានកើតឡើងដោយស្មានមិនដល់ ៕
ចែករំលែកព័តមាននេះ