រាជធានីភ្នំពេញ ៖ ជនសង្ស័យចំនួន៣នាក់ដែលមានជំនាញលួចដែកជាគ្រឿងសំណង់អស់លក្ខណ៍ត្រូវប៉ូលិសចាប់ឃាត់ខ្លួនបាននៅពេលកំពុងធ្វើសកម្មភាពលួចយកដែកចេញពីឃ្លាំងក្រុមហ៊ុនមួយដែលមានទីតាំងនៅតាមបណ្តោយផ្លូវភ្នំពេញ-ហាណូយ ស្ថិតក្នុងសង្កាត់ឃ្មួញ ខណ្ឌសែនសុខ រួចជួលម៉ូតូកង់បីដឹកកាលពីព្រឹកម៉ោង៨និង៣០នាទីថ្ងៃទី២ សីហា ២០១២។
ជនសង្ស័យ៣នាក់នេះមាន ១-ឈ្មោះសាត រដ្ឋា ភេទប្រុស អាយុ២៥ឆ្នាំ ២-ឈ្មោះពេញ វាសនា ហៅប៉ោយប៉ែត ភេទប្រុស អាយុ២០ឆ្នាំ និង៣-ឈ្មោះណាង ណេត ភេទប្រុស អាយុ១៩ឆ្នាំ អ្នកទាំង៣ ស្នាក់នៅផ្ទះជួល ក្នុងភូមិបន្លាស្អឹត សង្កាត់ឃ្មួញ ខណ្ឌសែនសុខ ។
លោកឌិន សារ៉ាតុម មេប៉ូលិសប៉ុស្តិ៍រដ្ឋបាលឃ្មួញបានឲ្យដឹងថានៅវេលាម៉ោង៨និង៣០នាទីព្រឹកថ្ងៃទី២ សីហា ២០១២ ប៉ូលិសរដ្ឋបាលសង្កាត់ឃ្មួញបានល្បាត ក៏ប្រទះឃើញជនសង្ស័យម្នាក់ឈ្មោះពេញ វាសនា ហៅប៉ោយប៉ែត កំពុងតែហៅម៉ូតូកង់បីដឹកដែកចេញពីក្រុមហ៊ុនមួយក្នុងសភាពស្ងប់ស្ងាត់ក៏សង្ស័យ និងបានហៅសាកសួរតែត្រូវជននេះរត់កាត់ភ្លឺស្រែ ពេលនោះប៉ូលិសក៏បានដេញតាមចាប់ឃាត់ខ្លួនបានភ្លាមៗ។
លោកបន្តថា ក្រោយពីសាកសួរទើបដឹងថា ជននេះបានលួចដែកចេញពីក្រុមហ៊ុនដោយគាស់ឃ្លាំងជាមួយបក្សពួក២នាក់ទៀត ហើយក្រោយពីប៉ូលិសសាកសួរ ក៏បានឈានទៅឃាត់ខ្លួនបានជនសង្ស័យ២នាក់ថែមទៀត៕
ចែករំលែកព័តមាននេះ