រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ឆ្លើយតបជុំវិញការលើកឡើងរបស់គណបក្សប្រឆាំងពីជោគជ័យក្នុងការបោះឆ្នោតអាណត្តិក្រោយថា«សូមអ្នកដទៃកុំបារម្ភពេកដេញ ហ៊ុន សែន ឆ្នាំ២០១៣ មិនចាំបាច់ដេញទេ ទៅហើយឱ្យតែឯងឈ្នះ»។
សម្តេចតេជោនាយករដ្ឋមន្ត្រីមានប្រសាសន៍បែបនេះនាព្រឹកថ្ងៃទី១ សីហា ឆ្នាំ២០១២ ក្នុងឱកាសដែលសម្តេចអញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់សញ្ញាប័ត្រដល់និស្សិតជ័យលាភីថ្នាក់បរិញ្ញាប័ត្រ និងថ្នាក់បរិញ្ញាប័ត្រជាន់ខ្ពស់ចំនួន២.៦១៩នាក់នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅវិទ្យាស្ថានជាតិអប់រំ ។
សម្តេចតេជោនាយករដ្ឋមន្ត្រីមានប្រសាសន៍ថា ពួកគេនិយាយថា គណបក្សប្រជាជនភ័យស្លន់ស្លោ …. ។ ពាក់ព័ន្ធបញ្ហានេះសូមផ្តាំទៅវិញ អាព្យុះក្នុងក្អមប្រយ័ត្នបែកក្អមខ្លួនឯង ព្យុះនយោបាយរបស់លោកឯងគ្រាន់តែព្យុះក្នុងក្អម ក្នុងដបទេ គ្មានផលប៉ះពាល់អ្វីបន្តិចសោះ ។ តើឥឡូវសង្គ្រោះអ្នកណា ? និយាយឱ្យពិតទៅ សង្គ្រោះអ្នកណា ? ចលនាប្រជាធិបតេយ្យសង្គ្រោះជាតិ សង្គ្រោះគេកំពុងតែទទួលសញ្ញាប័ត្រហ្នឹង រត់ចូលព្រៃឬអី ? សង្គ្រោះព្រះសង្ឃដែលកំពុងបិណ្ឌបាត កំពុងកាន់ព្រះវស្សា ដើម្បីឱ្យរត់ចោលស្បង់ឬអី ? សូម្បីតែឈ្មោះរណសិរ្សសាមគ្គីសង្គ្រោះជាតិកម្ពុជា គេឈប់ប្រើតាំងពីរំដោះហើយបានតែប៉ុន្មានឆ្នាំ គេដកឈ្មោះហ្នឹងចេញគេដាក់ឈ្មោះរណសិរ្សសាមគ្គីកសាងអភិវឌ្ឍន៍មាតុភូមិទៅហើយ ។ ឯងសង្គ្រោះអីម៉ោងនេះ ។ រួចហើយនិយាយថា គណបក្សប្រជាជនខ្លាចហើយបាននិយាយដូច្នោះ ។ សម្តេចតេជោនាយករដ្ឋមន្ត្រីបានឆ្លើយតបការលើកឡើងរបស់គណបក្សប្រឆាំងថា ចាំតើអាពៅនិយាយតែមួយម៉ាត់ ឯងចាំទៅ ធ្វើមើលតែគេហ្នឹងស្អីទៅ ….។ ឯងសង្គ្រោះតែខ្លួនឯងហ្នឹងទៅ ឯណាម្តាយនីតាផង ឯណាស្រីល័ក្ខផង ទៅសង្គ្រោះទៅ ឯណាប្រពន្ធដើមផង ណាមួយម្តាយនីតាយកមកទុកនៅស្វាយរៀងផង ស្រីល័ក្ខទៀត ហើយស្រីល័ក្ខត្រូវការលុយតុងទីន រកលុយទៅ បើថាសង្គ្រោះខ្លួនឯងថាសង្គ្រោះខ្លួនឯងទៅ ឥឡូវទូទាត់លុយឱ្យគេឱ្យហើយទៅប្រយ័ត្នគេប្តឹង ។ ជំពាក់ថ្លៃឡានសងអត់ទាន់រួចទេ ណាមួយជំពាក់ថ្លៃមេក្រូក៏អត់ទាន់សងរួចដែរ ពេលយុទ្ធនាការបោះឆ្នោតកន្លងទៅកុំអាលក្អេងក្អាងពេក ធ្វើដូចជាគេមិនដឹងអីអីុចឹង …។
សម្តេចមានប្រសាសន៍ថា ខ្ញុំអត់ថា ឱ្យអ្នកណាទេ ប៉ុន្តែអ្នកណាធ្វើអ្នកនោះដឹងខ្លួន កាលពីថ្ងៃទី១៧ មិថុនា នៅសណ្ឋាគារមេកុងកំពង់ចាមឯណោះកុំធ្ងល់ពេក ។ ហើយបើមិនចង់ឱ្យគេដឹងដេញអ្នកបើកបរឡាន ដេញអ្នកការពារចោលឱ្យអស់ទៅទៅណារួច ហើយម៉ាក់ធីតា ចេះតែនៅចាំទៅ កូនទី២ចេះតែនៅចាំទៅនៅឯស្វាយរៀង យូរៗឡើងមកម្តងទៅ រួចហើយប្រាប់ប្រពន្ធថា ចុះពង្រឹងបក្ស ។ ចុះពង្រឹងបក្សខ្ញុំស្គាល់កន្លែងច្បាស់ពេកហើយ នៅសណ្ឋាគារមេកុងបន្ទប់១០៤ល្ងាចថ្ងៃទី១៧ មិថុនា ទើបតែបោះឆ្នោតហើយបានប៉ុន្មានថ្ងៃ(ដោះកូយ) ។ បើអីុចឹងៗតើលុយវាទៅណា ? បានជាមានបញ្ហានៅក្នុងនោះ រួចតើអ្នកណាសង្គ្រោះអ្នកណា ? សង្គ្រោះខ្លួនឯងវាមិនរួចផង រួចហើយបែរមករកសង្គ្រោះជាតិ ។ ចាំមើលមានអ្នកនាំពាក្យរបស់គេចេញមកនិយាយទៀតថា ដោយសារតែគាត់ខ្លាចហើយ ។
សម្តេចតេជោសង្កត់ធ្ងន់ថា ចាំទៅអាពៅ សូមផ្តាំទុកឱ្យហើយទៅមានស្អីអាចាញ់+ចាញ់ ស្មើនឹងចាញ់នៅក្នុងក្អម ព្យុះនៅក្នុងហ្នឹងទៅ ។ ចាំមើលប៉ុន្មានថ្ងៃខាងមុខចាប់ធ្វើយុទ្ធនាការទៀតហើយ គេថា ប្រធានសមាគមប្រជាធិបតេយ្យមុខតែឈានទៅបិទវិទ្យុសំបុកឃ្មុំ ។ សូមប្រាប់ត្រឡប់ទៅវិញថា វិទ្យុវាអត់មានកំហុសអីទេ គេមិនខឹងគោទៅវ៉ៃរទេះទេ គេធ្វើយុទ្ធនាការខ្យល់មួយឈានឆ្ពោះទៅរកការបិទសិទ្ធិបញ្ចេញមតិ ។ កន្លងទៅ ចំពោះមតិរបស់អ្នកឯងមានស្អីមានទៅ ហើយវិទ្យុនោះវាអត់មានទោសទេម៉េចក៏មកឃោសនាដូច្នេះទៅវិញ ប៉ុន្តែចំពោះទោសរបស់អ្នកឯងចាំរួចទៅ ៧នាក់ដែលមកទទួលបទបញ្ជាចេញ៦ហើយ រាប់ទាំងម្នាក់មួយទៅដល់ថៃ ។
មុនពេលដែលចេញទៅដល់ថៃ ដូចដែលខ្ញុំប៉ាន់ស្មានអីុចឹង មកដេកនៅផ្ទះមន្ត្រីអង្គការក្រៅរដ្ឋាភិបាលមួយអស់ពីរយប់ រួចបានលុយ៣០ម៉ឺនរៀល ចេញទៅតាមឡាវចូលទៅប្រទេសថៃ ក្នុងនោះ៧នាក់ដែលទទួលបទបញ្ជា៥នាក់មានដីកាចាប់ខ្លួននៅតែ ប៊ុន រដ្ឋា មួយទេ។ វិទ្យុវាខុសអីវា ម្ចាស់ធ្វើខុសគេលេងតែម្ចាស់ ។
យី ! ចេះថាធ្វើយុទ្ធនាការខ្យល់ ដល់គេថាឱ្យវិញថាគេគំរាមកំហែង ។ ខ្ញុំយកការសន្និដ្ឋានមួយចេះតែនិយាយទោះបីនៅកន្លែងនេះ កន្លែងនោះ មានទាំងNGOទៀត ដូច្នេះសូមចេញមក សូម្បីទូរស័ព្ទទៅគឺមានការកត់ត្រាទុកដើម្បីទារលុយ ម៉ោងប៉ុន្មាន នៅបង្គោលអង់តែនត្រង់ណា ។ បើMobitelវិញគេកត់ត្រាតាំងពីបង្គោលអង់តែនលេខប៉ុន្មានទៀត ។ ដូច្នេះការស្រាវជ្រាវអីុចឹងមិនមានការលំបាកសម្រាប់មន្ត្រីសន្តិសុខទេ ។ សូមជូនសារឱ្យហើយ សូមរកមេធាវីឱ្យខ្លាំងយកមកតទល់ ។ រឿងផ្តិតមេដៃអត់បានការអីទេ បើដូច្នេះគេមិនបាច់ចាំមានតុលាការទេ ព្រោះវាគ្មានទម្ងន់ទៅលើការកាត់ក្តីរបស់តុលាការទេ ។ ខ្ញុំក៏មិនមែនតួអង្គតុលាការទេ ក៏ប៉ុន្តែក្នុងតួអង្គរដ្ឋស្ថាប័នជំនាញ មានសិទ្ធិនឹងធ្វើកិច្ចការដែលទាក់ទងទៅនឹងសន្តិសុខជាតិ ។
សម្តេចតេជោនាយករដ្ឋមន្ត្រីបានរិះគន់បក្សប្រឆាំងទៀតថា វាហាក់ដូចជាជ្រុលពេក រំលំរបបផ្តាច់ការ ក្បត់ជាតិ កញ្ជះគេ ដើម្បីសង្គ្រោះជាតិ ។ អុញ! សង្គ្រោះតែខ្លួនឯង ប្រពន្ធចុង ប្រពន្ធដើម ឱ្យតែរួចទៅ កុំអាលមកសង្គ្រោះអ្នកដទៃ ប៉ុន្តែបើមានលទ្ធភាពឈ្នះឆ្នោតមិនចាំបាច់ព្រួយទេ យកទៅវិមានសន្តិភាពសម្រាប់អស់លោកអង្គុយហើយ ៕
ចែករំលែកព័តមាននេះ