ខេត្តកំពង់ស្ពឺ ៖ ជាងផ្សារដែកម្នាក់បានត្រូវចរន្តអគ្គិសនីឆក់នៅជាប់ច្រងាងនឹងជណ្ដើរដូចទោចយោលទោង ខណៈពេលកំពុងផ្សារដំបូលសំយាបស័ង្កសីមុខផ្ទះនៅភូមិដុតកំបោរ ឃុំព្រះនិព្វាន ស្រុកគងពិសី កាលពីវេលាម៉ោងប្រមាណ៤ និង៣០នាទីរសៀលថ្ងៃទី១០ មីនា កន្លងមកនេះ ។
យុវជនជាជាងផ្សារដែកម្នាក់នេះឈ្មោះម៉ី សម្ផស្ស អាយុ២៥ឆ្នាំ មានស្រុកកំណើតនៅភូមិត្រាស់សាលា ឃុំត្រពាំងគ ស្រុកសំរោងទង បច្ចុប្បន្នស្នាក់នៅកន្លែងសិប្បកម្មផ្សារទ្វារបង្អួចក្នុងភូមិដើមប្ញស ឃុំដើមប្ញស ស្រុកកណ្ដាលស្ទឹង ខេត្ដកណ្ដាល ។ យុវជនរូបនេះបានឱ្យដឹងថា ខ្លួនមកស្នាក់នៅស៊ីឈ្នួលផ្សារដែកឱ្យថៅកែដោយគិតតម្លៃតាមការ៉េ ។ នៅថ្ងៃកើតហេតុ ខ្លួនបានទៅផ្សារដំបូលសំយាបផ្ទះឱ្យគេជាមួយមិត្ដភក្ដិម្នាក់នៅឯភូមិដុតកំបោរ ឃុំព្រះនិព្វាន ស្រុកគងពិសី លុះផ្សាររួចហើយក៏ចុះពីជណ្ដើរដោយមានកាន់ដែកនៅនឹងដៃផង ប៉ុន្ដែមិនដឹងប៉ះនឹងអ្វីទេ ស្រាប់តែបណ្ដាលឱ្យឆក់ភ្លៅខាងឆ្វេងនិងដៃខាងឆ្វេងឆេះខ្លោច រួចឆក់ជាប់នឹងជណ្ដើរនោះ ទើបមិត្ដភក្ដិស្ទុះទៅពន្លត់ម៉ាស៊ីនរួចជួយទាញចេញពីជណ្ដើរយកទៅដាក់លើប៉ៅអ៊ី ។ យុវជនរងគ្រោះបន្ដទៀតថា ពេលត្រូវឆក់ដំបូងនៅដឹងខ្លួននៅឡើយទេ លុះពេលគេជួយលើកយកទៅដាក់លើប៉ៅអ៊ីក៏សន្លប់តែម្ដង លុះពេលដឹងខ្លួនវិញ ត្រូវមិត្តភក្តិប្រាប់ថា ភ្លាមៗនោះបានបញ្ជូនទៅព្យាបាលនៅមន្ទីរពេទ្យខេត្ដ រួចទើបបញ្ជូនបន្តមកព្យាបាលនៅមន្ទីរពេទ្យព្រះកុសុមៈទៀត ។
តាមមិត្ដភក្ដិដែលទៅផ្សារដែកជាមួយឈ្មោះអ៊ុន ប៉ែន អាយុ២៥ឆ្នាំ មានស្រុកកំណើតនៅភូមិកញ្ច្រប់ ឃុំព្រះនិព្វាន បានឱ្យដឹងថា ពេលទៅផ្សារដែកនោះ ខ្លួនឈរផ្សារនៅខាងក្រោម ចំណែកម៉ី សម្ផស្ស ឡើងផ្សារលើជណ្ដើរ។ ខណៈពេលកំពុងផ្សារនោះមិនដឹងមូលហេតុអ្វីទេ ស្រាប់តែខ្លួនដែលកំពុងឈរផ្សារនោះក៏ឆក់ដែរ តែមិនមានគ្រោះថ្នាក់ទេ ដោយសារឈរនៅខាងក្រោមមានកម្លាំងអាចរើបម្រះបាន ។ បើតាមការអះអាងពីឈ្មោះអ៊ុន ប៉ែន ថា ការឆក់នេះក៏អាចបណ្ដាលមកពីឆ្លងចរន្ដអគ្គិសនីពីបង្គោលខ្សែកាបដែលនៅជិតសំយាបនោះប្រមាណ២ម៉ែត្រប៉ុណ្ណោះ ។ ចំណែកតាមការសន្និដ្ឋានមួយទៀតថា ដោយសារពេលកំពុងផ្សារនោះ កម្លាំងម៉ាស៊ីនដែលបញ្ឆេះមានចរន្ដ AC&DC ប៉ះគ្នាបង្កើតជាកម្លាំងដ៏ខ្លាំងមួយ ។
ខណៈពេលមកដល់មន្ទីរពេទ្យព្រះកុសុមៈ គ្រូពេទ្យបានវះសាច់ដែលខ្លោចចេញខ្លះដើម្បីបង្ហូរឈាមដែលកកចេញ ចំណែកភ្លៅក៏ឆេះខ្លោចបន្ដិចដែរ ។ រីឯថៅកែសិប្បកម្មធ្វើទ្វារបង្អួចនោះក៏បានមកមើលជនរងគ្រោះដល់មន្ទីរពេទ្យនិងចេញថ្លៃព្យាបាលឱ្យផងដែរ ។ បើតាមអ្នកបច្ចេកទេសខាងផ្នែកអគ្គិសនីបានឱ្យដឹងថា ខ្សែកាបដែលរត់កាត់ដំបូលនោះជាខ្សែស្រាតមានកម្លាំងដល់ទៅ៣៨០ ហើយជាប្រភេទខ្សែហ្វា កាលណាមានចរន្ដខាងក្រោមជាម៉ាស់ ទើបបង្កឱ្យមានចរន្ដឆក់គ្នាបែបនេះ ហេតុដូច្នេះហើយទើបពេលពន្លត់ម៉ាស៊ីន ក៏លែងឆក់ដែរ ៕
ចែករំលែកព័តមាននេះ