រាជធានីភ្នំពេញ ៖ ហេតុការណ៍អគ្គីភ័យឆាបឆេះផ្សារទួលសង្កែ ក្នុងសង្កាត់ទួលសង្កែខណ្ឌប្ញស្សីកែវរហូតមកដល់ថ្ងៃទី២ សីហា មានរយៈពេល១០ថ្ងៃមកហើយ ដែលសមត្ថកិច្ចរកពុំទាន់ឃើញពីមូលហេតុដែលបង្កឱ្យមានអគ្គីភ័យនេះនៅឡើយទេ ទោះបីជាមានការចោទប្រកាន់ទៅលើជនម្នាក់ថាជាអ្នកបង្កក្តី ។
ពេលនេះប្រជាពលរដ្ឋចំនួន៨៤នាក់បានផ្តិតមេដៃប្តឹងចោទប្រកាន់ឈ្មោះទា វណ្ណារ៉ា ភេទប្រុស អាយុ៤២ឆ្នាំ ជាមន្ត្រីរាជការម្នាក់ មានទី លំនៅផ្ទះលេខ៥៣ ផ្លូវលេខ៩០១ ដោយចោទថា ជាអ្នកបង្កឱ្យកើតមានអគ្គីភ័យ ខណៈដែលឈ្មោះទា វណ្ណារ៉ា ក៏បានដាក់ពាក្យបណ្តឹងមុនដោយចោទឈ្មោះចាន់ សារ៉ន ជាគ្រូពេទ្យមានលំនៅផ្ទះលេខ១៥ ផ្លូវលេខ៩០០ ថា ជាអ្នកបង្កឱ្យកើតមានអគ្គីភ័យនេះ ព្រមទាំងទារសងសំណងការខូចខាតចំនួន៨ម៉ឺនដុល្លារ និងទារជំងឺចិត្ត៣ម៉ឺនដុល្លារ ។ ទោះបីជាយ៉ាងណាឈ្មោះទា វណ្ណារ៉ា រួមទាំងក្រុមគ្រួសារបានគេចខ្លួនបាត់ទៅហើយ ។ ចំណែកពាក្យបណ្តឹងរបស់ប្រជាពលរដ្ឋ៨៤នាក់ ក៏បានបញ្ជូនទៅសាលាសង្កាត់ទួលសង្កែផងដែរ ។
លោកហ៊ុយ ហ៊ាន មេប៉ុស្តិ៍ទួលសង្កែបានឱ្យដឹងថា ការកើតមានអគ្គីភ័យនោះពុំទាន់ដឹងពីមូលហេតុច្បាស់នៅឡើយ តែដឹងថាភ្លើងបានឆេះចេញពីផ្ទះឈ្មោះទា វណ្ណារ៉ា ហើយប្រជាពលរដ្ឋបានផ្តិតមេដៃប្តឹង ។
ឈ្មោះអេង ត្រាវ ភេទប្រុស អាយុ៣២ឆ្នាំ ដែលបានជួលផ្ទះរបស់ឈ្មោះទា វណ្ណារ៉ា និងជាតំណាងអ្នករងគ្រោះឆេះផ្ទះបានឱ្យដឹងថានៅមុនពេលកើតហេតុភ្លើងបានឆេះចេញពីផ្ទះរបស់ឈ្មោះទា វណ្ណារ៉ា ផ្នែកខាងក្រោយ ហើយពេលនោះខ្លួនបានទៅជួយពន្លត់រួមជាមួយអ្នកជិតខាង ដោយចោលកូនតូចៗចំនួន៣នាក់ដែលកំពុងដេក ។ តែដោយសារភ្លើងឆេះកាន់តែខ្លាំង ក៏រត់មកយកកូនវិញ ព្រោះភ្លើងបានឆេះសន្ធោសន្ធៅទៅហើយ មិនអាច់ទប់ស្កាត់បានទេ ។
ចំណែកឈ្មោះអ៊ួង មិនា ភេទប្រុស អាយុ៦៨ឆ្នាំ ជាឪពុកឈ្មោះចាន់ សារ៉ាន ជាគ្រូពេទ្យបានឱ្យដឹងថា ការកើតមានអគ្គីភ័យនេះមិនមែនឆេះចេញពីផ្ទះរបស់គាត់នោះទេ មិនដូចជាការចោទប្រកាន់របស់ឈ្មោះទា វណ្ណារ៉ា នោះទេ ។
អ្នកខ្លះទៀតបានអះអាងនៅមុខមន្ត្រីសង្កាត់ទួលសង្កែឱ្យដឹងថា នេះជាការធ្វេសប្រហែសរបស់ឈ្មោះទា វណ្ណារ៉ា ដែលតែងតែដាំស្លរ ហើយទុកចោលរវល់មកលក់ដូរ ព្រោះកន្លងមកភ្លើងធ្លាប់បានឆាបឆេះចំនួន៤ដងមកហើយ គិតទាំងលើកនេះ តែជួយពន្លត់ទាន់ និងលើកនេះធ្ងន់ធ្ងរមិនអាចពន្លត់បាន ។
គួរបញ្ជាក់ថា កាលពីវេលាម៉ោង២និង៣០នាទីរសៀលថ្ងៃទី២៣ ខែកក្កដា ឆ្នាំ២០១២ ផ្សារទួលសង្កែត្រូវអគ្គីភ័យឆាបឆេះ បណ្តាលឱ្យតូបចំនួន៩ និងលំនៅឋានចំនួន៥៧ខ្នងត្រូវព្រះអគ្គីបំផ្លាញទាំងស្រុង ហើយប្រជាពលរដ្ឋចំនួន១៣៩គ្រួសារដែលជាម្ចាស់ផ្ទះ និងជួលស្នាក់នៅអត់ទីជម្រក និងបំផ្លិចបំផ្លាញអស់ទ្រព្យសម្បត្តិប្រមាណជាង១លានដុល្លារ ។ រហូតដល់ពេលនេះពុំដឹងពីមូលហេតុ នឹងកំពុងប្តឹងផ្តល់គ្នាទៅវិញទៅមកនៅឡើយ ។
វិបត្តិភ្លើងឆេះផ្សារទួលសង្កែនេះ សាលារាជធានីភ្នំពេញកាលពីថ្ងៃទី៣១ កក្កដា បានចេញសេចក្តីប្រកាសព័ត៌មានមួយជាការឆ្លើយតបនឹងការលើកឡើងរបស់បុគ្គលមួយចំនួនដែលបានអះអាងថា«សមត្ថកិច្ចមិនបានបំពេញតួនាទីរបស់ខ្លួន បែរជាទារប្រាក់ដោយមិនបានបាញ់ទឹកពន្លត់អគ្គិភ័យភ្លាមៗ និងបាញ់ទឹកតែផ្ទះណាឱ្យលុយប៉ុណ្ណោះ» ។ ការចោទប្រកាន់នេះត្រូវបានសេចក្តីប្រកាសព័ត៌មានចាត់ទុកថា ជាការរិះគន់គ្មានមូលដ្ឋាន និងពុំមានចេតនាល្អក្នុងការរិះរកភាពរីកចម្រើនឡើយ ។
សេចក្តីប្រកាសព័ត៌មានបន្តថា រថយន្តពន្លត់អគ្គិភ័យរបស់ចំណតយន្តហោះអន្តរជាតិភ្នំពេញ រថយន្តពន្លត់អគ្គិភ័យកងរាជអាវុធហត្ថរាជធានីភ្នំពេញ រថយន្តពន្លត់អគ្គិភ័យរបស់ក្រសួងមហាផ្ទៃ និងរថយន្តពន្លត់អគ្គិភ័យរបស់ខេត្តកណ្តាល បានចូលរួមក្នុងការបាញ់ទឹកពន្លត់ភ្លើងនេះ ។ បើគ្មានការខិតខំបែបនេះទេ ប្រហែលជាអគ្គិភ័យមិនអាចបញ្ចប់ក្នុងរយៈពេល២ម៉ោងឡើយ ហើយភាពអន្តរាយផ្ទះសម្បែង និងទ្រព្យសម្បត្តិមិនមានទំហំប៉ុណ្ណោះទេ ។
ទោះបីជាបែបណា សេចក្តីប្រកាសព័ត៌មានបន្តទៀតថា ដើម្បីជាមធ្យោបាយក្នុងការអភិវឌ្ឍនិងលើកទឹកចិត្តដល់សមត្ថកិច្ចក្នុងការបំពេញការងារ ប្រជាពលរដ្ឋដែលស្ថិតនៅក្នុងហេតុការណ៍ ហើយមន្ត្រីសមត្ថកិច្ចណាទារប្រាក់ពីប្រជាពលរដ្ឋ គួរតែសរសេរជាលាយលក្ខអក្សរបែបអនាមិកផ្តល់ជូនមកសាលារាជធានីភ្នំពេញពីឈ្មោះ និងលេខរថយន្តរបស់មន្ត្រីខិលខូចនោះ ដើម្បីចាត់វិធានការ និងដាក់វិន័យជនដែលធើ្វឱ្យប៉ះពាល់ដល់កិត្តិយសសមត្ថកិច្ច ។ សាលារាជធានីភ្នំពេញសង្ឃឹមជឿជាក់ថា សាធារណជននឹងចូលរួមសហការផ្តល់ព័ត៌មានដើម្បីឱ្យសកម្មភាពជួយសង្គ្រោះប្រជាពលរដ្ឋរងគ្រោះដោយអគ្គិភ័យកាន់តែមានប្រសិទ្ធភាព ៕
ចែករំលែកព័តមាននេះ