របាយការណ៍មួយចេញផ្សាយកាលពីថ្ងៃទី២សីហាដោយសាកលវិទ្យាល័យ HARWARD ព្រមានថា បណ្តាអាវុធដែលបោះបង់ចោលរ៉ាយប៉ាយជាផ្នែកមួយនៃគ្រឿងអាវុធរបស់អតីតមេដឹកនាំលីប៊ីលោកមូអាម៉ាកាដាហ្វី ជាការគំរាមកំហែងយ៉ាងធ្ងន់ធ្ងរមួយដល់ជនស៊ីវិល ។
លោកBONNIS DOCCHERTY ជាប្រមុខក្រុមស្រាវជ្រាវមួយរបស់ HARWARD LAW SCHOOL និងដៃគូគឺអង្គការ CIVIC ដែលទៅកាន់លីប៊ីគូសបញ្ជាក់ថា ប្រសិនបើអាវុធទាំងនោះត្រូវបោះបង់ចោលសមត្ថភាពសម្លាប់ជនស៊ីវិលរបស់វាពុំបាត់បង់ឡើយ ។ ក្នុងចំណោមអាវុធដែលបោះបង់ចោលរ៉ាយប៉ាយលើវាលខ្សាច់និងតំបន់ទាំងឡាយក្រោយជម្លោះកាលពីឆ្នាំទៅមិញរួមមានគ្រាប់កាំភ្លើងដៃ គ្រាប់កាំភ្លើងត្បាល់ និងគ្រាប់បែកទាំងឡាយរួមទាំងមីស៊ីលដី-អាកាសផង ។ អាវុធទាំងនោះនៅរ៉ាយប៉ាយខាងក្រៅលេណដ្ឋានជាច្រើនដែលគ្មានកិច្ចការពារសន្តិសុខ ហើយអាវុធឯទៀតនៅរ៉ាយប៉ាយគ្រប់កន្លែងក្នុងប្រទេស ។ ក្រៅពីនេះមានកន្លែងស្តុកអាវុធរបស់បណ្តាកងជីវពលនៅតាមទីក្រុងទាំងឡាយសម្រាប់ទុកលក់និងប្រើប្រាស់ដែលវាកាន់តែគំរាមកំហែងខ្លាំងទៀតដល់ជនស៊ីវិល ។
របាយការណ៍នេះក៏គូសបញ្ជាក់ផងដែរ ពីគ្រោះថ្នាក់សម្រាប់ជនស៊ីវិលពេលក្រុមមួយចំនួនដែលពុំទទួលការហ្វឹកហាត់ហើយចុះធ្វើការបោសសម្អាតតំបន់នានាដែលមានគ្រាប់រ៉ាយប៉ាយឬប្រមូលអាវុធទុកសម្រាប់ធ្វើជាអនុស្សាវរីយ៍នៃសង្គ្រាម ៕
ចែករំលែកព័តមាននេះ