រាជធានីភ្នំពេញ ៖ ខណៈពេលដែលហ៊ិន ច័ន្ទនីរ័ត្ន តែងតែប្រកាសក្តែងៗថា មកទល់ពេលនេះនាងនៅមិនទាន់មានគូស្នេហ៍នៅឡើយនោះ ស្រាប់តែថ្មីៗនេះមានពាក្យចចាមអារ៉ាមមួយចំនួនបានលើកឡើងថា តារាសម្តែង និងជាពិធីការិនីដ៏តូចច្រឡឹងស្រស់សោភារូបនេះកំពុងតែមានទំនាក់ទំនងជាមួយបុរសជំនួញកាត់ចិនម្នាក់ ។ តែតារារូបនេះនៅតែធ្វើការបដិសេធក្រោមលេសថា នាងមិនទាន់មានគូស្នេហ៍ និងមិនទាន់ចង់រៀបការនៅពេលនេះឡើយ ខណៈដែលការងារសិល្បៈរបស់នាងកាន់តែមមាញឹកនោះ ។
រឿងនេះមិនមែនជារឿងថ្មីដែលកើតឡើងសម្រាប់តារាដែលមានមន្តស្នេហ៍ម្នាក់នេះឡើយ ពោលកន្លងមកហ៊ិន ច័ន្ទនីរ័ត្ន ក៏ធ្លាប់មានពាក្យលេចឮថា មានទំនាក់ទំនងជាមួយលោកសុខ សេរីវឌ្ឍនា ដោយសារជាញឹកញាប់គេតែងឃើញអ្នកទាំងពីរច្រើនដើរហើរជាមួយគ្នា ។ ក្រោយមកក៏លេចឮថា មានការទាក់ទងជាមួយបុរសម្នាក់ឈ្មោះសិទ្ធ ជាបុគ្គលិកក្រុមហ៊ុនមួយដែលមានវ័យប្រហាក់ប្រហែលនាង ប៉ុន្តែរឿងរ៉ាវទាំងនោះក៏ត្រូវបាននាងច្រានចោលទាំងអស់ដោយវាចាយ៉ាងខ្លីថា វាជារឿងមិនពិត ។
ដោយឡែកសម្រាប់ពាក្យចចាមអារ៉ាមពីទំនាក់ទំនងជាមួយបុរសជំនួញកាត់ចិន និងមានទ្រព្យធននេះ អតីតហ្វ្រេសស៊ីលេខ១ ឆ្នាំ២០០៧ រូបនេះបានអះអាងថា ទាំងនេះវាមិនខុសពីរឿងមុនៗឡើយ ពោលគឺវាគ្រាន់តែជាពាក្យចចាមអារ៉ាមប៉ុណ្ណោះមិនមែនជាការពិតឡើយ ។ នាងអះអាងបន្ថែមថា មកទល់ពេលនេះនាងមិនទាន់រកឃើញគូស្នេហ៍ណាម្នាក់នៅឡើយទេ ហើយបើនាងអាចរកគូស្នេហ៍ពិតនោះ គឺនាងមិនលាក់លៀមឡើយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ