រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជាបានឲ្យដឹងនៅថ្ងៃទី២ សីហានេះថា ជាផ្នែកមួយនៃបេសកកម្មភាពជាដៃគូនៅតំបន់ប៉ាស៊ីហ្វិក ២០១២ នៅប្រទេសកម្ពុជា ក្រុមតន្ត្រីរបស់កងនាវាសហរដ្ឋអាមេរិក ប្រចាំតំបន់ប៉ាស៊ីហ្វិកនឹងប្រគំតន្ត្រីជូនសាធារណជនទស្សនាដោយឥតគិតថ្លៃនៅផ្សាររាត្រីរាជធានីភ្នំពេញ នៅថ្ងៃសៅរ៍ ទី៥ សីហា ឆ្នាំ២០១២ វេលាម៉ោង ៧យប់ ។
សេចក្តីប្រកាសព័ត៌មានដដែលបានបន្តថា ក្រុមតន្ត្រីរបស់កងនាវាសហរដ្ឋអាមេរិកប្រចាំតំបន់ប៉ាស៊ីហ្វិក មានតន្ត្រីករដែលមានទេពកោសល្យ១០រូប បានដើរសម្ដែងជាអន្តរជាតិ ហើយបានសម្ដែងជូនមនុស្សរាប់លាននាក់ទស្សនានៅទូទាំងតំបន់ប៉ាស៊ីហ្វិកខាងលិច។ ក្រុមតន្ត្រីនេះ ប្រគំបទចម្រៀងទសវត្សឆ្នាំ១៩៦០ ក៏ដូចជាបទចម្រៀងបច្ចុប្បន្ន ដែលមានការនិយមបំផុត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ