រាជធានីភ្នំពេញ ៖ បុរសម្នាក់ត្រូវរថយន្តមួយគ្រឿងបុកស្លាប់នៅនឹងកន្លែងកើតហេតុ ហើយរថយន្តបង្កបើករត់បាត់ស្រមោល កាលពីវេលាម៉ោង៩និង៥០នាទីយប់ថ្ងៃទី១ សីហា តាមមហាវិថីព្រះមុនីរ៉េត ជិតវត្តនន្ទមុនី ស្ថិតក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ។
សាក្សីឃើញហេតុការណ៍បានឱ្យដឹងថា មុនពេលកើតហេតុមានរថយន្តមួយគ្រឿងមិនចាំម៉ាកបើកតាមមហាវិថីព្រះមុនីរ៉េត ពីជើងទៅត្បូង បានវា៉រថយន្តមួយគ្រឿងជ្រុលចូលចំណែកផ្លូវម្ខាងទៀតទៅបុកម៉ូតូគុបជ្រុង៩០ ពណ៌ទឹកប៊ិចបើកក្នុងទិសដៅបញ្ច្រាសគ្នា ចំពីមុខពេញទំហឹងលាន់ដូចរន្ទះ ធ្វើឱ្យអ្នកបើកមូ៉តូដួលបោកក្បាលហូរឈាមស្លាប់បាត់បង់ជីវិតនៅកន្លែងកើតហេតុ ចំណែករថយន្តបន្ថែមល្បឿនរត់គេចបាត់ ។ តែប្រភពខ្លះអះអាងថា រថយន្តបង្កម៉ាកវីហ្គោពណ៌ស បានបើកវ៉ារថយន្ត១គ្រឿងជ្រុលទៅបុកម៉ូតូបើកបញ្ច្រាសទិសគ្នាពេញទំហឹងតែម្តង ។ ជនរងគ្រោះឈ្មោះកាំង ហុងគ្រី អាយុ៣១ឆ្នាំ ស្នាក់នៅសង្កាត់ផ្សារដេប៉ូ១ ខណ្ឌទួលគោក។
សពជនរងគ្រោះត្រូវបានដឹកយកទៅតម្កល់ទុកនៅវត្តសំបួរ រង់ចាំសាច់ញាតិទៅទទួលយកទៅធ្វើបុណ្យតាមប្រពៃណី ។ ចំណែកម៉ូតូខូចខាតផ្នែកខាងមុខត្រូវសមត្ថកិច្ចយកទៅរក្សាទុកនៅការិយាល័យនគរបាលចរាចរណ៍ផ្លូវគោកដើម្បីស្រាវជ្រាវរករថយន្តបង្ក ៕
ចែករំលែកព័តមាននេះ