ខេត្តបន្ទាយមានជ័យ ៖លោកវរសេនីយ៍ត្រីកែវ ប៊ុនយឿន អធិការនគរបាលស្រុកព្រះនេត្រព្រះបានឲ្យដឹងថា យោងតាមសេចក្តីរាយការណ៍របស់លោកមេភូមិទឹកជោរ គឺមានក្មេងដើរលេងនៅតាមមាត់អូរ ប្រទះឃើញគ្រាប់យុទ្ធភ័ណ្ឌចម្រុះមិនទាន់ផ្ទុះជាច្រើនគ្រាប់ កាលពីវេលាម៉ោង៤រសៀលថ្ងៃទី៣០កក្កដានៅមាត់អូរក្បែររបងវត្តទឹកជោរ ស្ថិតក្នុងភូមិទឹកជោរ ឃុំទឹកជោរ ស្រុកព្រះនេត្រព្រះ ។
គ្រាប់យុទ្ធភ័ណ្ឌមិនទាន់ផ្ទុះទាំងនោះមានគ្រាប់ដេកា២គ្រាប់ គ្រាប់៨០មីល្លីម៉ែត្រចំនួន២គ្រាប់ គ្រាប់បេ៤០ចំនួន៤គ្រាប់ គ្រាប់បែកដៃចំនួន៤គ្រាប់និងគ្រាប់កាអាជាច្រើនគ្រាប់ទៀត ហើយគ្រាប់ទាំងនេះគឺជាគ្រាប់ចាស់ៗដែលសេសសលពីសម័យសង្ក្រាម ។
លោកអធិការបានបញ្ជាក់ថាបើតាមការរាយការណ៍ពីនគរបាលប៉ុស្តិ៍បានឲ្យដឹងថា នៅមានគ្រាប់យុទ្ធភ័ណ្ឌមិនទាន់ផ្ទុះនៅក្នុងអូរទៀត តែយើងមិនទាន់ហ៊ានរាវរក គ្រាន់តែយកគ្រាប់ដែលប្រទះឃើញទាំងប៉ុន្មាននោះ មករក្សាទុកនៅប៉ុស្តិ៍សិន ដើម្បីរង់ចាំប្រគល់ជូនអង្គភាពស៊ីម៉ាក់ យកទៅកម្ទេចចោល បន្ទាប់មកនឹងស្នើសុំកម្លាំងជំនាញធ្វើការរាវរកក្នុងទឹកអូរបន្ថែមទៀត ៕
ចែករំលែកព័តមាននេះ