រាជធានីភ្នំពេញ ៖ កាលពីថ្ងៃទី៣១ កក្កដា សាលាដំបូងរាជធានីភ្នំពេញ បានសម្រេចឃុំខ្លួនមន្ត្រីនគរបាលមួយរូបឈ្មោះសោម ហុង ហៅម៉ាប់ ភេទប្រុស អាយុ៣៧ឆ្នាំ ដាក់ពន្ធនាគារជាបណ្តោះអាសន្នពីបទបាញ់បោះសេរី និងកាន់អាវុធដោយគ្មានការអនុញាត ។
សូមរំឭកថា កាលវេលាម៉ោង២រំលងអធ្រាត្រឈានចូលថ្ងៃទី២៩ កក្កដា ឈ្មោះសោម ហុង ហៅ ម៉ាប់ និងមិត្តភក្តិ២នាក់ទៀត ដែលម្នាក់ជាមន្ត្រីយោធា និងម្នាក់ជាចិនលក់បបរមាន់នៅផ្សារកំពង់ស្ពឺ ខណៈចេញពីច្រៀងខារ៉ាអូខេយីហោផ្លាហ្សា ហើយសប្បាយចិត្តពេកក៏ជិះម៉ូតូម៉ាកណៃហត ១គ្រឿង ពាក់ស្លាកលេខន.ប ទាំង៣នាក់ ទៅជិតដល់អង់តែនទួលគោករួចផ្ទុះអាវុធ១គ្រាប់លេង ។
ភ្លាមៗនោះ កម្លាំងកងរាជអាវុធហត្ថខណ្ឌទួលគោកដែលធ្វើសកម្មភាពល្បាតក៏បានឃាត់ខ្លួននិងបញ្ជូនជនទាំង៣នាក់ទៅកាន់បញ្ជាការដ្ឋានកងរាជអាវុធហត្ថរាជធានី ។ ក្រោយពីឃាត់ខ្លួន ស្តាប់ចម្លើយជនទាំង៣នាក់ និងយោងទៅលើសាក្សីនៅកន្លែងកើតហេតុបញ្ជាក់ថា មន្ត្រីយោធា និងចិនលក់បបរមាន់នោះមិនពាក់ពន្ធនឹងករណីផ្ទុះអាវុធនេះទេ និងបានអនុញ្ញាតឱ្យទៅផ្ទះវិញ។ រីឯឈ្មោះសោម ហុង ហៅម៉ាប់ ជាម្ចាស់កាំភ្លើងបានសារភាពថា ខ្លួនពិតជាអ្នកបាញ់១គ្រាប់តាមផ្លូវសាធារណៈមែន ព្រោះសប្បាយចិត្តពេកនៅពេលបានច្រៀងខារ៉ាអូខេ។
ផ្អែកតាមចម្លើយនិងរបាយការណ៍ជាក់លាក់របស់សមត្ថកិច្ចនោះហើយ ទើបចៅក្រមសាលាដំបូងរាជធានីភ្នំពេញសម្រេចឃុំខ្លួនអ្នកបាញ់បោះសេរីរូបនេះដាក់ពន្ធនាគារជាបណ្តោះអាសន្ន៕
ចែករំលែកព័តមាននេះ