ខេត្តកណ្តាល ៖ ដើម្បីចូលរួមប្រតិបត្តិទៅតាមគន្លងប្រពៃណីព្រះពុទ្ធសាសនា នៅក្នុងឱកាសនៃពិធីបុណ្យចូលព្រះវស្សាឆ្នាំនេះ លោក ហេង រតនា ទីប្រឹក្សាសម្តេចតេជោ ហ៊ុន សែន នាយករដ្ឋមន្ដ្រី ប្រធានគណៈពង្រឹងមូលដ្ឋានស្រុកល្វាឯម និងសហការរី កាលពីរសៀលថ្ងៃ ទី១ សីហា ឆ្នាំ២០១២ បាននាំយកទៀនព្រះវស្សា ព្រមទាំងសម្ភារបរិក្ខារ និងបច្ច័យ ទៅប្រគេនដល់ព្រះសង្ឃកំពុងគង់ចាំព្រះវស្សានៅវត្តចំនួន៥រួមមាន វត្តពោធិវរាម វត្តមង្គលប្រាជុំ វត្តព្រែកប្ញស្សី វត្តមុនីសាគរ និងវត្តជ្រោយស្តី ស្ថិតនៅឃុំព្រែកប្ញស្សី ស្រុកល្វាឯម ។
មានប្រសាសន៍សំណេះសំណាលនាឱកាសនោះ លោកហេង រតនា បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចទាំង៣ ប្រគេន និងជូនចំពោះព្រះសង្ឃ លោកតា លោកយាយ និងពុទ្ធបរិស័ទទាំងអស់ ដែលជានិច្ចកាល សម្តេចទាំង៣ តែងតែយកចិត្តទុកដាក់ខ្ពស់ពីសុខទុក្ខ និងជីវភាពរស់នៅប្រចាំថ្ងៃរបស់ប្រជាពលរដ្ឋ ដោយមិនប្រកាន់និន្នាការនយោបាយឡើយ ។ លោកបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន បានខិតខំកសាងស្តារ និងអភិវឌ្ឍន៍ប្រទេសជាតិ ឲ្យមានការរីកចម្រើនលើគ្រប់វិស័យទាំងអាណាចក្រ និងពុទ្ធចក្រ ។ ដោយឡែកសម្រាប់ស្រុកល្វាឯម សមិទ្ធផលជាច្រើនត្រូវបានស្តារ និងកសាងជាបន្តបន្ទាប់រួមមាន ហេដ្ឋារចនាសម្ព័ន្ធរូបវ័ន្ត ប្រព័ន្ធធារាសាស្រ្ត មន្ទីរពេទ្យ សាលារៀន និងវត្តអារាមជាដើម ។
នាឱកាសនោះដែរ លោក ហេង រតនា បានសំណូមពរដល់ព្រះសង្ឃគ្រប់ព្រះអង្គ ត្រូវយកចិត្តទុកដាក់ខិតខំសិក្សារៀនសូត្រធម៌វិន័យដើម្បីក្លាយជាបព្វជិតមួយអង្គគួរជាទីគោរពសក្ការៈរបស់ពុទ្ធបរិស័ទគ្រប់រូប ។ លោកក៏បានសំណូមពរដល់ប្រជាពលរដ្ឋទាំងអស់ នៅក្នុងឱកាសរដូវវស្សាចូលមកដល់នេះត្រូវយកចិត្តទុកដាក់លើការងារបង្កបង្កើនផលឲ្យបានទាន់ពេលវេលា និងប្រុងប្រយ័ត្នខ្ពស់ចំពោះគ្រោះមហន្តរាយធម្មជាតិ ដូចជារន្ទះបាញ់ និងគ្រោះទឹកជំនន់ជាដើម ដែលនឹងអាចកើតមានឡើងជាយថាហេតុ ។
ចំពោះទៀនព្រះវស្សា និងទេយ្យទានដែលបានប្រគេននាថ្ងៃនោះក្នុងមួយវត្តៗទទួលបានទៀនព្រះវស្សា១គូ អង្ករ៥០គីឡូក្រាម ស៊ីម៉ងត៍២តោន ព្រមទាំងគ្រឿងឧបភោគបរិភោគ និងបច្ច័យ១លានរៀល ។ ដោយឡែក ព្រះសង្ឃក្នុងមួយអង្គៗទទួលបានបច្ច័យ៣ម៉ឺនរៀល និងតាជី យាយជី ក្នុងម្នាក់ៗថវិកា១ម៉ឺនរៀល ៕
ចែករំលែកព័តមាននេះ