ខេត្តកំពត ៖ ពិតជាគួរឱ្យអាសូរជាពន់ពេកចំពោះក្មេងប្រុសក្បាលធំម្នាក់ដែលមានរូបរាងស្គមស្គាំងដេកតែនៅនឹងកន្ទេលអស់រយៈពេល៦ឆ្នាំ មកហើយ រួចពេលនេះឪពុកម្តាយប្រាប់ថា អស់លទ្ធភាពព្យាបាលហើយ ។ ក្មេងប្រុសម្នាក់នេះឈ្មោះ ជ្រេង ប៊ុនលាភ អាយុ៦ឆ្នាំ មានម្តាយឈ្មោះ ខេង យោ អាយុ៤១ឆ្នាំ ឪពុកឈ្មោះអោម កែវ អាយុ៣៨ឆ្នាំ រស់នៅភូមិរំពើន ឃុំស្តេចគង់ ស្រុកបន្ទាយមាស ។
បើតាមម្តាយឪពុកក្មេងប្រុសអភ័ព្វនេះ រៀបរាប់ថា បន្ទាប់ពីបានគ្នាជាប្តីប្រពន្ធមក គឺពួកគាត់មានកូនតែម្នាក់នេះគត់ ដែលពេលកើតមកដំបូងដូចគេឯងធម្មតា លុះបានអាយុជិតមួយឆ្នាំ ស្រាប់តែមានជំងឺក្បាលធំចម្លែក ។ ដោយសារកូនមានជំងឺនេះ គាត់បានព្យាយាមយកកូនទៅព្យាបាលគ្រប់មន្ទីរពេទ្យនៅរាជធានីភ្នំពេញ ហើយគ្រូពេទ្យបានពិនិត្យ និងប្រាប់ថា កូនប្រុសគាត់ទឹកចូលក្នុងខួរក្បាល ទោះជាយ៉ាងណាក្រុមគ្រូពេទ្យនៅមន្ទីរពេទ្យគន្ធបុប្ផា បានខិតខំព្យាបាលកូនគាត់យកទឹកចេញពីក្នុងខួរក្បាលរហូតបានសម្រេច ។
បុរសជាឪពុកនិយាយទៀតថា ក្នុងនាមជាឪពុកម្តាយពួកគាត់មានការត្រេកអរណាស់ពេលគ្រូពេទ្យបូមទឹកចេញពីស្រោមខួរក្បាលអស់ហើយ សង្ឃឹមថា កូនប្រុសគាត់ពិតជាបានសះស្បើយ តែទីបំផុតនៅតែក្រោកពីកន្ទេលមិនរួចដដែល ។ ចាប់តាំងពីពេលកូនប្រុសគាត់មានជំងឺក្បាលធំមក គ្រួសារគាត់មិនមានសល់លុយកាក់អ្វីនឹងគេទេ រហូតដល់លក់ដីស្រែយកលុយមកព្យាបាលកូនទៀត ក៏នៅតែមិនជា ធ្វើឱ្យពេលនេះពួកគាត់អស់លទ្ធភាពក្នុងការព្យាបាល ហើយ ។
មកដល់បច្ចុប្បន្ន កូនប្រុសគាត់នេះមានអាយុ៦ឆ្នាំហើយ ប៉ុន្តែនៅតែដេកនៅនឹងន្ទេលរហូត មិនដឹងថាត្រូវគិតយ៉ាងដូចម្តេចទៀតទេ ។ គាត់អាណិតកូនប្រុសគាត់ណាស់ ចេះសើច ចេះហូបនំចំណីបាន ចូលចិត្តស្តាប់វិទ្យុ ភ្នែកភ្លឺដូចគេដែរ តែដើេរមិនរួច ៕
ចែករំលែកព័តមាននេះ