ខេត្តកណ្តាល ៖ បុរសម្នាក់បានជិះម៉ូតូឌុបកូនឆ្ពោះទៅផ្សាររកទិញម្ហូប ពេលដល់ផ្លូវចូលផ្សារបានបត់ម៉ូតូចូលក៏ទាក់ដៃម៉ូតូមួយគ្រឿងទៀតជិះគ្នា៣នាក់ បណ្តាលឱ្យដួលបោកទៅលើផ្លូវរងរបួសធ្ងន់៣នាក់ ស្រាល២នាក់ ។ គ្រោះថ្នាក់នេះកើតឡើងកាលពីវេលាម៉ោង៤និង៣០នាទីរសៀលថ្ងៃទី៣១ កក្កដា តាមផ្លូវជាតិលេខ៣ ចំណុចមុខផ្សារព្រៃទទឹង ក្នុងស្រុកកណ្តាលស្ទឹង។
តាមសម្តីរបស់សាច់ញាតិជនរងគ្រោះបានឱ្យដឹងថា មុនពេលកើតហេតុបុរសឈ្មោះ វណ្ណ ថុន អាយុ៣៨ឆ្នាំ រស់នៅភូមិស្លែង ឃុំត្រពាំងវែង ស្រុកកណ្តាលស្ទឹង ខេត្តកណ្តាល ជិះម៉ូតូសេ១២៥ សេ៊រី២០០៧ ឌុបកូនស្រីឈ្មោះ ថុន ប៉ោ អាយុ៤ឆ្នាំ ក្នុងគោលបំណងទៅទិញម្ហូបនៅផ្សារព្រៃទទឹង ដោយជិះពីជើងទៅត្បូង ស្របពេលនោះមានម៉ូូតូវីវ៉ា ពណ៌ខ្មៅមួយគ្រឿងជិះក្នុងទិសដៅស្របគ្នាពីក្រោយជិះគ្នា៣នាក់ ឌុបកូន និងក្មួយពិការម្នាក់ត្រឡប់មកពីលេងផ្ទះបងប្អូន មកដល់ចំណុចខាងលើម៉ូតូសេ១២៥បត់ឆ្វេងចូលផ្សារ ក៏បានទាក់ដៃចង្កូតជាមួយម៉ូតូវីវ៉ាដួលបណ្តាលឱ្យរងរបួសធ្ងន់៣នាក់ ស្រាល២នាក់ ។
ជនរងគ្រោះរបួសមាន អ្នកបើកម៉ូតូសេ១២៥ឈ្មោះ វណ្ណ ថុន របួសធ្ងន់បែកក្បាល និងរយះជើង កូនស្រីរបួសស្រាលព្យាបាលនៅមណ្ឌលសុខភាពកន្ទួត ។ ចំណែកអ្នកបើកម៉ូតូវីវ៉ាឈ្មោះ កុង កប ភេទប្រុស អាយុ៣៨ឆ្នាំ ជាកសិករ មានទីលំនៅភូមិពូនភ្នំ ឃុំលំពង់ ស្រុកបាទី ខេត្តតាកែវ រងរបួសត្រូវភ្នែកខាងស្តាំ ឌុបកូនស្រីឈ្មោះ កប សារី អាយុ៥ឆ្នាំ រងរបួសធ្ងន់ត្រូវបានដឹកយកទៅមន្ទីរពេទ្យគន្ធបុប្ផា ឯក្មួយប្រុសដែលពិការនោះរងរបួសស្រាល ។
ជនរងគ្រោះជាឪពុកទាំង២នាក់ដែលរងរបួសធ្ងន់ត្រូវបានបញ្ជូនទៅព្យាបាលនៅមន្ទីរពេទ្យព្រះកុសុមៈជាមួយគ្នា ។ចំណែកម៉ូតូទាំង២គ្រឿងរងការខូចខាតគួរសមត្រូវប៉ូលិសយកទៅរក្សាទុកនៅអធិការដ្ឋានស្រុកកណ្តាលស្ទឹងរង់ចាំដោះស្រាយជាក្រោយ ៕
ចែករំលែកព័តមាននេះ