រាជធានីភ្នំពេញ ៖រថយន្តរ៉េវហ្វ័រ ពណ៌ទឹកសមុទ្រ បើកបរដោយបុរសម្នាក់ក្នុងស្ថានភាពស្រវឹងរេចង្កូតទៅបុករ៉ឺម៉កម៉ូតូបណ្តាលឱ្យរ៉ឺម៉កម៉ូតូស្រុញផ្នែកខាងមុខ តែមិនមានរងរបួសទេ កាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី២ សីហា តាមផ្លូវលេខ១៨២ សង្កាត់អូរឫស្សីទី២ ខណ្ឌ៧មករា។
សាក្សីបានឱ្យដឹងថា រថយន្តរ៉េវហ្វ័របើកតាមផ្លូវលេខ១៨២ ពីលិចទៅកើត ចំណែករ៉ឺម៉កម៉ូតូជិះគ្នា៤នាក់ បើកពីកើតទៅលិចក្នុងទិសដៅបញ្ច្រាសគ្នា ខណៈមកដល់ចំណុចខាងលើរថយន្តក៏រេចង្កូតជ្រុលទៅបុករ៉ឺម៉កម៉ូតូ ដោយឡែកអ្នកបើករ៉ឺម៉កលោតចេញទាន់ទើបមិនបណ្តាលឱ្យរងរបួស ចំណែកភ្ញៀវដែលជិះលើរ៉ឺម៉កក៏មិនមានរងរបួសដែរ តែរ៉ឺម៉កស្រុញខាងមុខ ។ រ៉ឺម៉កម៉ូតូមានដឹកភ្ញៀវចំនួន៣នាក់ជាបុរស ។ បន្ទាប់ពីបុកគ្នា ភ្ញៀវទាំងបីនាក់នោះបាននាំគ្នាជិះម៉ូតូឌុបចេញទៅបាត់នៅសល់តែម្ចាស់រ៉ឺម៉ក និងអ្នកបើករថយន្តធ្វើការដោះស្រាយគ្នា ។
ក្រោយពេលកើតហេតុភាគីទាំង២បានធ្វើការចរចាគ្នា ដោយម្ចាស់រ៉ឺម៉កម៉ូតូទាមទារសំណងចំនួន៣០០ដុល្លារសម្រាប់ជួសជុលរ៉ឺម៉កម៉ូតូ តែម្ចាសស់រថយន្តមិនព្រម ហើយតម្រូវឱ្យសមត្ថកិច្ចវាស់វែងយករថយន្តនិងរ៉ឺម៉កម៉ូតូទៅរក្សាទុកនៅខណ្ឌ៧មករា ដើម្បីដោះស្រាយបន្ត ៕
ចែករំលែកព័តមាននេះ