ខេត្តកំពង់ចាម ៖ លំនៅឋាន និងរោងឡឥដ្ឋរបស់ប្រជាពលរដ្ឋចំនួន១៦ខ្នង នៅស្រុកចំនួន៣ ក្នុងនោះមានស្រុកបាធាយ ស្រុកជើងព្រៃ និងស្រុកពញាក្រែកបានរងការខូចខាត ខ្លះរបើកដំបូល ខ្លះទ្រេត និងមួយចំនួនទៀតបាក់រលំរាបដល់ដី ព្រមទាំងបានបង្កឱ្យរងរបួសកម្មករម្នាក់ ។ ខ្យល់ព្យុះបានវាយប្រហារក្នុងខណៈពេលមេឃកំពុងធ្លាក់ភ្លៀង កាលពីល្ងាច និងយប់ថ្ងៃទី៣១ កក្កដា ។
តាមមន្ត្រីនគរបាលនៃស្នងការដ្ឋាននគរបាលខេត្តមួយរូបបានប្រាប់កោះសន្តិភាពឱ្យដឹងថា កាលពីវេលាម៉ោង៣និង៣០នាទីរសៀលថ្ងៃទី៣១ កក្កដា ភ្លៀងបានធ្លាក់ចុះមកយ៉ាងខ្លាំងលើភូមិដូនដុំ ឃុំសូទិព្វ ស្រុកជើងព្រៃ បណ្តាលឱ្យផ្ទះចំនួន៤ខ្នងត្រូវរលំបាក់រាបដល់ដី និងខ្លះទ្រេត ។ ផ្ទះដែលរងគ្រោះនេះខ្លះមានទំហំ៥ម៉ែត្រX៧ម៉ែត្រ ខ្លះ៤ម៉ែត្រX៥ម៉ែត្រ ។
មន្ត្រីនគរបាលដដែលបានប្រាប់បន្តថា ចំណែកនៅភូមិស្គន់ ភូមិដូនដុំ ឃុំសូទិព្វ វិញមានផ្ទះចំនួន៧ខ្នង ក្នុងនោះមានរោងឡឥដ្ឋដែរ ដែលខ្លះប៉ើងដំបូល ខ្លះបាក់រាបដល់ដី និងមានកម្មករម្នាក់របួស ដោយសារព្យុះភ្លៀងនេះ ។ នៅវេលាម៉ោង៤និង៣០នាទីរសៀលថ្ងៃដដែល នៅស្រុកបាធាយមានផ្ទះចំនួន៤ខ្នង និងសាឡុំមួយក៏ត្រូវរងការខូចខាតដោយសារតែខ្យល់ព្យុះបោកបក់យ៉ាងខ្លាំង ក្នុងនោះមានផ្ទះប្រជាពលរដ្ឋចំនួន៣ខ្នង នៅភូមិស្វាយព្រៃ ឃុំសណ្តែក និងភូមិត្រពាំងសោ ឃុំទំនប់១ខ្នង បានរបើកដំបូល និងរលំបាក់រាបដល់ដី ដោយឡែកសាឡុំវត្តពុទ្ធមណ្ឌល១ខ្នង ត្រូវបានដើមស្វាយរលំលើ បណ្តាលឱ្យបាក់បែក ខូចខាតទាំងស្រុង ។
មន្ត្រីនគរបាលខេត្តបានបញ្ជាក់ថា នៅស្រុកពញាក្រែកឯណោះវិញ ផ្ទះប្រជាពលរដ្ឋ១ខ្នងរបស់ឈ្មោះសុខ អឿន ភេទប្រុស អាយុ៣៨ឆ្នាំ ធ្វើពីឈើប្រក់ស័ង្កសី ទំហំ៥ម៉ែត្រX៦ម៉ែត្រ នៅភូមិបត់ទន្លា ឃុំកណ្តោលជ្រុំ ត្រូវខ្យល់ព្យុះបំផ្លាញឱ្យរលំខូចទាំងស្រុងផងដែរ ៕
ចែករំលែកព័តមាននេះ