បេសកកម្មសង្កេតការណ៍អ.ស.ប នៅស៊ីរីថ្លែងថាខ្លួនមានការព្រួយបារម្ភយ៉ាងខ្លាំងចំពោះសភាពការណ៍ក្នុងទីក្រុងអាឡែបដោយអះអាងថា ពួកកឧទ្ទាមប្រដាប់អាវុធជាលើកដំបូងមានអាវុធធុនធ្ងន់ក្នុងនោះរួមមានទាំងរថក្រោះផងក្នុងការប្រយុទ្ធនៅទីក្រុងនេះ។ក្នុងសន្និសីទសារព័ត៌មានមួយកាលពីថ្ងៃទី១សីហា អ្នកនាំពាក្យរបស់បេសកកម្មនោះ លោកស្រី SAUSAN GHOSHEH អះអាងប្រាប់ក្រុមអ្នកកាសែតថា ពួកប្រឆាំងពេលនេះមានអាវុធធុនធ្ងន់រួមទាំងរថក្រោះផង ។
លោកស្រី GHOSHEH ថ្លែងថា បេសកកម្មត្រួតពិនិត្យរបស់អ.ស.បមានការព្រួយបារម្ភខ្លាំងចំពោះការប្រយុទ្ធគ្នាយ៉ាងសាហាវបំផុតនៅក្រុងអាឡែប ។ យើងទទួលបានព័ត៌មាននានា ថាមានការប្រើប្រាស់យ៉ាងខ្លាំងនូវអាវុធធុនធ្ងន់ក្នុងនោះរួមមានរថក្រោះកាំភ្លើងធុនធ្ងន់ ព្រមទាំងកាំភ្លើងធំ ។ លោកស្រីបន្តថា កាលពីថ្ងៃទី៣១កក្កដាយើងបានឃើញការបាញ់ប្រហារជាលើកដំបូងចេញពីយន្តហោះប្រដេញមួយគ្រឿង ។ លោកស្រីបញ្ជាក់ថា សភាពការណ៍មនុស្សធម៌នឹងមានភាពយ៉ាប់យ៉ឺននៅក្រុងអាឡែប ព្រោះជនស៊ីវិលមួយចំនួននៅជាប់ក្នុងទីលានប្រយុទ្ធរវាងក្រុមច្បាំងគ្នាទាំង ២ ។ មានប្រជាជនខ្លះរត់ភៀសខ្លួននៅជ្រកនៅតាមសាលារៀន មន្ទីរពេទ្យនិងអគាររដ្ឋទាំងឡាយ ព្រមទាំងក្នុងសង្កាត់ដែលពុំទាន់មានការប្រយុទ្ធគ្នា ។
ការប្រយុទ្ធគ្នាយ៉ាងសាហាវកើតមានកាលពីថ្ងៃទី១ សីហានៅក្រុងអាឡែប រវាងកងទ័ពស៊ីរី គាំទ្រដោយពួកយុទ្ធជនកុលសម្ព័ន្ធនិងពួកឧទ្ទាម ដែលចង់វាយដណ្តើមកាន់កាប់ទីស្នាក់ការរបស់ភ្នាក់ងារស៊ើបការណ៍ហើយត្រួតត្រាទីក្រុងធំទី២ នោះរបស់ស៊ីរី ។
យោងតាមអង្គការ OSDH ស្និទ្ធពួកឧទ្ទាមថា អំពើហិង្សានៅស៊ីរីនាថ្ងៃទី១ សីហា បណ្តាលឱ្យមនុស្សស្លាប់១៣២នាក់ ក្នុងនោះមានជនស៊ីវិល៧៦នាក់ ទាហាន៤៣នាក់ និងពួកឧទ្ទាម១៣នាក់ ។ ប្រមុខពួកឧទ្ទាមនៅក្រុងអាឡែបវរសេនីយ៍ឯកអាប់ដែលចាបា អាល់អូកៃឌី និយាយថាពួកបះបោរនៅទីក្រុងនោះមានកម្លាំងជាច្រើនពាន់នាក់ ហើយប្រភពសន្តិសុខថាមានប្រមាណជា៤.០០០នាក់ ។
ប្រធានាធិបតីស៊ីរីលោកបាចាអាល់អាសាដ ថ្លែងកាលពីថ្ងៃទី១សីហាថាកងទ័ពតស៊ូក្នុងការប្រយុទ្ធតាមព្រេងវាសនាកំណត់ ពីព្រោះពួកសត្រូវបានប្រើប្រាស់បណ្តាសមាសភាពខាងក្នុង ដើម្បីបង្កអស្ថេរភាពដល់ស៊ីរី ។នៅមុខកងទ័ពស៊ីរីនាឱកាសខួបលើកទី៦៧នៃការបង្កើតកងទ័ព លោកអាសាដថ្លែងថា ពួកសត្រូវស៊ីរីបានប្រើប្រាស់បណ្តាភ្នាក់ងារក្នុងប្រទេសធ្វើជាស្ពាន សម្រាប់បំផ្លាញស្ថេរភាពនិងសន្តិសុខរបស់ស៊ីរីហើយបំផ្លាញសក្តានុពលសេដ្ឋកិច្ច និងសមត្ថភាពវិទ្យាសាស្ត្ររបស់យើង ។
របាយការណ៍ចុងក្រោយទាំងឡាយស្តីពីការប្រយុទ្ធនៅក្រុងអាឡែបអះអាងថា ពួកឧទ្ទាមមានមីស៊ីលដី-អាកាសរបស់តួកគី ។
នាយករដ្ឋមន្ត្រីតួកគីថ្លែងនាពេលថ្មីៗនេះថា ប្រជាជនស៊ីរីនឹងត្រូវរំដោះនាពេលឆាប់ៗពីរបបដែលមានដៃប្រឡាក់ឈាម ។
ចំណែកក្រសួងការបរទេសអាមេរិកវិញ ប្រកាសកាលពីថ្ងៃទី១សីហាថា បានផ្តល់ប្រាក់២៥លានដុល្លារឱ្យដល់ពួកឧទ្ទាមស៊ីរី ។ អ្នកនាំពាក្យក្រសួងការបរទេសអាមេរិកលោក PATRICK VENTRELL ថ្លែងថា រដ្ឋការលោកអូបាម៉ា ដំបូងគ្រោងផ្តល់ជំនួយដល់ពួកឧទ្ទាមស៊ីរីត្រឹមតែ១៥លានដុល្លារទេ ក៏ប៉ន្តែជំនួយនេះត្រូវបន្ថែម១០លានដុល្លារទៀត ៕
ចែករំលែកព័តមាននេះ