រាជធានីភ្នំពេញ ៖ កម្ពុជានៅតែមានសក្តានុពលទាក់ទាញវិនិយោគិនជប៉ុនមកបណ្តាក់ទុនរកស៊ី ដើម្បីពង្រីកចរន្តពាណិជ្ជកម្មដដែល បើទោះណាប្រទេសមីយ៉ាន់ម៉ា បានផ្លាស់ប្តូររបបពីការគ្រប់គ្រងដោយរដ្ឋាភិបាលយោធាទៅជាគ្រប់គ្រងដោយរដ្ឋាភិបាលបោះឆ្នោត ហើយបើកទ្វារទទួលពាណិជ្ជករ អ្នកវិនិយោគពីបណ្តាប្រទេសមហាអំណាចសេដ្ឋកិច្ចក៏ដោយ ក៏ក្រុមហ៊ុនធំៗប្រហែល២០របស់ជប៉ុនបានត្រៀមខ្លួនរួចជាស្រេចហើយដែរ ក្នុងការចូលមកបណ្តាក់ទុនរកស៊ីក្នុងប្រទេសកម្ពុជា ។
ការទម្លាយអាថ៌កំបាំងនូវគម្រោងពាណិជ្ជកម្មដ៏ធំរវាងកម្ពុជា-ជប៉ុនបែបនេះ បានកើតឡើង ខណៈលោកយិន ពិសិដ្ឋ អ្នកកាសែតកោះសន្តិភាពត្រូវបានអញ្ជើញដោយស្ថានទូតជប៉ុនប្រចាំនៅកម្ពុជាធ្វើទស្សនកិច្ចស្វែងយល់នៅក្នុងប្រទេសជប៉ុន ហើយត្រូវបានអនុញ្ញាតជួបសំណេះសំណាល និងធ្វើបទសម្ភាសន៍ពិសេសមួយជាមួយលោកហោ មុនីរ័ត្ន ឯកអគ្គរាជទូតកម្ពុជាប្រចាំនៅក្រុងតូក្យូ ប្រទេសជប៉ុន កាលពីពាក់កណ្តាលខែកកក្កដា ២០១២ កន្លងទៅនេះ។
ឯកអគ្គរាជទូតកម្ពុជាប្រចាំនៅប្រទេសជប៉ុនលោកហោ មុនីរ័ត្ន បានមានប្រសាសន៍ថា ខណៈពាណិជ្ជកម្មរវាងកម្ពុជា-ជប៉ុនកំពុងតែមានការឈានឡើងជាលំដាប់នោះ ក្រុមហ៊ុនធំៗរបស់ជប៉ុនប្រមាណ២០បានត្រៀមខ្លួនរួចជាស្រេចហើយក្នុងការចូលមកបណ្តាក់ទុករកស៊ីក្នុងប្រទេសកម្ពុជា ឆាប់ៗនេះ ប្រយោជន៍ពង្រីកពង្រឹងទំនាក់ទំនងទ្វេភាគី និងសហប្រតិបត្តិការសេដ្ឋកិច្ច បន្ទាប់ពីវិនិយោគិនទាំងនោះបានស្វែងយល់អំពីទីផ្សារកម្ពុជាកាលពីឆ្នាំ២០១១ ។ ឯកអគ្គរាជទូតរូបនេះបានឱ្យដឹងថា រដ្ឋាភិបាលជប៉ុន បើទោះណាជួបគ្រោះមហន្តរាយរញ្ជួយដី រលកយក្សស៊ូណាមី ខាតបង់ទ្រព្យសម្បត្តិធំធេងក៏ដោយ ក៏នៅតែរក្សាជំហររឹតចំណងមិត្តភាពរឹងមាំជាមួយកម្ពុជាដដែល ជាពិសេសជំនួយឥតសំណងមកកម្ពុជានៅតែមាន…ប្រាក់កម្ចី អត្រាការប្រាក់ទាបនៅតែមាន ។
ពាក់ព័ន្ធនឹងវិស័យពាណិជ្ជកម្មលោកឯកអគ្គរាជទូត ហោ មុនីរ័ត្ន បានឱ្យដឹងទៀតថា ជប៉ុនបាននាំផលិតផលជាច្រើនប្រភេទចូលទៅក្នុងប្រទេសកម្ពុជា ដូចជារថយន្ត គ្រឿងយន្ត គ្រឿងចក្រ គ្រឿងអេឡិចត្រូនិច សម្ភារប្រើប្រាស់អគ្គិសនី គ្រឿងម្ហូបអាហារជាដើម ដូច្នេះប្រទេសកម្ពុជាជាដង្ហើមសេដ្ឋកិច្ចមួយផងដែររបស់ប្រទេសជប៉ុន ហើយយើងទាំង២ប្រៀបដូចជាសរសៃឈាមត្រូវតែមានការផ្សារភ្ជាប់សេដ្ឋកិច្ចនឹងគ្នា ។ បច្ចុប្បន្នជប៉ុនបានបង្កើតរោងចក្រផលិតខោអាវ ហើយនាំខោអាវពីកម្ពុជាមកលក់នៅជប៉ុន និងបង្កើតផលិតផលជាច្រើនទៀតដូចជា ស្បែកជើង ខោអាវធំ រទេះកូនក្មេងនាំចេញទៅកាន់ទីផ្សារផ្សេងៗ ។ នៅតាមហាងទំនិញខ្លះក្នុងប្រទេសជប៉ុនគេសង្កេតឃើញមានស្រាបៀរកម្ពុជា ទឹកបរិសុទ្ធវីតាល់… ត្រូវបានគេតាំងដាក់លក់ ហើយទោះបីជាមានទំនិញកម្ពុជាតិចតួចយ៉ាងណាក្តីក៏វាគ្រាន់បើជាងអត់ ។
លោកឯកអគ្គរាជទូតបានបន្តថា ថ្មីៗនេះមានក្រុមហ៊ុនជប៉ុនធំលំដាប់ទី២ ខាងផលិតម៉ាស៊ីនតូចៗ និងកូនម៉ាស៊ីនម៉ូទ័រកំពុងដំណើរក្នុងប្រទេសកម្ពុជា ។ កូនម៉ាស៊ីនម៉ូទ័រនោះទៀតសោតត្រូវបានលោកទូតពន្យល់ថា វាជាមេចលនា (ចលករ) នាំឱ្យគ្រឿងអេឡិចត្រូនិចទាំងឡាយដើរ ដូចជា នាឡិកា, ទូរស័ព្ទ, ទូរទស្សន៍, ម៉ាញ៉េ, ម៉ាស៊ីនចាក់ភ្លេង និងរូបភាព (MP3, VCD, DVD) … ពេលនោះផលិតផលអេឡិចត្រូនិចជាច្រើននឹងត្រូវបង្កើតឡើងដោយសំបូរបែបនៅក្នុងប្រទេសកម្ពុជា ។
សូមបញ្ជាក់ថា វិស័យពាណិជ្ជកម្មរវាងកម្ពុជា-ជប៉ុនបានចាប់ផ្តើមមានសន្ទុះចាប់តាំងពីឆ្នាំ១៩៨៦ មកម៉្លេះ ហើយមានកំណើនជាលំដាប់ ខណៈទំនាក់ទំនងការទូតបានឈានមកដល់ខួប៥៥ឆ្នាំ ។ រយៈពេល៤ឆ្នាំ ចុងក្រោយនេះ សភាពការណ៍ទូទៅរវាងកម្ពុជា-ជប៉ុននៅតែមានភាពស៊ីចង្វាក់ល្អនឹងគ្នាដដែល បើពិតមែនមានការផ្លាស់ប្តូរនាយករដ្ឋមន្ត្រីដល់ទៅ៤ដងក៏ដោយ ។ នាយករដ្ឋមន្ត្រីដែលត្រូវបានផ្លាស់ប្តូរ រួមមានលោក Taro Aso, លោក Yukio Hatoyama, លោក Naoto Kan និងលោក Yoshihiko Noda នាយករដ្ឋមន្ត្រីកំពុងកាន់តំណែងបច្ចុប្បន្ន។ បើទោះបីជាគណបក្សណាកាន់អំណាចក៏ដោយ ក៏ការទំនាក់ទំនងល្អរវាងប្រទេសទាំង២នៅតែមានភាពរលូន និងអភិវឌ្ឍន៍ទៅមុខ… ជាពិសេសចាប់តាំងពីឆ្នាំ២០០៩ ដល់២០១២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងព្រះមហាក្សត្រកម្ពុជា បានអញ្ជើញ និងយាងធ្វើទស្សនកិច្ចផ្លូវការ-រដ្ឋនៅប្រទេសជប៉ុន ហើយថ្មីៗនេះ រជ្ជទាយាទជប៉ុន ណារុហ៊ីតូ បានយាងធ្វើទស្សនកិច្ចក្នុងប្រទេសកម្ពុជាជាការឆ្លើយតប និងផ្តល់ភាពកក់ក្តៅទៅវិញទៅមក ដែលជាប្រការមួយរឹងរឹតតែធ្វើឱ្យទំនាក់ទំនងទ្វេភាគី សហប្រតិបត្តិការ សេដ្ឋកិច្ចមានភាពល្អប្រសើរ ។
គួររំលឹកផងដែរថា ជប៉ុន និងបណ្តាប្រទេសជាសមាជិកអាស៊ានបានឯកភាពគ្នា កាលពីថ្ងៃទី២៧ មេសា ២០១២ ថា ពួកគេសន្យា «រៀបចំផែនការ» ដើម្បីបង្កើនសន្ទុះសេដ្ឋកិច្ចឱ្យឈានឡើងនៅក្នុងតំបន់ ខណៈដែលជប៉ុនជាប្រទេសមហាអំណាចសេដ្ឋកិច្ចលំដាប់ទី៣ ក្នុងពិភពលោក ។ ការសម្រេចចិត្តនេះ បានធ្វើឡើងនៅទីក្រុងតូក្យូ ប្រទេសជប៉ុន ខណៈដែលសមាជិកអាស៊ានទាំង១០ប្រទេសចូលរួមប្រជុំថ្នាក់រដ្ឋមន្ត្រីសេដ្ឋកិច្ចនៅក្នុងប្រទេសជប៉ុន ។ គម្រោងផែនការនេះបានធ្វើឡើងដោយមានការឯកភពតាំងពីខែសីហា ឆ្នាំមុនមកម៉្លេះ ដើម្បីឈានសម្រេចគោលដៅដែលពួកគេបានឯកភាពគ្នាតាំងពីដំបូងនោះ ហើយការបង្កើនសន្ទុះពាណិជ្ជកម្មនេះគឺធ្វើឡើងជាប្រព័ន្ធ និងបំពេញចន្លោះខ្វះខាត ដើម្បីឈានរកការអភិវឌ្ឍទាំងអស់គ្នា ។
លោកយូគីយ៉ូ អេដាណូ រដ្ឋមន្ត្រីក្រសួងសេដ្ឋកិច្ចជប៉ុន បានលើកឡើងថា «អាស៊ានជាផលិតកម្មដ៏មានសារសំខាន់ណាស់ សម្របា់ប្រទេសរបស់យើង ហើយទន្ទឹមនឹងនេះដែរ ទីផ្សារមានការរីកចម្រើនច្រើនគួរឱ្យកត់សម្គាល់» ។
គួរបញ្ជាក់ថា ពាណិជ្ជកម្មទ្វេភាគីរវាងកម្ពុជា និងជប៉ុនបានកើនដល់២០៧លានដុល្លារ សម្រាប់ពាក់កណ្តាលឆ្នាំ២០១២ នេះ មានកំណើន៣% បើធៀបនឹងពេលវេលាដូចគ្នាកាលពីឆ្នាំមុនមានចំនួន២០១លានដុល្លារប៉ុណ្ណោះ ។ ចាប់ពីខែមករា ដល់ឧសភា ឆ្នាំ២០១២ នេះ ការនាំចេញរបស់កម្ពុជាទៅកាន់ប្រទេសជប៉ុនមានចំនួន១៣៦លានដុល្លារ ខណៈដែលការនាំចេញរបស់ជប៉ុនចូលមកកាន់កម្ពុជាមានចំនួនតែ៧១លានដុល្លារប៉ុណ្ណោះ ។ ផលិតផលនាំចេញសំខាន់ៗរបស់កម្ពុជារួមមាន សម្លៀកបំពាក់ ស្បែកជើង ស្ករស ត្រី និងគ្រឿងសមុទ្រ ហើយកម្ពុជានាំចូលវិញរួមមាន គ្រឿងចក្រ ទូរស័ព្ទ ទូរទស្សន៍ គ្រឿងអេឡិចត្រូនិច សាច់ចិញ្ចឹម ដែកផ្សេងៗ ដែកថែប និងថ្នាំពេទ្យ។ កាលពីឆ្នាំ២០១១ ទំហំពាណិជ្ជកម្មរវាងប្រទេសទាំង២មានចំនួន៥១៤លានដុល្លារ ហើយសម្រាប់ឆ្នាំ២០១២ នេះ ត្រូវបានគេរំពឹងថា នឹងមានការកើនឡើងថែមទៀត ៕
ចែករំលែកព័តមាននេះ