ខេត្តស្វាយរៀង ៖ ជន២ក្រុមបានដេញវាយនិងកាប់ចាក់គា្ននៅតាមផ្លូវលំមួយស្ថិតក្នុងភូមិធ្មល់ សង្កាត់ចេក ក្រុងស្វាយរៀង កាលពីវេលាម៉ោង៧និង៣០នាទីយប់ថ្ងៃទី៣០ កក្កដា បណ្តាលឱ្យ២នាក់របួសធ្ងន់ចូលមន្ទីរពេទ្យ និង២នាក់ទៀតត្រូវប៉ូលិសចាប់ខ្លួន ។ តាមប្រភពបានឱ្យដឹងថា ជនទាំង២ក្រុមនេះបានប្រើដាវសាមូរ៉ៃ និងកាំបិតដេញកាប់ប្រហារគា្នយ៉ាងសាហាវដោយពុំមានខ្លាចរអាសមត្ថកិច្ចឡើយ ប៉ុន្ដែក្រោយពីកើតហេតុពេលសមត្ថកិច្ចមកសួរនាំ និងរកចាប់ខ្លួន មា្នក់ៗខំប្រឹងឆ្លើយយកត្រូវនិងអះអាងថាខ្លួនជាជនរងគ្រោះត្រូវគេវាយនិងកាប់ទាំងមិនដឹងរឿង ។
យុវជនឈ្មោះចិន សុភ័ក្រ្ត អាយុ២៥ឆាំ្ន មានទីលំនៅក្នុងភូមិខាងលើ ដែលត្រូវគេកាប់២ដាវសាមូរ៉ៃ រយះក្បាល២កន្លែង និងត្រូវដៃខាងឆ្វេងដាច់មេដៃ ហើយបាតដៃដាច់នៅសល់តែស្បែកបន្ដិចនោះនិយាយថា នៅយប់កើតហេតុនោះរូបគេឃើញមិត្ដភក្ដិឈ្មោះអូន និងបក្សពួក២នាក់ទៀត ប្រកែកគា្នជាមួយមនុស្ស២ទៅ៣នាក់ដែលជាអ្នកនៅក្នុងភូមិជាមួយគា្នរឿងហៅ «អា »។ ដោយឃើញការប្រកែកគា្នកាន់តែខ្លាំងឡើងៗរូបគេក៏ចូលទៅឃាត់ ហើយហៅមិត្ដភក្តិ ឈ្មោះអូន និង២នាក់ទៀតនោះឡើងជិះម៉ូតូមកផ្ទះវិញ ដើម្បីកុំឱ្យមានរឿង។
លុះពេលពួកគេទាំង៤នាក់ជិះម៉ូតូ២គ្រឿងចេញពីកន្លែងប្រកែកគា្នមកដល់ចំណុចកើតហេតុខាងលើក៏ត្រូវឈ្មោះ ឌាក់ និងបក្សពួក២នាក់ទៀតជិះម៉ូតូមកពីក្រោយតាមមកស្ទាក់ពីមុខម៉ូតូពួកគេ ហើយដកដាវនិងកាំបិតស្ទុះមកកាប់ប្រហារលើពួកគេតែម្ដង ទើបពួកគេវាយតបទៅវិញបណ្ដាលឱ្យមានរបួសទាំងសងខាង ។ ខណៈនោះឈ្មោះសោម ឆាង អាយុ៣២ឆាំ្ន ដែលជាបងថ្លៃរបស់ឈ្មោះឌាក់ បានទាញដាវសាមូរ៉ៃមកកាប់រូបគេត្រូវក្បាលនិងដៃ២ដាវ បណ្ដាលឱ្យសន្លប់ឈឹងនៅនឹងកន្លែង ពេលដឹងខ្លួនឡើងវិញគឺនៅក្នុងមន្ទីរពេទ្យទៅហើយ។
ប្រភពព័ត៌មានពីបងស្រីរបស់យុវជន ចិន សុភ័ក្រ្ត បានអះអាងថា ក្រោយពីកើតហេតុភ្លាមបងប្អូនរបស់ឈ្មោះសោម ឆាង បានលើកគា្ន៣ទៅ៤នាក់ទៀតដែលក្នុងដៃមានដំបងនិងកាំបិត មកវាយកម្ទេចម៉ូតូប្អូនប្រុសរបស់ខ្លួនធុនសេ១០០ ស៊េរី២០០៨ បណ្ដាលឱ្យខូចខាតទាំងស្រុង ហើយក៏នាំគា្នមករកវាយក្រុមគ្រួសាររបស់ខ្លួនទៀត តែត្រូវបានអ្នកស្រុកស្រែកឆោឡោឡើងក៏ដកថយទៅវិញបាត់អស់ទៅ។ ក្រោយពីកើតហេតុភ្លាម ក្រុមគ្រួសាររបស់យុវជនចិន សុភ័ក្រ្ត ក៏បានប្ដឹងទៅសមត្ថកិច្ចចុះមកដល់កន្លែងកើតហេតុ ប្រមូលយកវត្ថុតាងទាំងអស់ និងធ្វើការឃាត់ខ្លួនយុវជន២នាក់ ដែលជាបក្សពួករបស់ឈ្មោះឌាក់ និង សោម ឆាង នាំយកមកកាន់អធិការដា្ឋននគរបាលក្រុងសា្វយរៀង។
ជនឈ្មោះសោម ឆាង បានអះអាងថា នៅយប់កើតហេតុនោះរូបគេឃើញយុវជនឈ្មោះចិន សុភ័ក្រ្ត និងបក្សពួក៣នាក់ទៀតកំពុងព្រួតវាយប្អូនប្រុសរបស់ខ្លួនទើបគេស្ទុះទៅជួយ ហើយក៏ត្រូវគេកាប់១កាំបិតចំថ្ពាល់ ១កាំបិត បញ្ឆិតគល់កដាច់សរសៃបាញ់ឈាមជោកខ្លួន និង១កាំបិតទៀតត្រូវដៃខាងឆ្វេង បណ្ដាលឱ្យសន្លប់នៅនឹងកន្លែង និងត្រូវបានបងប្អូនក្រុមគ្រួសារនាំយកមកកាន់មន្ទីរពេទ្យ ដើម្បីជួយសង្គ្រោះទាំងយប់។
ទោះជាយ៉ាងណា នេះគ្រាន់តែជាការអះអាងយកត្រូវរបស់ភាគីទាំងសងខាងប៉ុណ្ណោះ ហើយពេលនេះអ្នករបួសទាំង២នាក់កំពុងសម្រាកព្យាបាលនៅក្នុងមន្ទីរពេទ្យខេត្ដតែ១ជាមួយគា្ន តែនៅអគារផ្សេងគា្ន ។ រីឯយុវជន២នាក់ដែលត្រូវចាប់ខ្លួនសមត្ថកិច្ចមិនបានប្រាប់ឱ្យដឹងថាមានឈ្មោះអ្វីខ្លះនោះទេ ចំណែកយុវជន៦ទៅ៧នាក់ផ្សេងទៀតដែលបានចូលរួមនៅក្នុងសកម្មភាពវាយកាប់ចាក់គា្ននេះដែរ សមត្ថកិច្ចកំពុងតែតាមរកចាប់ខ្លួន។
ដោយឡែក រឿងរ៉ាវអ្នកណាខុសអ្នកណាត្រូវ អ្នកណាជាអ្នកបង្ក ហើយដើមហេតុមកពីមូល ហេតុអ្វីនោះក៏នៅមិនទាន់ដឹងច្បាស់នៅឡើយដែរ ដោយសមត្ថកិច្ចប្រាប់ថាកំពុងតែស៊ើបអង្កេតនៅមូលដា្ឋន និងសាកសួរអ្នកពាក់ព័ន្ធក្នុងដំណើររឿងនេះ ៕
ចែករំលែកព័តមាននេះ