រាជធានីភ្នំពេញ ៖ លោកសេង គួណូ អនុប្រធានមន្ទីរអប់រំយុវជន និងកីឡារាជធានីភ្នំពេញបានមានប្រសាសន៍ប្រាប់កោះសន្តិភាពតាមទូរស័ព្ទ កាលពីថ្ងៃទី១ សីហា ថា មានសិស្សថ្នាក់ទី១២ ចំនួនប្រមាណជាង១ម៉ឺននាក់បានដាក់ពាក្យប្រឡងយកសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា២០១១-២០១២ នៅតាមមណ្ឌលចំនួន៣៨មណ្ឌល ចែកចេញជា៨០២បន្ទប់ទូទាំងរាជធានីភ្នំពេញ ។
មន្ត្រីក្រសួងអប់រំយុវជន និងកីឡា បានប្រាប់កោះសន្តិភាព កាលពីថ្ងៃទី១ សីហា ផងដែរថា ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០១១-២០១២នៅទូទាំងប្រទេស គឺមានបេក្ខជនទាំងអស់១១៤.៤១៤នាក់ ក្នុងនោះស្រី៥.១០០នាក់ ។
យោងតាមលោកសំ សេរីរតន៍ ប្រធាននាយកដ្ឋានផែនការនៃក្រសួងអប់រំ យុវជន និងកីឡា ដែលទទួលបន្ទុកកិច្ចការប្រឡងរបស់ក្រសួងអប់រំ យុវជន និងកីឡា បានប្រាប់កោះសន្តិភាពបន្ថែមថា ក្រសួងអប់រំបានបែងចែកជា២៥៤មណ្ឌល និងមាន៤.៦៦២បន្ទប់ ដែលដំណើរការប្រឡងលើវិញ្ញាសាសរសេរមានរយៈពេល៣ថ្ងៃគឺពីថ្ងៃទី៦-៧និង៨ ខែសីហា ឆ្នាំ២០១២ខាងមុខនេះនៅតាមមណ្ឌលនានាទូទាំងប្រទេស ។
មន្ត្រីក្រសួងអប់រំបានប្រាប់កោះសន្តិភាពថា លទ្ធផលនៃការប្រឡងនឹងប្រកាសនៅថ្ងៃទី៣១ ខែសីហា និងថ្ងៃទី១ ខែកញ្ញា ឆ្នាំ២០១២ ។ នៅក្នុងសេចក្តីប្រកាសរបស់ក្រសួងអប់រំយុវជន និងកីឡា ក៏បានអំពាវនាវផងដែរថា ដើម្បីឱ្យលទ្ធផលប្រឡងនេះប្រព្រឹត្តទៅប្រកបដោយភាពត្រឹមត្រូវ យុត្តិធម៌ និងមានប្រសិទ្ធភាព តម្លាភាព សូមមាតា បិតា សិស្សជួយជំរុញកូនចៅឱ្យខិតខំរៀនសូត្រ ដើម្បីទទួលបានលទ្ធផលល្អនៅពេលប្រឡង ៕
ចែករំលែកព័តមាននេះ