ខេត្តព្រៃវែង ៖ បាតុកម្មមួយឈុតរបស់ប្រជាពលរដ្ឋដែលបណ្តេញចៅអធិការវត្តស្តីទីនាមសុខ ដា ឱ្យចេញពីវត្តនាគរង្សី ស្ថិតក្នុងភូមិក្តីដួង ឃុំរោងដំរី ស្រុកបាភ្នំ កាលពីថ្ងៃទី២៧ កក្កដា កន្លងមក គឺបានទទួលជោគជ័យហើយដោយចៅអធិការ រួមនឹងសាមណេរ៣អង្គទៀតបានភៀសខ្លួនចេញពីវត្តនាគរង្សី នាវេលាម៉ោង៨យប់ថ្ងៃដដែលនោះ ដោយសារមិនអាចពន្លត់ភ្លើងកំហឹងរបស់ប្រជាពលរដ្ឋទាំង៧ភូមិបាន ។
ការផ្ទុះអធិករណ៍រហូតលើកគ្នាធ្វើបាតុកម្មបណ្តេញចៅអធិការស្តីទីចេញពីវត្តនេះ ដោយសារប្រជាពលរដ្ឋបានចោទចំនួន៤ចំណុច និងមានសាក្សីជាច្រើននាក់បានឃើញសកម្មភាពប្រាសចាកវិន័យខុសពីពុទ្ធប្បញ្ញត្តិជាហេតុនាំឱ្យដាច់អាបត្តិ ឬបរាជិក ។ តាមប្រភពព័ត៌មានឱ្យដឹងថា សង្ឃទាំង៤អង្គបានភៀសខ្លួនទៅវត្តអង្គព័ន្ធ ហើយត្រូវសមត្ថកិច្ចនាំទៅគង់នៅវត្តសិរីសារពេជ្រ ហៅតាគោក ។
បន្ទាប់ពីសង្ឃទាំង៤អង្គនិមន្តចាកចេញពីវត្តទាំងយប់បាត់ទៅ នៅថ្ងៃទី៣១ កក្កដា ប្រជាពលរដ្ឋក្មេង ចាស់ ប្រុស ស្រី គណៈកម្មការ អាចារ្យវត្ត មេភូមិ មេឃុំ រួមនឹងកម្លាំងសមត្ថកិច្ចផង បានចូលពិនិត្យឆែកឆេរកុដិរកឃើញមានម្សៅគ្រឿងសម្អាងខ្លួនជាច្រើនកំប៉ុង និងស្រោមអនាម័យផង ។ ចំណែកនៅលើសាលាឆាន់មានទ្រុងចិញ្ចឹមមាន់ និងមានមាន់ងាប់ស្អុយ ព្រមទាំងមានឆ្នាំងស្ងោរមាន់ដែលនៅជាប់រោមមាន់នៅឡើយ និងកំប៉ុងស្រាបៀរ ។ ប្រជាពលរដ្ឋដែលរីករាយ ដោយសារការចាកចេញរបស់ចៅអធិការស្តីទីអង្គនេះ បាននាំគ្នាបោសសម្អាតដុតកម្ទេចកម្ទីសេសសល់ពីការប្រើប្រាស់ដែលនៅស្រកេកស្រកាកពេញវត្ត ។
ប្រភពព័ត៌មានពីអាជ្ញាធរ និងប្រជាពលរដ្ឋឱ្យដឹងថា កាលពីថ្ងៃទី៣០ កក្កដា មានការប្រជុំមួយក្នុងវត្តនាគរង្សី ក្នុងគោលបំណង ទី១-ត្រៀមរៀបចំការបោះឆ្នោតជ្រើសរើសអាចារ្យ គណៈកម្មការវត្ត ដែលមានប្រជាពលរដ្ឋចូលរួមជាង១០០នាក់ ទី២-និមន្តព្រះសង្ឃថ្មីមកគង់ក្នុងវត្តនាគរង្សី និងទី៣-បញ្ហាប្រាក់ដែលភិក្ខុ សុខ ដា ឃុបឃិតជាមួយអ្នកលក់គ្រឿងសំណង់ធ្វើដំបូលព្រះវិហារអស់ជិត៣ម៉ឺនដុល្លារ ប្រជាពលរដ្ឋបានបដិសេធមិនទទួលដឹងឮដោយចោទថា ភិក្ខុអង្គនេះយកគ្រឿងសំណង់វត្តទៅធ្វើវីឡារបស់ខ្លួនដែលនៅជាប់វត្តនោះ ។
នៅថ្ងៃទី២សីហា ដែលត្រូវនឹងថ្ងៃ១៥កើតខែទុតិយាសាឍ គឺមានកិច្ចប្រជុំប្រកាសតែងតាំងគណៈកម្មការ អាចារ្យវត្ត និងតែងតាំងព្រះចៅអធិការថ្មីផងដែរ ៕
ចែករំលែកព័តមាននេះ