រាជធានីភ្នំពេញ ៖ លោកខេមរៈ សិរីមន្ត និងនាងសុខ ស្រីនាង បានសម្តែងរួមគ្នាក្នុងខ្សែភាពយន្តថ្មីរឿង«វិញ្ញាណបិសាចជញ្ជក់ ឈាម»ព្រមទាំងរួមជាមួយតារាមកពីហុងកុង និងប្រទេសថៃផងដែរ។លោកឡាយ សុខចំរើន ចាងហ្វាងផលិតកម្ម ឱ្យដឹងថា ផលិតកម្មសាន់ដេ បានផលិតខ្សែភាពយន្តលើកដំបូងនៅឆ្នាំ២០០៣ បន្ទាប់ពីផលិតកម្មនេះទទួលបានជោគជ័យលើការផលិតបទចម្រៀង ។ ខ្សែភាពយន្តទី១ គឺរឿង «អង្គុលី មាល» និងទី២ គឺរឿង«ព្រាយដែកគោល»។
ចំពោះខ្សែភាពយន្តថ្មីរឿង «វិញ្ញាណបិសាចជញ្ជក់ឈាម»ដែលនឹងចាប់ផ្តើមថតនៅខែសីហានេះគឺក្រៅពីចូលរួមសម្តែងដោយលោកខេមរៈ សិរីមន្ត និងនាងសុខ ស្រីនាង ព្រមទាំងតារាចម្រៀងល្បីៗប្រចាំផលិតកម្មសាន់ដេជាច្រើននាក់ទៀត ក៏មានការចូលរួមសម្តែងពីតារាភាពយន្តល្បីនៅហុងកុង និងប្រទេសថៃផងដែរ។
ចាងហ្វាងផលិតកម្មបញ្ជាក់ក្នុងពិធីក្រុងពលីចាប់ផ្តើមថតខ្សែភាពយន្តថ្មីរបស់ខ្លួនកាលពីថ្ងៃទី២៨ កក្កដាថា ផលិតកម្មរបស់លោកចាប់អារម្មណ៍ថតខ្សែភាពយន្តទាក់ទងជំនឿអរូបីខ្មោចព្រាយបិសាច ព្រោះខ្សែភាពយន្តប្រភេទនេះកំពុងពេញនិយមនៅកម្ពុជា ដូច្នេះការផលិតគឺត្រូវបំពេញតម្រូវការរបស់អតិថិជន។
ប្រភពដដែលលើកឡើងថា គោលបំណងផលិតខ្សែភាពយន្តខ្នាតធំនេះមិនគ្រាន់តែស្វែងរកប្រាក់ចំណេញប៉ុណ្ណោះទេ ប៉ុន្តែអ្វីជាចម្បងគឺចង់លើកស្ទួយវិស័យខ្សែភាពយន្តខ្មែរយើង បន្ទាប់ពីប្រឈមនឹងការស្រុតចុះពេលកន្លងមក ។ ដោយសារតែបំណងចង់ឱ្យវិស័យភាពយន្តខ្មែររីកចម្រើនឡើងវិញនេះហើយ ទើបផលិតកម្មចំណាយថវិកាច្រើនក្នុងការថតខ្សែភាពយន្តរឿង «វិញ្ញាណបិសាចជញ្ជក់ឈាម» ដើម្បីឱ្យមានគុណភាពអាចទទួលយកបានសម្រាប់ការប្រកួតប្រជែង ។
លោកចាងហ្វាងផលិតកម្មអះអាងថា ផលិតកម្មគ្រោងចំណាយថវិកាជាងកន្លះលានដុល្លារសម្រាប់ថតខ្សែភាពយន្តថ្មីនេះ ហើយលោករំពឹងថានឹងទទួលបានការគាំទ្រច្រើនពីទស្សនិកជន ព្រោះស្នាដៃទី៣នេះរបស់ផលិតកម្មសាន់ដេនឹងសម្រិតសម្រាំងឱ្យមានគុណភាពខ្ពស់ ។លោកចាងហ្វាងអំពាវនាវដល់ប្រជាពលរដ្ឋខ្មែរឱ្យចូលរួមគាំទ្រសិល្បៈភាពយន្តខ្មែរ រួមទាំងចូលរួមផ្តល់យោបល់លើចំណុចខ្វះខាតដើម្បីជំរុញឱ្យខ្សែភាពយន្តមានការរីកចម្រើនឈានទៅប្រកួតប្រជែងជាមួយខ្សែភាពយន្តបរទេស ។
ទស្សនិកជនកត់សម្គាល់ថា នេះជាលើកទី២ហើយដែលអ្នកចម្រៀងខេមរៈ សិរីមន្ត ចូលរួមសម្តែងក្នុងខ្សែភាពយន្តឱ្យផលិតកម្មរបស់ខ្លួន ។
ទស្សនិកជនមួយចំនួននិយាយថា ក្រៅពីស្តាប់សំនៀងក៏ចង់ឃើញលោកសិរីមន្តសម្តែងផងដែរ តែមួយចំនួនទៀតនិយាយថា ចង់ត្រឹមតែស្តាប់សំនៀងរបស់លោកប៉ុណ្ណោះ មិនចាប់អារម្មណ៍លើការសម្តែងរបស់លោកទេ ព្រោះលោកមិនមែនជាតារាសម្តែង គឺអ្នកចម្រៀង ៕
ចែករំលែកព័តមាននេះ