បន្ទាប់ពីមានការជជែកដេញដោលលើបញ្ហាដែលកៅអីអង្គុយទស្សនានៅសល់ច្រើន អ្នករៀបចំការប្រកួតអូឡាំពិកទីក្រុងឡុង២០១២បានសន្យាថា សំបុត្រមិនទាន់ប្រើរបស់បណ្តាសហព័ន្ធកីឡាអន្តរជាតិនឹងត្រូវដាក់លក់ជាសាធារណៈ ។កាលពីថ្ងៃអាទិត្យ សំបុត្រប្រមាណជា៣ពាន់ច្បាប់ត្រូវបានគេដាក់លក់។ ការបើកលក់សំបុត្រអំឡុងការប្រកួតនេះបានកើតមានឡើងបន្ទាប់ពីមានការបញ្ចេញប្រតិកម្មដោយកំហឹងក្នុងចំណោមមហាជនលើទីលានប្រកួតនានាដែលមានតែអត្តពលិកប្រកួត តែគ្មានអ្នកទស្សនា។
ក្រុមអ្នករៀបចំបានបន្ទោសបញ្ហានេះលើមន្ត្រីអ្នករៀបចំផ្ទាល់និងសមាជិកប្រព័ន្ធផ្សព្វផ្សាយក្នុងការអនុវត្តភារកិច្ច ។ លោកស្រី Jackie Brock-Doyleប្រធានផ្នែកទំនាក់ទំនងរបស់គណៈកម្មាធិការរៀបចំការប្រកួតបានថ្លែងថា ៖«យើងបានជជែកពីបញ្ហានេះជាមួយបណ្តាសហព័ន្ធអន្តរជាតិ ហើយពួកយើងបានព្រមព្រៀងគ្នាលក់ចេញនូវសំបុត្រ៣ពាន់ច្បាប់កាលពីយប់មិញ ។ មកដល់ពេលនេះ សំបុត្រទាំងនោះលក់ដាច់អស់ហើយ ក្នុងចំណោមសំបុត្រទាំងនោះ មានសំបុត្រទស្សនាវិញ្ញាសាកាយសម្ព័ន្ធប្រមាណជា៦រយច្បាប់ ។ ពួកយើងនឹងដោះស្រាយបញ្ហាទៅតាមពេលវេលាជាក់ស្តែងពីមួយថ្ងៃទៅមួយថ្ងៃ »។
នាយករដ្ឋមន្ត្រីអង់គ្លេសជឿថា វាជារឿងដ៏គួរឱ្យអស់សង្ឃឹមដែលមានកៅអីទំនេរច្រើនតាមកន្លែងប្រកួតនានា ។កៅអីទំនេរគ្មានមនុស្សអង្គុយបានធ្វើឱ្យប្រជាជនអង់គ្លេសខឹងយ៉ាងខ្លាំង ដ្បិតនៅមុនការប្រកួតពួកគេមួយចំនួនទិញសំបុត្រមិនបាន៕
ចែករំលែកព័តមាននេះ