ខេត្តពោធិ៍សាត់ ៖ ក្រុមហ៊ុនឡាយហួតត្រេឌីង ដែលបានចុះកិច្ចសន្យាធ្វើវិនិយោគដាំដំណាំកៅស៊ូលើផ្ទៃដីជាង៩០០ហិកតា ស្ថិតនៅភូមិព្រហស្បតិ៍ក្បាល ឃុំផ្ទះរុង ស្រុកភ្នំក្រវាញ ឥឡូវនេះបានត្រូវរាជរដ្ឋាភិបាលបញ្ចប់លែងឱ្យដំណើរការតទៅទៀតហើយ ដោយសារពុំឃើញមានសកម្មភាពអ្វីទាល់តែសោះ ។
លោកទូច សំបូរ អភិបាលស្រុកភ្នំក្រវាញឱ្យដឹងថា ក្រុមហ៊ុនឡាយហួតត្រេឌីង បានចុះកិច្ចសន្យាត្រឹមត្រូវជាមួយរាជរដ្ឋាភិបាលតាំងពីឆ្នាំ២០០៣មកម៉្លេះ ក្នុងការវិនិយោគដាំដំណាំកៅស៊ូលើផ្ទៃដីជាង៩០០ហិកតា ប៉ុន្តែមកដល់ពេលនេះមានរយៈពេលជិត១០ឆ្នាំទៅហើយ ពុំទាន់ឃើញលទ្ធផលចេញជាផ្លែផ្កាអ្វីសោះ មានតែរោងស្នាក់នៅរបស់ក្រុមហ៊ុន និងកូនកៅស៊ូបណ្តុះទុកចោលប៉ុណ្ណោះ ឯដីព្រៃនៅតែព្រៃដដែល ។ លោកអភិបាលស្រុកបន្តទៀតថា មកដល់ពេលនេះគេមិនទាន់ឃើញក្រុមហ៊ុនខាងលើប្រើគ្រឿងចក្រឈូសឆាយដីសម្រាប់ដាំកៅស៊ូនៅឡើយទេ ហើយកូនកៅស៊ូដែលបានបណ្តុះទុកចោលនោះដុះវែងៗកម្ពស់៥ទៅ ៦ម៉ែត្រក្លាយជាព្រៃស៊ុបទ្រុបអស់ទៅហើយ ។ ក្រៅពីនេះ ពុំឃើញមានដំណាំអ្វីក្រៅពីដើមស្វាយ៣-៤ដើម និងស្លឹកគ្រៃប៉ុន្មានគុម្ពប៉ុណ្ណោះ ។ ក្រុមហ៊ុននេះហាក់បីដូចជាពុំមានគម្រោងច្បាស់លាស់ទេ ហើយបើតាមដឹងបម្រុងទុកដីលក់ទៀតផង ប៉ុន្តែស្របពេលអនុសាសន៍ដ៏ថ្លៃថ្លារបស់សម្តេចតេជោ ហ៊ុន សែនឱ្យពិនិត្យសើរើក្រុមហ៊ុនវិនិយោគណាដែលពុំដំណើរការទុកដីឱ្យទំនេរចោលត្រូវដកហូតយកមកវិញ ទើបពេលនេះយើងបញ្ចប់ក្រុមហ៊ុនមួយនេះតែម្តង ។
លោក ខូយ សុខា អភិបាលខេត្តពោធិ៍សាត់ថ្លែងថា ការដកហូតដីរបស់ក្រុមហ៊ុនឡាយហួតត្រេឌីង លែងឱ្យដំណើរការនេះ គឺអនុវត្តតាមអនុសាសន៍សម្តេចតេជោ ដោយសារក្រុមហ៊ុននេះពុំមានសកម្មភាព ។ លោកសូមឱ្យអាជ្ញាធរស្រុក និងសមត្ថកិច្ចឈរជើងនៅទីនោះ បញ្ជាឱ្យម្ចាស់ក្រុមហ៊ុនរុះរើរោង ស្ពាយបង្វេចចេញពីទីតាំងនោះជាបន្ទាន់ ហើយយកដីនេះមកគ្រប់គ្រងវិញ ។
លោកអភិបាលខេត្តបញ្ជាក់ថា សព្វថ្ងៃនេះមានក្រុមហ៊ុនមួយចំនួនទៀតដែលចុះកិច្ចសន្យារួចហើយទុកដីចោលមិនធ្វើវិនិយោគ ហើយត្រូវបានរាជរដ្ឋាភិបាលដកហូតយកមកវិញ ។ ជាក់ស្តែងក្រុមហ៊ុនឡាយហួតត្រេឌីង នេះបានសុំច្បាប់ធ្វើវិនិយោគដំាកៅស៊ូតាំងពីឆ្នាំ ២០០៣ មកម៉្លេះ តែមកដល់ពេលនេះមិនឃើញមានអ្វីសោះដែលចំណាយពេលវេលាឥតប្រយោជន៍ ទើបបញ្ចប់ត្រឹមនេះតែម្តង ដើម្បីទុកឱកាសឱ្យក្រុមហ៊ុនផ្សេងទៀត ៕
ចែករំលែកព័តមាននេះ