រាជធានីភ្នំពេញ ៖ អ្នកឧកញ៉ា វិសេសវិជ្ជាសាស្ត្រាចារ្យវេជ្ជបណ្ឌិត មី សាមឺឌី បានទទួលមរណភាពនៅវេលាម៉ោង១ និង៤៥នាទីរំលងអធ្រាត្រឈានចូលថ្ងៃទី១ សីហា នៅមន្ទីរពេទ្យកាល់ម៉ែត ដោយរោគាពាធក្នុងជន្មាយុ៨៩ឆ្នាំ ។ សពរបស់លោកត្រូវបានគ្រួសារតម្កល់ធ្វើបុណ្យតាមប្រពៃណីព្រះពុទ្ធសាសនានៅគេហដ្ឋានលេខ៥២ ផ្លូវលេខ៣២២ ស្ថិតក្នុងសង្កាត់បឹងកេងកងទី១ ខណ្ឌចំការមន ។
តាមប្រភពព័ត៌មានបានឱ្យដឹងថា សពអ្នកឧកញ៉ា វិសេសវិជ្ជា មី សាមឺឌី នឹងតម្កល់ធ្វើបុណ្យរហូតដល់ថ្ងៃទី១០ សីហា ទើបដង្ហែទៅបូជានៅវត្តស្វាយពពែ ស្ថិតក្នុងសង្កាត់ទន្លេបាសាក់ ខណ្ឌចំការមន ។ តាមការរៀបរាប់ខ្លះៗពីក្រុមគ្រួសារឱ្យដឹងថា អ្នកឧកញ៉ា វិសេសវិជ្ជា មី សាមឺឌី បានធ្លាក់ខ្លួនឈឺធ្ងន់នៅវេលាព្រឹកថ្ងៃទី៣១ កក្កដា ហើយក៏ត្រូវបាននាំទៅព្យាបាលបន្ទាន់នៅមន្ទីរពេទ្យកាល់ម៉ែត និងទទួលបានការព្យាបាលយ៉ាងយកចិត្តទុកពីលោកវេជ្ជបណ្ឌិតនៃមន្ទីរពេទ្យ តែដោយសារសភាពធ្ងន់នៃជំងឺរបស់លោកមិនអាចជួយសង្គ្រោះជីវិតរបស់លោកបាន ទើបនៅវេលារំលងអធ្រាត្រឈានចូលថ្ងៃទី១ សីហា លោកក៏បានទទួលមរណភាព ។ តាមប្រភពដដែលឱ្យដឹងថា មុនពេលលោកធ្លាក់ខ្លួនឈឺធ្ងន់នេះ លោកធ្លាប់ទៅព្យាបាលជំងឺនៅប្រទេសបារាំងផងដែរ ។
អ្នកឧកញ៉ា វិសេសវិជ្ជា សាស្ត្រាចារ្យវេជ្ជបណ្ឌិត មី សាមឺឌី គឺជាមន្ត្រីជើងចាស់មួយរូបដែលបានឆ្លងផុតរបបប្រល័យពូជសាសន៍ប៉ុល ពត និងបានចូលរួមចំណែកក្នុងការកសាងប្រទេសឡើងវិញ ពីបាតដៃទទេនាឆ្នាំ១៩៧៩ ។ លោកបានទទួលមុខតំណែងក្នុងក្រសួងសុខាភិបាល កាកបាទក្រហម និងគណៈកម្មាធិការអូឡាំពិកកម្ពុជាផងដែរ ។ គុណបំណាច់របស់លោកពិតជាធំធេងណាស់ក្នុងប្រវត្តិការងាររបស់លោក ៕
ចែករំលែកព័តមាននេះ