ខេត្តស្វាយរៀង ៖ កម្មករស្រី-ប្រុសចំនួន២៧នាក់ក្នុងនោះប្រុសមា្នក់ ត្រូវបានគេដឹកបញ្ជូនទៅកាន់មន្ទីរពេទ្យខេត្ដទាំងយប់ដើម្បីជួយសង្គ្រោះ បន្ទាប់ពីបានជួបហេតុការណ៍គ្រោះថា្នក់ចរាចរណ៍ដ៏គួរឱ្យរន្ធត់មួយបានកើតឡើងនៅលើកំណាត់ផ្លូវជាតិលេខ១ត្រង់ចំណុចខាងលិចខ្លោងទា្វរចូលតំបន់សេដ្ឋកិច្ចពិសេសតាយសេងចំងាយ២០ម៉ែត្រ ស្ថិតក្នុងភូមិតាបឹប សង្កាត់បាវិត ក្រុងបាវិត។
ហេតុការណ៍នេះបង្កឱ្យកម្មកររងរបួសធ្ងន់ចំនួន៨នាក់ និងរងរបួសស្រាលចំនួន១៩នាក់ ដែលកម្មករទាំងអស់នេះអ្នកខ្លះធ្វើការនៅក្នុងរោងចក្រស្ថិតនៅក្នុងតំបន់សេដ្ឋកិច្ចពិសេសមេនហាតធេន និងមួយចំនួនទៀតធ្វើការនៅក្នុងរោងចក្រក្នុងតំបន់សេដ្ឋកិច្ចពិសេសតាយសេងហើយកម្មករទាំងអស់នេះភាគច្រើនមានទីលំនៅក្នុងក្រុងសា្វយរៀង។ តាមការរៀបរាប់របស់កម្មករម្នាក់ឈ្មោះស្រី សុភាព អាយុ៣៣ឆាំ្ន ធ្វើការនៅក្នុងរោងចក្របេសវ៉េក្នុងតំបន់សេដ្ឋកិច្ចពិសេសមេនហាតធេន បានឱ្យដឹងថា នៅមុនពេលកើតហេតុនោះរថយន្ដកូរ៉េមួយតោនកន្លះដែលធ្លាប់ដឹកពួកគេចេញពីរោងចក្រត្រឡប់ទៅផ្ទះវិញជារៀងរាល់ថ្ងៃបានមកដឹកពួកគេប្រមាណជាង៤០នាក់ចេញពីមុខរោងចក្រឡើងទៅលើថ្នល់ជាតិលេខ១ ហើយក៏បើកទៅដឹកកម្មករមួយចំនួនទៀត ដែលធ្វើការក្នុងរោងចក្រក្នុងតំបន់សេដ្ឋកិច្ចពិសេសតាយសេងទៀត។ ខណៈទៅដល់មុខខ្លោងទា្វររថយន្ដបានបើកបង្ហួសទៅខាងលិចចំងាយប្រមាណជា២០ម៉ែត្រ ស្រាប់តែកង់រថយន្ដចំហៀងខាងស្ដាំធ្លាក់ចុះពីលើថ្នល់ ផ្អៀងរថយន្ដមួយចំហៀងហើយក៏ទាញទ្រុងរថយន្ដទាំងមូលផ្នែកខាងក្រោយបាក់ដាច់ចេញពីតួរថយន្ដ ចាក់កម្មករទាំងអស់ទៅលើដីសង្កត់ពីលើគា្នសន្លប់រដូករណែលតែម្ដង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ