ខេត្តកំពង់ចាម ៖ សមាគមនិស្សិតមូស្ល៊ីមកម្ពុជាកាលពីថ្ងៃទី៣០ កក្កដា ២០១២បាននាំយកអំណោយរបស់អង្គការមូស្ល៊ីមហេលហ្វិន (Muslime Helfen) នៃប្រទេសអាល្លឺម៉ង់ទៅចែកជូនប្រជាពលរដ្ឋខ្មែរអ៊ិស្លាមក្រីក្រ ចាស់ជរាចំនួន៥៨០គ្រួសារនៅស្រុកកងមាស និងស្រុកពញាក្រែក ដោយមានការអញ្ជើញចុះចែកផ្ទាល់ដៃពីសំណាក់លោកវេជ្ជបណ្ឌិត សុះ មុះសិន រដ្ឋលេខាធិការក្រសួងធម្មការ និងសាសនា ជាប្រធានសមាគមនិស្សិតមូស្ល៉ីមកម្ពុជា ព្រមទាំងមានការចូលរួមពីលោកសាន់ សាប់អីុ អនុរដ្ឋលេខាធិការក្រសួងសុខាភិបាលជាអនុប្រធានសមាគម, លោកម៉ាន សុគ្រី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោកពាស់ មូស្ល៊ីម អនុប្រធានសមាគមនិស្សិតមូស្ល៊ីមកម្ពុជា ។
ការនាំអំណោយចែកជូនប្រជាពលរដ្ឋខ្មែរអ៊ិស្លាមនេះពេលព្រឹកចែកជូនដល់ប្រជាពលរដ្ឋខ្មែរអ៊ិស្លាមចំនួន២៨០គ្រួសារនៅឃុំនគរបាន និងឃុំរកាគយ ក្នុងស្រុកកងមាស និងពេលល្ងាចចែកជូនដល់ប្រជាពលរដ្ឋចំនួន៣០០គ្រួសារនៅឃុំដា ស្រុកមេមត់ និងឃុំជីមាន់ ស្រុកពញាក្រែក ខេត្តកំពង់ចាម ។ លោកវេជ្ជបណ្ឌិត សុះ មុះសិន បានឱ្យដឹងថា អំណោយដែលនាំមកចែកជូនដល់ប្រជាពលរដ្ឋខ្មែរអ៊ិស្លាមក្រីក្រនាឱកាសនេះជាអំណោយរបស់អង្គការមូស្ល៊ីម ហេលហ្វិន ( MuslimeHelfen) នៃប្រទេសអាល្លឺម៉ង់ដែលផ្តល់តាមរយៈសមាគមនិស្សិតមូស្ល៊ីមកម្ពុជាដែលក្នុង១គ្រួសារទទួលបាន អង្ករ១៨គីឡូក្រាម, មីចំនួន១៥កញ្ចប់, ស្ករស៤គីឡូក្រាម, ត្រីខ៥កំប៉ុង, ទឹកស៊ីរ៉ូ២ដប, អូវ៉ាន់ទីន២ដប, ទឹកដោះគោ២កំប៉ុង, តែ៤កញ្ចប់ និងអំបិល២គីឡូក្រាម។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ