យោងតាមប្រភពគេហទំព័រទេសចរណ៍ TripAdvisor បានបង្ហាញថា នៅលើពិភពលោកមានតំបន់ទេសចរណ៍១៦កន្លែងដែលទាក់ទាញចំណាប់អារម្មណ៍អ្នកទេសចរជាងគេបំផុតក្នុងអំឡុងឆ្នាំចុងក្រោយនេះ ក្នុងនោះតំបន់មួយចំនួនទាក់ទាញភ្ញៀវទេសចរដោយសារសោភ័ណភាពពីធម្មជាតិ និងតំបន់ខ្លះទៀតមានការតុបតែងលម្អដោយស្ថាបត្យករ ។
គេហទំព័រដដែលបានបង្ហាញឱ្យដឹងពីតំបន់ទេសចរណ៍មួយចំនួនយើងមិនចាំបាច់ចំណាយថវិកាច្រើនផងដែរ នៅពេលដែលយើងដឹងពីទំនៀមទម្លាប់របស់ពួកគេ ប៉ុន្តែយើងកុំយល់ច្រឡំថា ភាពទាក់ទាញទាំងអស់សុទ្ធតែជាតំបន់ទេសចរណ៍ ជួនកាលទីក្រុងមួយក៏អ្វីមួយមានភាពទាក់ទាញដែរដូចជា Skytrain នៅទីក្រុងបាងកក ប្រទេសថៃ និងការជិះរថភ្លើងក្នុងទីក្រុង Melbourne ប្រទេសអូស្ត្រាលី ជាដើម ។
ខាងក្រោមនេះជាតំបន់ដែលទាក់ទាញទាំង១៦ដែលគេហទំព័រ TripAdvisor លើកយកមកបង្ហាញ ៖
១- តំបន់ Table Mountain ស្ថិតនៅទីក្រុង Cape Town ប្រទេសអាហ្វ្រិកខាងត្បូង ។ អ្វីដែលអ្នកធ្វើដំណើរទៅទីនោះនិយាយស្ទើរគ្រប់មាត់នោះគឺ «ការធ្វើដំណើរតាមកន្ត្រកយោងដែលមានល្បឿនសន្សឹមៗឡើងលើកំពូលភ្នំ អាចឱ្យយើងមើលឃើញទេសភាពនៃទីក្រុងទាំងមូលបាន៣៦០ដឺក្រេ »។
២- សួនច្បារ Majorelle ស្ថិតនៅទីក្រុង Marrakech ប្រទេសម៉ារ៉ុក ។ អ្វីដែលអ្នកដំណើរទៅកាន់ទីនោះតែងតែនិយាយគឺ «សម្រស់ដ៏ផូរផង់នៃពណ៌កូនរុក្ខជាតិ និងពណ៌អគារនៅទីនោះពិតជាអស្ចារ្យណាស់ »។ សួនច្បារនេះត្រូវបានរចនាដោយវិចិត្រករជនជាតិបារាំងឈ្មោះ Jacques Majorelle នៅក្នុងឆ្នាំ ១៩២០ដល់ឆ្នាំ១៩៣០ ក្នុងអំឡុងពេលដែលប្រទេសម៉ារ៉ុក ស្ថិតក្រោមអាណានិគមបារាំងត្រួតត្រា ។
៣- រថភ្លើងលើអាកាស (Skytrain) នៅទីក្រុងបាងកក ប្រទេសថៃ ។ អ្វីដែលអ្នកធ្វើដំណើរនិយាយពីទីនោះគឺ «ងាយស្រួលក្នុងការធ្វើដំណើរ និងត្រជាក់ស្រស់ស្រាយ ។ យើងអាចជិះរថភ្លើងលើអាកាសទៅកាន់តំបន់គួរឱ្យចាប់អារម្មណ៍ជាច្រើនកន្លែងនៅក្នុងទីក្រុងបាងកក ដូចជា ផ្សារចុងសប្តាហ៍ Chatuchak , ភូមិគ្រឹះJim Thompson, Siam Paragon និងកន្លែងជាច្រើនទៀត ។ ជាងនោះទៅទៀត ពេលវេលាដែលមមាញឹកនោះ គឺបណ្តាវិថីទាំងអស់ពិតជាស្ទះចរាចរណ៍ ដូច្នេះការជិះរថភ្លើងលើអាកាសជាជម្រើសដ៏ល្អបំផុតសម្រាប់អ្នក »។
៤- កំពូលភ្នំ Victoria នៅទីក្រុងហុងកុង ប្រទេសចិន ។ អ្វីដែលអ្នកដំណើរនិយាយពីកន្លែងនោះគឺ «ជាកន្លែងដ៏វិសេសវិសាលមួយក្នុងការទស្សនា និងស្នាក់អាស្រ័យនៅតំបន់ជាយក្រុងប្រកបដោយទេសភាពស្រស់ឆើយឆាយអមដោយជំនោរត្រជាក់ »។
៥- រូងល្អាងទឹក Vitalino Reyes នៅទីក្រុងប៊ីលី (Belize ) អាមេរិកកណ្តាល ។ អ្វីដែលអ្នកដំណើរនិយាយពីទីនោះគឺ «ការធ្វើដំណើរកម្សាន្តទៅកាន់រូងនោះពិតជាអស្ចារ្យ និងគួរឱ្យរំភើបណាស់។ ការធ្វើដំណើរឆ្លងកាត់ព្រៃស្រោងគឺជារឿងរំភើប ខណៈដែលយើងអាចស្វែងយល់បានច្រើនពីរុក្ខជាតិ និងសត្វចម្លែកៗដែលរស់នៅក្នុងនោះ »។
៦- ព្រែកជីក Panama ស្ថិតនៅទីក្រុង ប៉ាណាម៉ា ប្រទេសប៉ាណាម៉ា ។ អ្នកដំណើរបាននិយាយថា «ប្រវត្តិសាស្ត្រ និងវិស្វកម្ម គឺជាទស្សនវិស័យនៃការស្ថាបនាព្រែក ដែលមិនអាចខ្វះបានសម្រាប់ទីក្រុងប៉ាណាម៉ា »។
ព្រែកជីក Panama ស្ថាបនាឡើងក្នុងឆ្នាំ១៨៨១ និងរួចរាល់នៅឆ្នាំ១៩១៤ មានប្រវែង៨២គីឡូម៉ែត្រ ជាចំណុចភ្ជាប់គ្នារវាងមហាសមុទ្រអាត្លង់ទិក និងមហាសមុទ្រប៉ាស៊ីហ្វ៊ិក ។
៧- Tour Eiffel ស្ថិតនៅទីក្រុងប៉ារីស ប្រទេសបារាំង ។ នៅពេលដែលអ្នកដំណើរបានទៅកម្សាន្តនៅទីនោះតែងនិយាយថា «ខ្ញុំនឹងមិនភ្លេចនូវអ្វីដែលខ្ញុំមើលឃើញទេសភាពពីលើកំពូលTour Eiffel ឡើយ »។ Tour Eiffel មានកម្ពស់ ៣២៤ម៉ែត្រ ចាប់ផ្តើមស្ថាបនាឡើងនៅថ្ងៃទី២៨ ខែមករា ឆ្នាំ១៨៨៧ និងរួចរាល់នៅឆ្នាំ១៨៨៩ និងស្ថាបនាដោយក្រុមហ៊ុន Gustave Eiffel ។
៨- ទីក្រុងប៉ារីស ប្រទេសបារាំង នៅពេលអ្នកដំណើរឈានជើងដល់ទីក្រុងប៉ារីស តែងលាន់មាត់ស្ងើចសរសើរថា «អគារនៅទីនោះពិតជាអស្ចារ្យ, ការតាំងពិព័រណ៍ប្លែកៗអមដោយភ្លើងពណ៌ស្រស់ឆើតឆាយ ធ្វើឱ្យពួកគេស្រឡាំងកាំងស្មារតីជាមួយទេពកោសល្យនៃការតុបតែង លម្អ »។
៩- ទឹកផុសនៅឌូបៃ នៅទីក្រុងឌូបៃ ប្រទេសអេមីរ៉ាតអារ៉ាប់រួម ។ អ្វីដែលអ្នកដំណើរបាននិយាយនោះគឺ «ការរចនាទឹកផុសនៅទីនោះពិតជាអស្ចារ្យណាស់ ។ ជាងនេះទៅទៀត យើងអាចអង្គុយក្នុងភោជនីយដ្ឋានមួយ ហើយអាចមើលឃើញទឹកផុសនោះរេរាំតាមចង្វាក់ភ្លេងយ៉ាងល្វតល្វន់ទៀតផង »។
១០- អគារ Burj Khalifa នៅទីក្រុងឌូបៃ ប្រទេសអេមីរ៉ាតអារ៉ាប់រួម ។ អ្វីដែលអ្នកដំណើរនិយាយគឺ «ខ្ញុំពិតជាដក់ចិត្តស្រឡាញ់អគារនេះយ៉ាងខ្លាំង ។ ទិដ្ឋភាពនៃអគារដែលមាន១២៤ជាន់ ពិតជាគួរឱ្យស្ងើប ! » ។ អគារ Burj Khalifa មានកម្ពស់៨២៨ម៉ែត្រ និងចាប់ផ្តើមស្ថាបនានៅថ្ងៃទី២១ ខែកញ្ញា ឆ្នាំ២០០៤ និងសម្ពោធដាក់ឱ្យដំណើរការនៅថ្ងៃទី៤ ខែមករា ឆ្នាំ២០១០ ហើយក៏ជាអគារដែលខ្ពស់ជាងគេបំផុតនៅលើលោកផងដែរ ។
១១- ទឹកផុសនៅ Bellagio នៅទីក្រុង ឡាស់វេហ្កាស រដ្ឋនីវ៉ាដា (Nevada) សហរដ្ឋអាមេរិក ។ អ្វីដែលអ្នកដំណើរតែងតែនិយាយគឺ «ការរចនាពន្លឺភ្លើងចែងចាំងដូចឋានសួគ៌ធ្វើឱ្យខ្ញុំរំភើបស្ទើស្រក់ទឹកភ្នែក ។ ខ្ញុំសែនរីករាយពេលបានឃើញទឹកបាញ់រេរាំតាមចង្វាក់ភ្លេង មុនពេលខ្ញុំចាកចេញទី Las Vegas »។
១២- សួនឧទ្យាន Central Park នៅទីក្រុងញូវយ៉ក សហរដ្ឋអាមេរិក ។ អ្វីដែលពួកគេនិយាយគឺ «រតនសម្បត្តិរបស់ទីក្រុងញូវយ៉ក !ជាទីកន្លែងដ៏ស្រស់ត្រកាលដែលយើងអាចសម្រាកលំហែកាយនៅកណ្តាលទីក្រុង » ។
១៣-កំពូលភ្នំ Sugar Loaf ឬ Pao de Acucar ស្ថិតនៅរដ្ឋ Rio de Janeiro ប្រទេសប្រេស៊ីល ។ អ្វីដែលអ្នកដំណើរនិយាយពីទីនោះគឺ « ពេលថ្ងៃពោរពេញដោយពពក ពិតជាស្រស់ស្អាត ដូចដែលយើងនៅលើពពកអ៊ីចឹង »។
១៤- ទីបញ្ចុះសព Recoleta Cemetery នៅរដ្ឋ Buenos Aires ប្រទេសអាហ្សង់ទីន ។ អ្វីដែលពួកគេនិយាយគឺ «បានទៅទស្សនានៅទីបញ្ចុះសពនេះមុន អាចនិយាយបានថាជាកន្លែងដ៏អស្ចារ្យបំផុត។ អ្នកអាចមើលឃើញពីរចនាបថផ្នូរវីរជនល្បីៗ មានលក្ខណៈខុសៗគ្នាដែលជាស្នាដៃល្អឥតខ្ចោះរបស់ស្ថាបត្យករ ហើយជាកន្លែងស្ងប់ស្ងាត់ពេលដែលយើងដើរឆ្លងកាត់ផ្នូរទាំងនោះ »។
១៥- កំពង់ផែ Sydney នៅទីក្រុងស៊ីដនី ប្រទេសអូស្ត្រាលី ។ អ្វីដែលអ្នកដំណើរតែងតែនិយាយពីទីនោះគឺ «ជាកន្លែងមួយដែលស្អាតជាងគេបំផុត លាយបញ្ចូលគ្នាដោយសម្រស់ធម្មជាតិ និងស្ថាបត្យកម្មដ៏អស្ចារ្យគ្មានពីរ »។
១៦- រថភ្លើងធ្វើដំណើរជុំវិញក្រុង (City Circle Tram) នៅទីក្រុងមែលប៊ន ប្រទេសអូស្ត្រាលី ។ អ្វីដែលពួកគេនិយាយពីទីនោះគឺ
«ជិះរថភ្លើងពេញមួយថ្ងៃអត់គិតលុយ ។ យើងអាចជិះរថភ្លើងនេះទៅកាន់តំបន់បង្កាត់ពូជពពួកមចា, សារមន្ទីរ, តំបន់ស្រាវជ្រាវជីវចម្រុះ, សួនឧទ្យាននានា និងផ្សារ Queen Victoria និងតំបន់ផ្សេងៗទៀត »៕
ចែករំលែកព័តមាននេះ