រាជធានីភ្នំពេញ ៖ រង្វង់មូលផ្សារដើមថ្កូវដែលមានរូបសំណាកនាងមច្ឆាហែលទឹក លុះពេលស្រវឹងបុរសម្នាក់បើករថយន្តមកដល់មើលអត់ឃើញរង្វង់មូលស្មានតែគេលើកយកទៅណាបាត់ហើយជិះទៅបុកខឿនរង្វង់មូលពេញទំហឹង បណ្តាលឱ្យបែកខឿនបន្តិចហើយរថយន្តខូចខាតផ្នែកខាងមុខស្ទើរទាំងស្រុង។ ហេតុការណ៍នេះកើតឡើង កាលពីវេលាម៉ោង៨និង៣០នាទីយប់ថ្ងៃទី៣១ កក្កដា មុខសាលាសង្កាត់ផ្សារដើមថ្កូវ ត្រង់ផ្លូវបំបែកជា៥ ស្ថិតក្នុងសង្កាត់ផ្សារដើមថ្កូវ ខណ្ឌចំការមន ។
ហេតុការណ៍នោះមិនបណ្តាលឱ្យនរណាម្នាក់រងរបួសទេ គ្រាន់តែបែកខឿនរង្វង់មូលបន្តិចចំណែករថយន្តខូចខាតផ្នែកខាងមុខស្ទើរទាំងស្រុង និងបែកធុងទឹក ។ បន្ទាប់ពីបុកហើយរថយន្តបានដាក់លេខថយក្រោយបើកឆ្ពោះទៅផ្លូវលេខ២៧១ ទៅដល់មុខផ្ទះ ហេងលី ដេប៉ូលក់ដែកគ្រប់ប្រភេទត្រូវប៉ូលិសដេញឃាត់សាកសួរបន្តិច ស្រាប់តែឃើញរថយន្តនោះបើកចេញទៅបាត់ស្រមោលទាំងរថយន្តបែកធុងទឹកហូរតាមផ្លូវ ។
អ្នកឃើញហេតុការណ៍បាននាំ គ្នានិយាយថា នៅរង្វង់មូលនោះតែងតែមានប៉ូលិស និងប្រជាពលរដ្ឋនាំគ្នាទៅអង្គុយលេង សំណាងល្អហើយពេលដែលរថយន្តបើកបុករង្វង់មូលនោះប្រជាពលរដ្ឋ ទើបតែនាំគ្នាដើរចេញទៅផ្ទះរៀងខ្លួន កុំអីមិនដឹងជាយ៉ាងណាទេ ។ ចំណែកការខូចខាតខឿនរង្វង់មូលនោះ ក៏មិនទាន់ដឹងថា សមត្ថកិច្ចដោះស្រាយរបៀបណាជាមួយរថយន្តបង្កនោះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ