ខេត្តកំពត ៖ ប្រភពព័ត៌មានច្បាស់ការណ៍មួយឱ្យដឹងថា សកម្មភាពកាប់បំផ្លាញព្រៃឈើពីសំណាក់ពលរដ្ឋដែលដឹកដោយរទេះគោក្របីចូលកាប់ឈើខុសច្បាប់នៅក្នុងព្រៃតំបន់តាកែនកោះស្លា ស្រុកឈូក យ៉ាងអនាធិបតេយ្យគេពុំឃើញមន្ត្រីជំនាញរដ្ឋបាលព្រៃឈើដែលគ្រប់គ្រងក្នុងតំបន់នោះចេញទៅបង្ក្រាបឡើយ ។
ប្រភពបានអះអាងបន្តទៀតថា តំបន់ដែលពលរដ្ឋកំពុងធ្វើសកម្មភាពកាប់និងដឹកជញ្ជូនឈើ គេសង្កេតឃើញមានកម្លាំងសមត្ថកិច្ចចម្រុះមួយក្រុមកំពុងធ្វើសកម្មភាពឃុបឃិតយកប្រាក់ពីពលរដ្ឋដែលដឹកឈើចេញពីតំបន់នោះ ដោយកំណត់បង់ប្រាក់ក្នុងមួយរទេះ២ទៅ៣ម៉ឺុនរៀល តាមដឹកតិច និងច្រើនហើយបើអ្នកដឹកឈើទាំងនោះតវ៉ា ឬសុំចុះតម្លៃពួកគេនឹងចាប់រទេះដឹកឈើបញ្ជូនទៅឱ្យមន្ត្រីជំនាញរដ្ឋបាលព្រៃឈើ។ ក្រុមចម្រុះដែលឈរជើងចាំឃាត់រទេះគោដឹកឈើយកប្រាក់នោះមាននគរបាលប៉ុស្តិ៍ឃុំតាកែន ទាហានឌឺបេខេត្ត និងអង្គការអភិរក្សឃ្លាំមើលប្រជាពលរដ្ឋនៅកម្ពុជាដឹកនាំដោយលោកតឹក សែន ។
ទាក់ទិននឹងករណីនេះដែរ កោះសន្តិភាពបានទូរស័ព្ទទៅលោកតុង សែ នាយផ្នែករដ្ឋបាលព្រៃឈើស្រុកឈូក ដើម្បីសុំការបំភ្លឺជុំវិញករណីខាងលើ ប៉ុន្តែទូរស័ព្ទរបស់លោកត្រូវបិទមិនអាចទទួលការហៅចូលបានទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ