ក្រុងប៉ោយប៉ែត ៖ មន្ត្រីយោធាវិស្វកម្មម្នាក់ជួបគ្រោះអកុសលត្រូវរថយន្តនីស្សាន់បើកបុកពីក្រោយបណ្តាលឱ្យស្លាប់ភ្លាមៗ ខណៈពេលកំពុងបណ្តើរម៉ូតូលើផ្លូវលេខ៥៩ ស្ថិតក្នុងភូមិរស្មីសាមគ្គី សង្កាត់និមិត្ត ក្រុងប៉ោយប៉ែត កាលពីវេលាម៉ោង៩និង៣០នាទីយប់ថ្ងៃទី២៩ កក្កដា ។ ក្រោយពេលកើតហេតុ អ្នកបើកបររថយន្តបានបើករត់ដោយយករថយន្តទៅលាក់ទុកក្នុងផ្ទះ ប៉ុន្តែសមត្ថកិច្ចស្រាវជ្រាវរកឃើញក្របួចបានទាំងរថយន្តនិងម្ចាស់ បញ្ជូនទៅស្នងការដ្ឋាននគរបាលខេត្តដើម្បីចាត់ការតាមផ្លូវច្បាប់ ។
មន្ត្រីយោធាដែលរងគ្រោះឈ្មោះ ចេប គ្រៀត អាយុ៣១ឆ្នាំ មានទីលំនៅភូមិអូរស្អំ ឃុំអូរសំព័រ ស្រុកម៉ាឡៃ ជាមន្ត្រីយោធាវិស្វកម្មប្រចាំនៅកងពលតូចថ្មើរជើងលេខ៥១ ។ រថយន្តបង្កហេតុម៉ាកនីស្សាន់មួយបាំងកន្លះ ពណ៌ខ្មៅលាយស ចង្កូតស្តាំ បើកបរដោយបុរសឈ្មោះសួ លឹមខុន អាយុ៤៦ឆ្នាំ មានទីលំនៅភូមិបន្ទាយទី១ ឃុំទួលពង្រ ស្រុកម៉ាឡៃ ។
តាមប្រភពព័ត៌មានពីកន្លែងកើតហេតុឱ្យដឹងថា មន្ត្រីយោធារងគ្រោះបានជិះម៉ូតូមួយគ្រឿងពីជើងទៅត្បូង លុះដល់ចំណុចកើតហេតុម៉ូតូអស់សាំង ហើយក៏ចុះបណ្តើរទាំងយប់ងងឹតខណៈនោះមានរថយន្តម៉ាកនីស្សាន់ខាងលើបើកបរស្របទិសគ្នាទៅបុកពីក្រោយបណ្តលឱ្យមន្ត្រីយោធានោះស្លាប់តែម្តង ភ្លាមៗរថយន្តបានបន្ថែមល្បឿនបើករត់ ។ ប៉ូលិសជំនាញចរាចរណ៍ក្រុងប៉ោយប៉ែតនិយាយថា រថយន្តខាងលើក្រោយបុកជនរងគ្រោះបានបើកគេចទៅបាត់បន្សល់ទុកសព និងម៉ូតូសេ១១០ នៅកន្លែងកើតហេតុ លុះព្រឹកឡើងទើបរកឃើញសាច់ញាតិសព ។
ដោយមានកិច្ចសហការបានល្អជាមួយប៉ូលិសស្រុកម៉ាឡៃក៏ស្រាវជ្រាវរកឃើញរថយន្តបង្កហេតុលាក់ទុកក្នុងផ្ទះ ហើយសមត្ថកិច្ចឃាត់ទាំងរថយន្ត និងអ្នកបើកបរបញ្ជូនទៅកាន់ស្នងការដ្ឋានខេត្ត ដើម្បីចាត់ការតាមផ្លូវច្បាប់ ឯសពមន្ត្រីយោធាត្រូវសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ