ខេត្តពោធិ៍សាត់ ៖ ក្រុមហ៊ុនឡាយហួតត្រេឌីងដែលបានចុះកិច្ចសន្យាធ្វើវិនិយោគដាំដំណាំកៅស៊ូលើផ្ទៃដីជាង៩០០ហិកតា មានទីតាំងស្ថិតនៅភូមិព្រហស្បត្តិក្បាល ឃុំផ្ទះរុង ស្រុកភ្នំក្រវាញ ឥឡូវនេះត្រូវរាជរដ្ឋាភិបាលបញ្ចប់លែងឱ្យដំណើរការតទៅទៀតហើយដោយសារពុំឃើញមានសកម្មភាពអ្វីទាល់តែសោះ ។
លោកទូច សំបូរ អភិបាលស្រុកភ្នំក្រវាញ ឱ្យដឹងថា ក្រុមហ៊ុនឡាយហួតត្រេឌីងនេះបានចុះកុងត្រាត្រឹមត្រូវជាមួយរាជរដ្ឋាភិបាលតាំងពី ឆ្នាំ២០០៣ មកម៉្លេះ ក្នុងការវិនិយោគដាំដំណាំកៅស៊ូលើផ្ទៃដីជាង៩០០ហិកតា ប៉ុន្តែមកដល់ពេលនេះមានរយៈពេលជិត១០ឆ្នាំទៅហើយមិនទាន់ឃើញលទ្ធផលចេញជាផ្លែផ្កាអ្វីសោះមានតែរោងស្នាក់នៅរបស់ក្រុមហ៊ុន និងកូនកៅស៊ូបណ្តុះទុកចោលប៉ុណ្ណោះ ឯដីព្រៃនៅតែព្រៃដដែល។ លោកអភិបាលស្រុកបន្តទៀតថា មកដល់ពេលនេះគេមិនទាន់ឃើញក្រុមហ៊ុនខាងលើប្រើគ្រឿងចក្រឈូសឆាយដីសម្រាប់ដាំកៅស៊ូនៅឡើយទេ ហើយកូនកៅស៊ូដែលបណ្តុះទុកចោលនោះដុះវែងៗកម្ពស់៥ទៅ៦ម៉ែត្រក្លាយជាព្រៃស៊ុបទ្រុបអស់ទៅហើយ ។ ក្រៅពីនេះពុំឃើញមានដំណាំអ្វីក្រៅពីដើមស្វាយ៣-៤ដើម និងស្លឹកគ្រៃប៉ុន្មានគុម្ពប៉ុណ្ណោះ ។ ក្រុមហ៊ុននេះហាក់បីដូចជាពុំមានគម្រោងច្បាស់លាស់ទេ ហើយបើតាមដឹងបម្រុងទុកដីលក់ទៀតផង ប៉ុន្តែស្របពេលអនុសាសន៍ដ៏ថ្លៃថ្លារបស់សម្តេចតេជោហ៊ុន សែន ពិនិត្យសើរើក្រុមហ៊ុនវិនិយោគណាដែលពុំដំណើរការទុកដីឱ្យទំនេរចោលត្រូវដកហូតយកមកវិញនោះ ទើបពេលនេះយើងបញ្ចប់ក្រុមហ៊ុនមួយនេះតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ