ខេត្តបាត់ដំបង ៖ ទៀនព្រះវស្សាចំនួន៣៣គូនិងទេយ្យទានជាច្រើនទៀត ត្រូវបានក្រុមការងារគណបក្សប្រជាជនកម្ពុជា ចុះជួយស្រុកសង្កែដឹកនាំដោយលោក ឡោក ហ៊ួរ ជាប្រធានក្រុមការងារ បែងចែកជាក្រុមចុះប្រគេនគ្រប់វត្តក្នុងស្រុកកាលពីព្រឹកថ្ងៃទី៣១ កក្កដា ។
ដោយឡែកលោក ឡោក ហ៊ួរ បានដឹកនាំមួយក្រុមនាំយកទៀនព្រះវស្សា និងទេយ្យទានទៅប្រារព្ធពិធីប្រគេននៅក្នុងវត្តបាឡាត់ ឃុំនរាសម្រាប់វត្តចំនួន១៣វត្ត ក្នុងឃុំចំនួនបី គឺឃុំវត្តតាមឹម មាន៦វត្ត ឃុំនរាមាន៣វត្ត និងឃុំអូរដំបង១ មាន៤វត្ត ដោយក្នុងមួយវត្តៗទទួលបានទៀនព្រះវស្សានិងជើងមួយគូ អង្ករ៥០គីឡូក្រាម ទឹកស៊ីអ៊ីវ២យួរ ទឹកត្រី២យួរ ប្រេងម៉ាស៊ូត១០លីត្រ ទឹកក្រូច២កេស ទឹកបរិសុទ្ធ១កេស តែ២កញ្ចប់ ទឹកដោះគោ៥កំប៉ុង ស្ករស៥គីឡូក្រាម និងថវិកា១០មឺុនរៀល ។ ចំណែកពុទ្ធបរិស័ទដែលមកចូលរួមប្រមាណ១០០នាក់ ម្នាក់ៗទទួលបានថវិកា៥ពាន់រៀល ។
លោក ឡោក ហ៊ួរ ថ្លែងថា នេះមិនមែនជាពេលវេលាដែលត្រូវមកឃោសនាទេ តែជាទំនៀមទម្លាប់របស់គណបក្សប្រជាជនកម្ពុជាដែលមានសម្តេចអគ្គមហាទាំងបីជាប្រមុខ ហើយការប្រគេនទៀនព្រះវស្សានេះគណបក្សប្រជាជនកម្ពុជា ធ្វើឡើងទូទាំងប្រទេសជារៀងរាល់ឆ្នាំ ។
លោក ឡោក ហ៊ួរ បានផ្តាំផ្ញើដល់បងប្អូនប្រជាពលរដ្ឋទាំងអស់ សូមត្រៀមខ្លួនទៅចូលរួមបោះឆ្នោតនៅឆ្នាំ២០១៣ ខាងមុខ កុំបីខានហើយសូមផ្តល់ភាពយុត្តិធម៌ដល់គណបក្សណាដែលបានធ្វើជាក់ស្តែងពិតប្រាកដ ដែលយើងមើលឃើញការរីកចម្រើនមកទល់ពេលនេះ ៕
ចែករំលែកព័តមាននេះ