ក្រុមប្រឹក្សាកីឡាចាក់សាបពិភពលោកបាននិយាយកាលពីថ្ងៃអង្គារថា កីឡាការិនីកូរ៉េខាងត្បូងដែលអង្គុយយំលើវេទិកាប្រកួតអស់រាប់ម៉ោងជំទាស់តវ៉ានឹងការកាត់ក្តីឱ្យនាងចាញ់ការប្រកួតនឹងទទួលបានមេដាយលួងចិត្តមួយគ្រឿងទទួលស្គាល់ពីការប្រកួតដ៏យុត្តិធម៌របស់នាង ។
សហព័ន្ធកីឡាចាក់សាបអន្តរជាតិបាននិយាយថា នាង Shin A-Lam នឹងត្រូវគេផ្តល់ជូននូវមេដាយពិសេសមួយដែលបញ្ជាក់ពីការ ប្រកួតដោយយុត្តិធម៌គោរពច្បាប់ក្បួន។ ស្ត្រីអ្នកនាំពាក្យសហព័ន្ធនេះបានថ្លែងថា៖«ពិតណាស់ យើងយល់អំពីកំហឹងនិងអារម្មណ៍របស់អត្តពលិកនេះហើយជាហេតុដែលយើងផ្តល់ជូននូវរង្វាន់នេះ »។
ការប្រកួតវិញ្ញាសាចាក់សាបវគ្គពាក់កណ្តាលផ្តាច់ព្រ័ត្រកាលពីថ្ងៃចន្ទនៅទីក្រុងឡុង ប្រទេសអង់គ្លេស កីឡាការិនីកូរ៉េខាងត្បូងShin A-Lamបានធ្វើឱ្យមានការភ្ញាក់ផ្អើលខណៈនាងបដិសេធន៍មិនព្រមចាកចេញពីទីកន្លែងប្រកួតបើទោះណាមានការលួងលោមពីបណ្តាមន្ត្រីរៀបចំការប្រកួតក្តី ។
ក្រុមកូរ៉េបានតវ៉ាថា ការកាត់ក្តីរបស់អ្នកឱ្យពិន្ទុមិនមានភាពប្រក្រតីជាពិសេសនៅវិនាទីចុងក្រោយនៃការប្រកួតក្នុងនាទីបន្ថែម ។
យ៉ាងណាក៏ដោយ ការប្តឹងឧទ្ធរណ៍របស់កូរ៉េខាងត្បូងត្រូវបរាជ័យ ហើយនាង Shin A-Lamទីបំផុតត្រូវគេបញ្ចុះបញ្ចូលឱ្យចេញពីទីកន្លែង ប្រកួត។ បន្ទាប់មកនាងក៏បានបាត់បង់ឱកាស ប្រកួតដណ្តើមយកមេដាយសំរឹទ្ធិជាមួយកីឡាការិនីចិន Sun Hujie។
ប្រធានគណៈកម្មាធិការអូឡាំពិកកូរ៉េខាងត្បូងលោកប៉ាក់ យ៉ុងស៊ុនបានថ្លែងថា សហព័ន្ធកីឡាចាក់សាបអន្តរជាតិបានផ្តល់ជូននូវមេដាយបន្ទាប់ពីបានទទួលស្គាល់ថាមានបញ្ហាគ្រប់គ្រងម៉ោងប្រកួតលើវិញ្ញាសាចាក់សាប ប៉ុន្តែសហព័ន្ធនេះបាននិយាយថា ការបរាជ័យរបស់នាង Shin A-Lamគឺត្រឹមត្រូវតាមក្បួនច្បាប់ ។«ការសម្រេចចិត្តវាច្បាសណាស់គឺយោងទៅលើច្បាប់របស់សហព័ន្ធកីឡាចាក់សាបអន្តរជាតិ »។
គិតមកដល់ថ្ងៃពុធទី១ខែសីហា កូរ៉េខាងត្បូងដណ្តើមបានមេដាយសរុប៨គ្រឿង ក្នុងនោះមាស៣ ប្រាក់២ និងសំរឹទ្ធិ៣ស្ថិតនៅលំដាប់ទី៤បន្ទាប់ពីចិន អាមេរិក និងបារាំង ។ ក្នុងចំណោមមេដាយមាសទាំង៣គ្រឿង ក្រុមនេះ(កូរ៉េខាងត្បូង )ដណ្តើមបានលើវិញ្ញាសា បាញ់ព្រួញយូដូនិងបាញ់កាំភ្លើង ៕
ចែករំលែកព័តមាននេះ