ខណៈការជួបគ្នារវាងចន ស៊ីណា និងយក្ស Big Showបញ្ចប់ទៅគ្មានអ្នកឈ្នះចាញ់នៅក្នុងការវិលត្រឡប់មកកាន់សង្វៀន RAWជាថ្មី រែនឌី អ័រថិនបានបង្ហាញជូនអ្នកគាំទ្រនូវភាពខ្លាំងរបស់ខ្លួនដែលគ្មានថ្ងៃសាបសូន្យដោយបានបំបាក់កីឡាករជើងខ្លាំងហេត ស្លេធ័រដោយស្នៀតពិសេសឱ្យសន្លប់គ្មានការតបតបាន។ ក្នុងពេលជាមួយគ្នានោះដែរ ការជួបគ្នារវាងអ្នកកីឡាកាសចិត្តធម៌ចន ស៊ីណា និងយក្ស Big Showត្រូវបានបញ្ចប់ដោយគ្មានលទ្ធផល ខណៈស៊ី អឹមផាំងបានចូលឆាឆៅវាយសំពងគូប្រកួតទាំង២ ។ ការប្រកួតត្រូវបានរៀបចំធ្វើនៅសង្វៀនកីឡាកាស RAWស្ថិតក្នុងទីក្រុងCINCINNATIរដ្ឋអូហាយយ៉ូ សហរដ្ឋអាមេរិកត្រូវនឹងព្រឹកថ្ងៃអង្គារទី៣១កក្កដានៅកម្ពុជា ។
អ័រថិននៅក្នុងដំណើរមកប្រកួតនៅសង្វៀន RAWសាជាថ្មី រូបគេទទួលបានការគាំទ្រយ៉ាងច្រើនពីអ្នកទស្សនា ខុសពីលើកមុនៗដែលរូបគេត្រូវគេដាក់រហស្សនាមថា ជាកំពូលអ្នកលបវាយគេពីក្រោយខ្នង ។ ជាមួយនឹងកំពូលស្នៀត ពិឃាតចាប់គូប្រកួតបោកផ្ទប់មុខលើក្តាររេញ អ័រថិនហាក់ល្បីឈ្មោះគ្រាន់បើមួយរយៈពេលចុងក្រោយនេះ ។ បន្ទាប់ពីការអួតបង្ហាញសាច់ដុំចំពោះអ្នកទស្សនារួចមក ការប្រកួតរវាងអ្នកកីឡាកាសទាំង២ក៏បានចាប់ផ្តើម ។ ការប្រកួតចាប់ក្តៅគគុកភ្លាមៗក្នុងខណៈដែលហេត ស្លេធ័រប្រើកណ្តាប់ដៃវាយសន្ធាប់លើអ័រថិន និងបន្ទាប់មកធាក់ជាច្រើនជើង។ ស្លេធ័រហាក់មានកំហឹងខ្លាំងនឹងអ័រថិនដោយសូម្បីតែអាជ្ញាកណ្តាលក៏ឃាត់គេស្ទើរពុំបាន។
សម្រាប់អ័រថិន ការវាយនេះហាក់មិនបានធ្វើឱ្យភាពក្លាហានរបស់គេរួញខ្លីនោះឡើយ។ គេបានវាយបកភ្លាមៗផងដែររួចបានចាប់បោកស្លេធ័រលើក្តាររេញ បន្ទាប់មកចាប់អុកស្លេធ័រផ្ទប់មុខលើក្តាររេញបន្ថែមទៀត ។ មួយស្នៀតនេះបានធ្វើឱ្យស្លេតធ័រឈឺចុកចាប់រមួលខ្លួន។ ចំណែកអ័រថិនដោយមិនចង់ចំណាយពេលយូរក៏បានបញ្ចប់ការប្រកួតជាមួយស្នៀតពិសេស RKO។ គេប្រើស្នៀតនេះកម្ទេចស្លេធ័រសង្កត់ឱ្យអាជ្ញាកណ្តាលរាប់ដល់៣យកឈ្នះការប្រកួតទាំងស្រុង ។ ជ័យជម្នះដ៏ឆាប់រហ័សនេះគឺជាកាដូមួយដែលអ័រថិនជូនជាចំណងដៃដល់អ្នកគាំទ្ររបស់ខ្លួនក្នុងការវិលមកកាន់សង្វៀន RAWជាថ្មី ។
ដោយឡែកនៅក្នុងរាត្រីនោះផងដែរ ការជួបគ្នារវាងចន ស៊ីណានិងយក្ស Big Showត្រូវបានបញ្ចប់ទៅដោយគ្មានការប្រកាសលទ្ធផល។ នេះក៏ព្រោះតែ ស៊ី អឹមផាំងបានចូលរួមក្នុងនាមជាអ្នកអត្ថាធិប្បាយការប្រកួតបានចូលទៅឆាឆៅវាយចន ស៊ីណានិង Big Showក្នុងខណៈស៊ីណាកំពុងលីBig Showហៀបនឹងបោកយកជ័យជម្នះ ។ បន្ទាប់មកទៀត ស៊ី អឹមផាំងបានទាត់Big Showមួយជើងចំក្បាល ។
ជាលទ្ធផលគូប្រកួតទាំងពីរសន្លប់រៀងៗខ្លួន ឯស៊ី អឹមផាំងដើរចេញធ្វើព្រងើយ ។ ទោះជាយ៉ាងណា អ្នកចាត់ការទូទៅរបស់ RAWបានចេញមកប្រកាសថា ទង្វើរបស់ស៊ី អឹមផាំងនេះមិនត្រឹមត្រូវទេហើយបានកំណត់ឱ្យរូបគេត្រូវឡើងប្រកួតការពារខ្សែ ក្រវាត់ WWEរបស់ខ្លួនតទល់ចន ស៊ីណានិងយក្ស Big Showក្នុងព្រឹត្តិការណ៍ SummerSkam ៕
ចែករំលែកព័តមាននេះ