ខេត្តប៉ៃលិន ៖ ក្មេងទំនើង២ក្រុម បានជិះម៉ូតូដេញវាយប្រយុទ្ធគ្នានៅលើដងផ្លូវ និងបណ្តាលឱ្យស្លាប់បាត់បង់ជីវិតម្នាក់ បន្ទាប់ពីបញ្ជូនទៅកាន់មន្ទីរពេទ្យបង្អែកខេត្តបានបន្តិច ដោយសារគូទំនាស់វាយនឹងដំបងត្រូវជាច្រើនកន្លែងលើដងខ្លួន និងក្បាលផ្នែកខាងក្រោយ ។ ហេតុការណ៍ដេញវាយកាប់ចាក់គ្នានេះ បានកើតឡើងកាលពីវេលាម៉ោង៨និង១៥នាទីយប់នៅថ្ងៃទី២៧ កក្កដា នៅចំណុចហាងកាហេ្វយីហោកាហ្វេប៉ៃលិន ខាងលិចវិមានឯករាជ្យប្រហែល១៥០ម៉ែត្រ ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន។ ក្រោយពីមានអំពើហិង្សានេះ សមត្ថកិច្ចបានដេញតាមចាប់ឃាត់ខ្លួនជនដៃដល់ និងអ្នកដែលពាក់ព័ន្ធបញ្ជូនទៅស្នងការដ្ឋានខេត្ត ឃុំខ្លួនជាបណ្តោះអាសន្ន ។
ប្រភពព័ត៌មានឱ្យដឹងថា នៅមុនពេលកើតហេតុគេឃើញយុវជន២ក្រុមជិះម៉ូតូតាមផ្លូវជាតិក្នុងទិសដៅពីលិចទៅកើត ដោយពួកគេជិះម៉ូតូបណ្តើរ ជេរគ្នាបណ្តើរ លុះមកដល់ចំណុចខាងលើស្រាប់តែយុវជនទាំងនោះឈប់ម៉ូតូរួចដេញវាយគ្នា ក្នុងនោះមានយុវជនម្នាក់ទាញយកដំបងប៉ុនកដៃទៅវាយជនរងគ្រោះត្រូវចំខ្លួនជាច្រើនដំបង។ ពេលដែលជនរងគ្រោះដួល យុវជនម្នាក់នេះក៏បានវាយក្បាលផ្នែកខាងក្រោយទៀត បណ្តាលឱ្យសន្លប់បាត់ស្មារតីនៅនឹងកន្លែង ។ភ្លាមៗនោះ អ្នកនៅក្បែរកន្លែងកើតហេតុ ឃើញក៏មកជួយដឹកយុវជនរងគ្រោះទៅសង្គ្រោះជាបន្ទាន់នៅមន្ទីរពេទ្យបង្អែកខេត្ត តែជាអកុសល ដោយការរបួសធ្ងន់ពេកក៏បានស្លាប់នៅពេលមកដល់មន្ទីរពេទ្យបានបន្តិច ។
លោកឆម វ៉ាន់ធី នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្តបានឲ្យដឹងថា ជនរងគ្រោះដែលត្រូវជនដៃដល់វាយរហូតដល់រងរបួសធ្ងន់ និងឱ្យស្លាប់បាត់បង់ជីវិតនេះឈ្មោះយិន ធារ៉ា អាយុ២១ឆ្នាំ ជាសិស្ស រស់នៅភូមិបយ៉ាខា សង្កាត់បយ៉ាខា ក្រុងប៉ៃលិន។ ក្រោយពីកើតហេតុសមត្ថកិច្ចចាប់ឃាត់ខ្លួនជនសង្ស័យបានចំនួន៣នាក់ គឺ១-ឈ្មោះលឹម ហុងឧត្តម ភេទប្រុស អាយុ១៥ឆ្នាំ ២-ឈ្មោះផន សុខេត ភេទប្រុស អាយុ១៦ឆ្នាំ ពីរនាក់នេះរស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន និង៣-ឈ្មោះស្រិុន ដាំរ៉ា ហៅដាំ ភេទប្រុស អាយុ១៦ឆ្នាំ រស់នៅភូមិបឌិននៀវ សង្កាត់ប៉ៃលិន ក្រុងប៉ៃលិន ទាំង៣នាក់ជាសិស្សវិទ្យាល័យហ៊ុន សែន ក្រុងទេពនិម្មិត ។
លោក ង៉ែត សុផល នាយការិយាល័យស្រាវជ្រាវនិងកោសល្យវិច័យនៃស្នងការដ្ឋានខេត្តឲ្យដឹងថា ជនរងគ្រោះមានស្នាមជាំស្ទើរពេញខ្លួនដោយសារជនដៃដល់វាយនឹងដំបង តែកន្លែងដែលធ្ងន់ជាងគេគឺក្បាលផ្នែកខាងក្រោយ ដោយមានស្នាមជាំហើមប៉ោង ទើបបណ្តាលឲ្យជនរងគ្រោះស្លាប់បាត់បង់ជីវិតបែបនេះ ។
ជនសង្ស័យម្នាក់ឈ្មោះ ស្រិុន ដាំរ៉ា ហៅដាំ និយាយថា ពួកគេទាំងបីនាក់មិនធ្លាប់ស្គាល់ជនរងគ្រោះទេពីមុនមក។ នៅមុនពេលកើតហេតុ ខ្លួនបានជូនមិត្តភក្តិទៅផ្ទះនៅឯភូមិបយ៉ាខា លុះពេលទៅជិតដល់ហើយ ស្រាប់តែជនរងគ្រោះនិងមិត្តភក្តិគេម្នាក់ឈ្មោះម៉ូក អាយុប្រហែល២០ឆ្នាំ ជិះម៉ូតូតាមមកពីក្រោយ ហើយឃាត់ឱ្យឈប់ម៉ូតូ ។ ពេលរូបគេឈប់ម៉ូតូ ស្រាប់តែឈ្មោះម៉ូកបានវាយមួយដៃចំមុខ ដោយចោទថា ខ្លួនបានចង្អុលមុខគេ ។ ដោយសារកើតរឿងគេស្ទាក់វាយបែបនេះ ទើបគេទូរស័ព្ទហៅមិត្តភក្តិមកជាមួយ។ បន្ទាប់មកពួកគេក៏ជិះម៉ូតូឌុបគ្នាចេញពីកន្លែងដែលគេបានវាយ តែក្រោយពីចេញមកពួកគេទាំងពីរនាក់នោះបានជិះម៉ូតូតាមពីក្រោយ។ ដោយឃើញដូច្នេះពួកគេក៏ជិះម៉ូតូចូលទៅក្នុងហាងកាហ្វេ ដើម្បីឲ្យគេជួយ ព្រោះម្ចាស់ហាងជាគ្រូបង្រៀនបាល់របស់ដល់ពួកគេ ។
ពេលចូលទៅក្នុងហាង ខ្លួនបានទាញរបងបិទ ដើម្បីកុំឲ្យពួកគេ(ជនរងគ្រោះ) ចូលក្នុងហាង តែពួកគេបានយកដុំថ្មគប់ចូលទៅក្នុងហាងកាហ្វេជាច្រើនដុំទើបទ្រាំមិនបានពួកខ្លួនក៏ចេញមកប្រវាយប្រតប់គ្នា ដោយឈ្មោះតៃ ម៉ូ នៅក្នុងហាងកាហ្វេបានវាយគ្នាជាមួយជនរងគ្រោះ ។សាក្សីនៅកន្លែងកើតហេតុឲ្យដឹងថា មុនដំបូងគេឃើញក្មេងៗបីនាក់ជិះម៉ូតូម៉ាកស្គូពីចូលទៅឈប់នៅមុខហាងកាហ្វេ ហើយពីរនាក់ទៀតជិះម៉ូតូម៉ាកវីវ៉ាចូលទៅតាមក្រោយ និងស្រាប់តែឮសំឡេងស្រែកជេរគ្នាខ្លាំងៗថា «បើអាឯងខ្លាំងចេញមក » តែអត់ឃើញមានអ្នកណាហ៊ានចេញមកទេ ទើបពួកគេពីរនាក់នោះរើសដុំថ្មគប់ចូលទៅក្នុងហាងកាហ្វេ ។ បន្ទាប់មក ក៏ឃើញពួកគេចេញមកវាយកាប់ចាក់គ្នានៅខាងមុខហាងកាហ្វេ ពេលនេះឃើញជនរងគ្រោះម្នាក់ដេកសន្លប់នៅចិញ្ចើមថ្នល់ ចំណែកម្នាក់ទៀតរត់គេចខ្លួនបាត់ មួយសន្ទុះទើបមានអ្នកជិតខាងម្នាក់មកលើកជនរងគ្រោះយកទៅមន្ទីរពេទ្យបង្អែកខេត្ត ។
លោកឆម វ៉ាន់ធី បានបញ្ចាក់ថា ជនសង្ស័យទាំង៣នាក់ សារភាពថា ពិតជាបានវាយគ្នាជាមួយជនរងគ្រោះមែន ហើយម្នាក់ទៀតឈ្មោះតៃ ម៉ូ បានរត់គេចខ្លួនបាត់ក្រោយពេលកើតហេតុ។ ចំណែកជនសង្ស័យទាំង៣នាក់ប៉ូលិសបានចាប់ឃាត់ខ្លួនកសាងសំណុំរឿងបញ្ជូនទៅសាលាដំបូងនៅល្ងាចថ្ងៃ២៨ កក្កដា ដើម្បីចាត់ការទៅតាមនីតិវិធីច្បាប់ ៕
ចែករំលែកព័តមាននេះ