សារព័ត៌មានបរទេសផ្សាយឱ្យដឹងថា ចិនបានសាងសង់គេហដ្ឋានថ្លៃបំផុតក្នុងប្រទេស ដោយមានលក្ខណៈស្រដៀងនឹងភូមិគ្រឹះរបស់អង់គ្លេស មានតម្លៃចាប់ពី១៥លានដុល្លារ ក្នុងមួយខ្នងស្ថិតនៅជាយក្រុងប៉េកាំង ដោយរំពឹងថា នឹងសាងសង់រួចរាល់នៅចុងឆ្នាំនេះ ប៉ុន្តែអ្នកជំនាញនៅមិនទាន់ប្រាកដក្នុងចិត្តថា ថ្លៃខ្ពស់បែបនេះមានអ្នកទិញ ឬអត់ទេ?
របាយការណ៍បញ្ជាក់ថា ភូមិគ្រឹះនោះ គឺជាផ្នែកមួយក្នុងចំណោមផលិតផលពីការអភិវឌ្ឍអនចលទ្រព្យរបស់ចិន និងមានការប៉ាន់ប្រមាណថា ចិនមានលំនៅឋានថ្មីគ្មានអ្នកទិញជាង៦៤លានខ្នង ដោយសារមានការសាងសង់លើសតម្រូវការរបស់អ្នកប្រើប្រាស់ ។តាមរយៈការធ្វើអង្កេត និងស្រាវជ្រាវក្នុងទីក្រុងធំៗចំនួន៣៥ ក្នុងឆ្នាំ២០១០ឃើញថា ថ្លៃអចលនទ្រព្យក្នុងទីក្រុងចំនួន១១ រួមទាំងប៉េកាំង និងសៀងហៃ គឺមានតម្លៃខ្ពស់ជាងថ្លៃទីផ្សារពី៣០ទៅ៥០ភាគរយ ខណៈពេលក្រុងហ្វូចូវមានឯតទគ្គកម្មថ្លៃបំផុតគឺតម្លៃខ្ពស់ជាងទីផ្សារ៧០ភាគរយ ។
នៅក្នុងការព្យាយាមទប់ស្កាត់ថ្លៃអចលនទ្រព្យដែលកើនខ្ពស់ ធ្វើឱ្យអាជ្ញាធរក្រុងប៉េកាំងត្រូវប្រើបទដ្ឋាន «ផ្ទះមួយមនុស្សម្នាក់» ជាហេតុធ្វើឱ្យអ្នកក្រុងប៉េកាំង មិនអាចទិញផ្ទះ ក្នុងក្រុងបានលើសពី១ខ្នង ៕
ចែករំលែកព័តមាននេះ