រាជធានីភ្នំពេញ ៖ បុរស២នាក់ជិះម៉ូត SPARK Z បើកវ៉ារថយន្ត មួយគ្រឿងជ្រុលទៅខាងឆ្វេងបុកម៉ូតូអ៊ែរប្លែតបណ្តាលឱ្យអ្នកជិះម៉ូតូ SPARK Z ម្នាក់បែកមាត់ដេរចំនួន២ថ្នេរ កាលពីវេលាម៉ោង៣និង១០នាទីរសៀលថ្ងៃទី៣១ កក្កដា តាមផ្លូវលេខ២៧១ សង្កាត់ទួលទំពូង២ ខណ្ឌចំការមន ។
សាក្សីនៅកន្លែងកើតហេតុបានឱ្យដឹងថា ម៉ូតូអ៊ែរប្លែត ពណ៌ខ្មៅ បើកបរដោយបុរសម្នាក់ជាគ្រូបង្រៀនតាមផ្លូវលេខ២៧១ ពីជើងទៅត្បូង ចំណែកម៉ូតូ SPARK Z ពណ៌ខ្មៅ ជិះគ្នា២នាក់ ពីត្បូងទៅជើងក្នុងទិសដៅបញ្ច្រាសគ្នា ខណៈមកដល់ចំណុចខាងលើម៉ូតូ SPARK Z បើកវ៉ារថយន្តមួយគ្រឿងហៀរចូលខាងឆ្វេងដៃជ្រុលទៅបុកជាមួយម៉ូតូអ៊ែរប្លែតចំពីមុខ ធ្វើឱ្យម៉ូតូអ៊ែរប្លែតវិលមួយជុំ ។ អ្នកបើកម៉ូតូអ៊ែរប្លែតឈ្មោះ ចំរើន អាយុ៣៩ឆ្នាំ ជាគ្រូបង្រៀន ស្នាក់នៅសង្កាត់ទឹកថ្លា ខណ្ឌសែនសុខ រងរបួសរលាត់ដៃជើងតិចតួច ។
ចំណែកអ្នកបើកម៉ូតូ SPARK Z ឈ្មោះប៉េ ស៊ីណា អាយុ២៤ឆ្នាំ ស្នាក់នៅសង្កាត់ផ្សារដើមគ ខណ្ឌទួលគោក របួសបែកមាត់ត្រូវបានគេដឹកទៅព្យាបាលនៅមន្ទីរពេទ្យមិត្តភាពខ្មែរ-សូវៀត ដេរស្នាមបែកមាត់ចំនួន២ថ្នេរ ។ក្រោយពេលកើតហេតុម៉ូតូអ៊ែរប្លែតបែកស្តុបនិងស៊ីញ៉ួខាងមុខ ចំណែកម៉ូតូ SPARK Z វៀចបូមបើកទៅមុខមិនកើត ត្រូវបានសមត្ថកិច្ចយកម៉ូតូទាំងពីរគ្រឿងទៅរក្សាទុកនៅអធិការដ្ឋានខណ្ឌចំការមន ដើម្បីដោះស្រាយ ៕
ចែករំលែកព័តមាននេះ