រាជធានីភ្នំពេញ ៖ ស្រវឹងកុំបើកបរ តែសម្រាប់ពេលរាត្រីអ្នកបើកបរភាគច្រើនសុទ្ធតែស្រវឹង ហើយករណីគ្រោះថ្នាក់ចរាចរណ៍ក៏បណ្តាលមកពីការស្រវឹងដែរ ក្នុងនោះយុវជនស្រវឹងម្នាក់ជិះម៉ូតូទៅបុកពីក្រោយម៉ូតូមួយគ្រឿងទៀតកំពុងស៊ីញ៉ូបត់ឆ្វេង បណ្តាលឱ្យម៉ូតូដួលប្រាវបោកក្បាលទៅនឹងថ្នល់របួសធ្ងន់ខ្លួនឯង។ គ្រោះថ្នាក់នេះកើតឡើងកាលពីវេលាម៉ោង១១និង៣០នាទីយប់ថ្ងៃទី៣១ កក្កដា តាមបណ្តោយមហាវិថីព្រះសីហនុ (២៧៤) មុខហាងគីរីរម្យវាំងនន ស្ថិតក្នុងសង្កាត់បឹងកេងកង២ ខណ្ឌចំការមន ។
អ្នកបើកម៉ូតូវីវ៉ាមានឈ្មោះប៉ោ ហុង ភេទប្រុស អាយុ៤៩ឆ្នាំ ជាអ្នករត់ម៉ូតូឌុបរបួសស្រាល និងស្ត្រីជិះពីក្រោយរងរបួសស្រាលដែរ។ ចំណែកអ្នកបើកម៉ូតូឌ្រីមសេ១១០ ស៊េរី២០១២ មានឈ្មោះឆាយ ភេទប្រុស អាយុជាង២០ឆ្នាំស្នាក់នៅសង្កាត់ចាក់អង្រែក្រោម ខណ្ឌមានជ័យ។
ក្រោយពេលកើតហេតុជនរងគ្រោះរងរបួសធ្ងន់ត្រូវរថយន្តសង្គ្រោះដឹកយកទៅព្យាបាលនៅមន្ទីរពេទ្យកាល់ម៉ែត ។ ចំណែកម៉ូតូទាំងពីរគ្រឿងត្រូវសមត្ថកិច្ចយកទៅរក្សាទុកនៅអធិការដ្ឋានខណ្ឌចំការមន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ