ខេត្តកណ្តាល ៖ នៅលើសង្វៀនប្រដាល់ស្ថានីយទូរទស្សន៍ប៉ុស្តិ៍លេខ៥ សម្រាប់ល្ងាចថ្ងៃសុក្រ ទី១៨ មីនា ខាងមុខនេះ មានអ្នកប្រដាល់ជាខ្លាចាស់២គូ ដែលត្រូវឡើងសាកកម្លាំងគ្នាជូនទស្សនា ។ ភុំ សារ៉ាយ អ្នកលេងកណ្តាប់ដៃមកពីក្លឹបអាជ្ញាធរជាតិអាវុធគីមី នឹងត្រូវប្រកួតជាមួយម៉ៃ សុជាតិ អ្នកលេងរន្ទះជើងមកពីក្លឹបស៊ីម៉ាក់ ។ មួយគូទៀតជាការជួបប្រកួតរវាង ខុន រិទ្ធ មកពីក្លឹបកងពលធំអន្តរាគមន៍លេខ៣ ប្រាសាទព្រះវិហារ ត្រូវប្រកួតជាមួយយឹម ឌៀប មកពីក្លឹបក្រសួងការពារជាតិ ។
រវាងភុំ សារ៉ាយ និងម៉ៃ សុជាតិ ទោះបីជាពួកគេជាខ្លាចាស់ធ្លាប់មានប្រវត្តិឡើងសង្វៀនច្រើនឆ្នាំ ប៉ុន្តែមិនធ្លាប់ជួបប្រកួតគ្នាម្តងណាឡើយ។ នេះជាលើកដំបូងដែលអ្នកទាំងពីរជួបគ្នាលើសង្វៀន ។ ពីមុនភុំ សារ៉ាយ មានភាពល្បីល្បាញគ្រាន់បើ ពិសេសគឺស្នៀតកណ្តាប់ដៃរបស់គេ ធ្វើឱ្យមានការចាប់អារម្មណ៍ពីសំណាក់មហាជនដែលស្នេហាវិស័យកីឡាប្រដាល់ ។ សារ៉ាយ មានកណ្តាប់ដៃធ្ងន់ ហើយលឿនរហ័សទៀតផង ជាមួយគ្នានេះដែរ សារ៉ាយ ក៏ចូលចិត្តប្រើស្នៀតចម្លែកៗផងដែរ ដូចជាស្នៀតសេះហោះ ឬស្នៀតលោតទាត់ផ្កាប់ចានជាដើម ។ មកដល់ពេលនេះសារ៉ាយមានវ័យចាស់ជាងមុន ទោះបីជាគេនៅរក្សាបាននូវវិជ្ជាគុន តែបញ្ហាកម្លាំងមានការថយចុះច្រើន ។ ចំណែកម៉ៃ សុជាតិវិញ ក៏មិនធម្មតាដែរ គេមានជំនាញប្រើរន្ទះជើង និងស្នៀតកណ្តាប់ដៃក៏មិនចាញ់សារ៉ាយប៉ុន្មានដែរ ។ រវាងគូនេះ ពិតជាលំបាកទស្សន៍ទាយលទ្ធផលទុកជាមុន ព្រោះពួកគេមានសមត្ថភាពប្រហាក់ប្រហែលគ្នា ។
ចំពោះខុន រិទ្ធ និងយឹម ឌៀបវិញ ពួកគេក៏មិនធ្លាប់មានប្រវត្តិប្រកួតគ្នាពីមុនមកដែរ ទោះបីជាពួកគេជាជើងចាស់ដូចគ្នាក៏ដោយ ។ យឹម ឌៀប យឺតបន្តិច ប៉ុន្តែកណ្តាប់ដៃនិងរន្ទះជើងរបស់គេធ្ងន់ណាស់ នៅពេលវាយត្រូវគោលដៅម្តងៗដៃគូប្រាកដជាប្រឈមនឹងសន្លប់មិនខាន ។ ចំណែកខុន រិទ្ធ វាយចេញលឿនញាប់តែស្រាលៗមិនធ្ងន់ដូចយឹម ឌៀប ទេ ។ មជ្ឈដ្ឋានអ្នកភ្នាល់លុយក្រៅសង្វៀនមានជំនឿលើយឹមឌៀប ច្រើនជាងសម្រាប់ការប្រកួតនេះ ៕
នៅមានអ្នកប្រដាល់រលកក្រោយច្រើនគូទៀតដូចជារឿង ភិរុណ មកពីក្លឹបបង្ក្រាបគ្រឿងញៀន ត្រូវប្រកួតជាមួយឡុង ប៊ុនហេង មកពីក្លឹបសាលវ័ន្តកីឡា ។ ឈិន ធារ៉ា មកពីក្លឹបប្រដាល់ស្រុកអន្លង់វែង ត្រូវប្រកួតជាមួយជា ឆៃរ៉ាក់ មកពីក្លឹបខេមរិន្ទមានឫទ្ធិ ។ រីឯការប្រកួតជាលក្ខណៈសាកល កីឡាករវ៉ែន ឌីយ៉ាម៉ង់ មកពីក្លឹបប៉េអឹមក្រុងភ្នំពេញ ត្រូវប្រកួតជាមួយទិត្យ សំរិត មកពីក្លឹបអារុណរះ ។
- ទឹម សាន បាត់មុខយូរបង្ហាញខ្លួនលើសង្វៀនជាមួយអ៊ុង វីរៈ
រាជធានីភ្នំពេញ ៖ ទឹម សាន អ្នកប្រដាល់ចាស់វស្សាក្លឹបអាស៊ីកីឡា ដែលបាត់មុខយូរលើកនេះចង់មកសាកកម្លាំងជាមួយអ៊ុង វីរៈ មកពីក្លឹបកងទ័ពឆត្រយោង៩១១ នៅលើសង្វៀនស្ថានីយ ទូរទស្សន៍CTN នាថ្ងៃសៅរ៍ទី១៩ មីនា ។
វត្តមានរបស់ទឹម សាន ធ្វើឱ្យអ្នកទស្សនាភាគច្រើនមានការភ្ញាក់ផ្អើលគ្រប់គ្នា ព្រោះមិនដឹងថា មូលហេតុអី្វនោះទេដែលបណ្តាលឱ្យគេបាត់មុខពីលើសង្វៀនបែបនេះឬមួយដោយសារតែគេតែងជួបការបរាជ័យច្រើនពេកមើលទៅ។ ទឹម សាន ជាអ្នកប្រដាល់ដែលមានប្រវត្តិឡើងសង្វៀនយូរមកហើយ តែថ្វីដៃប្រកួតនិងល្បិចប្រយុទ្ធនៅលើសង្វៀនមិនមានអ្វីដែលអស្ចារ្យប៉ុន្មានឡើយ។ គេអត់ចេះប្រើផ្លែកែងនិងជង្គង់ទាល់តែសោះ គឺពូកែបានតែស្នៀតជើងនិងស្នៀតកណ្តាប់ដៃបន្តិចប៉ុណ្ណោះ ហើយរាល់ការវាយចេញមិនត្រឹមតែមិនមានភាពរហ័សរហួនទេ ថែមទាំងមានភាពផ្សងព្រេងច្រើនទៀត ។
អ៊ុង វីរៈ ចិត្តហ៊ាន កម្លាំងខ្លាំង កែងនិងជង្គង់របស់គេអាចប្រើការបាន តែការមកប៉ះទឹម សាន លើកនេះគេមិនហ៊ានអះអាងពីការចាញ់-ឈ្នះទុកមុនបានឡើយ ។ អ៊ុង វីរៈ អាចវាយកៀកល្អជាងប្រយោល ប៉ុន្តែពិបាកបន្តិចហើយបើទោះជាទឹម សាន អន់យ៉ាងណាក៏មិនងាយផ្តួលដែរ ។ ទឹម សាន ប្រវត្តិរបស់គេមិនសូវចាញ់សន្លប់ទេភាគច្រើនគឺចាញ់តែពិន្ទុប៉ុណ្ណោះ ដូច្នេះវីរៈក៏មិនអាចប្រហែសបានដែរ ។ ជិន រ៉ា មកពីសមាគមកីឡាប្រដាល់ក្រសួងការពារជាតិ ជួប នួន វិចិត្រ មកពីក្លឹបកីឡាប្រដាល់ក្រសួងមហាផ្ទៃ ។ អ្នកប្រដាល់ជើងថ្មីវ័យក្មេង១គូនេះអត់ដែលធ្លាប់ជួបគ្នាពីមុនមកឡើយ តែល្បិចប្រយុទ្ធនិងស្នៀតរបស់គេទាំង២នាក់អាចស៊ីសងគ្នាបាន ។ ជិន រ៉ា ចិត្តសឿង ផ្លែកែងនិងជង្គង់របស់គេអាចវាយចេញបានរហ័ស ហើយស្នៀតកណ្តាប់ដៃក៏អាចវាយចេញបានលឿនដែរ ។ ប៉ុន្តែការមកប៉ះវិចិត្រក៏មិនមែនជារឿងដែលងាយស្រួលនោះទេ វិចិត្រ ផ្លែកែងនិងជង្គង់របស់គេមិនអន់ជាងជិន រ៉ា ប៉ុន្មានឡើយ ទោះបីចលនាបម្លាស់ទីរបស់គេយឺតយ៉ាវបន្តិចមែន តែវិធីការពារខ្លួនរឹងមាំគួរសម។ វិចិត្រនិងជិន រ៉ា សុទ្ធតែបានបង្ហាញនូវការតាំងចិត្តច្បាស់លាស់ដូចគ្នា តែត្រង់ថា អ្នកណាមានសំណាងយកឈ្នះការប្រកួតលើកនេះបានឬក៏អត់នោះនៅមិនទាន់ដឹងឡើយ ។
អាំង សំអាត មកពីក្លឹបតាព្រហ្មមានជ័យ ជួបយុគ យក្សគីល មកពីក្លឹបក្រុងប៉ោយប៉ែត ។ ពុធ ហ៊ុយ មកពីក្លឹបពុទ្ធសេរីវង្សព្រែកតាទែន ជួបនាង ស៊ីណាត មកពីក្លឹបខេត្តរតនគិរី ។ ណុប សូដា មកពីសមាគមកីឡាប្រដាល់ក្រសួងការពារជាតិ ប្រកួតជាលក្ខណៈសាកលជាមួយ ថា រ៉ាវី មកពីក្លឹបឥន្ទ្រីកីឡា ៕
ចែករំលែកព័តមាននេះ