រាជធានីភ្នំពេញ ៖ សម្តេចនាយករដ្ឋមន្រ្តី ហ៊ុន សែន នៅព្រឹកថ្ងៃទី១ សីហា ២០១២នេះ បានផ្ញើសារទៅកាន់សមាជិកសមាគមអ្នកប្រជាធិបតេយ្យ ក៏ដូចជាក្រុមអ្នកគំាទ្រលោកម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំដែលបាននិងកំពុងធ្វើសកម្មភាពផ្តិតមេដៃទាមទារឲ្យមានការដោះលែងលោកម៉ម សូណង់ដូនោះថា ជាការអត់ប្រយោជន៍នោះទេ ព្រោះស្នាមមេដៃគ្មានទម្ងន់ទៅលើប្រព័ន្ធតុលាការទេ ។
ប្រសាសន៍ថ្លែងរបស់សម្តេចនាយករដ្ឋមន្រ្តី ហ៊ុន សែន យ៉ាងដូច្នេះ គឺបានធ្វើឡើងនៅគ្រាដែលមន្រ្តីគណបក្សប្រឆាំងអង្គការសង្គមស៊ីវិល ក៏ដូចជាសមាគមអ្នកប្រជាធិបតេយ្យក្រោមការគ្រប់គ្រងរបស់លោកម៉ម សូណង់ដូ បាននិងកំពុងស្វែងរកកិច្ចអន្តរាគមន៍នានា ជាពិសេសការផ្តិតមេដៃគំាទ្រឲ្យមានការដោះលែងលោកម៉ម សូណង់ដូ នោះ ។
ថ្លែងនៅក្នុងពិធីចែកសញ្ញាបត្រដល់និស្សិតថ្នាក់បរិញ្ញាបត្រ និងបរិញ្ញាបត្រជាន់ខ្ពស់ចំនួន២.៦១៩នាក់ នៃសាកលវិទ្យាល័យភូមិន្ទនីតិសាស្រ្តវិទ្យាសាស្រ្តសេដ្ឋកិច្ចនៅវិទ្យាស្ថានជាតិអប់រំនាព្រឹកថ្ងៃទី១ សីហា ២០១២ សម្តេចនាយករដ្ឋមន្រ្តី ហ៊ុន សែន បានមានប្រសាសន៍បញ្ជាក់ឲ្យដឹងដែរថា វិទ្យុសំបុកឃ្មុំវាមិនខុសនោះទេ ដូច្នេះគ្មានការបិទឡើយ ប៉ុន្តែបុគ្គលជាម្ចាស់ជាអ្នកធ្វើខុសបានន័យថា មិនមែនខឹងគោវាយរទេះនោះទេ។
សម្តេចនាយករដ្ឋមន្រ្តីបានឲ្យដឹងដែរថា មាន៧នាក់ បានមកទទួលបទបញ្ជា ប៉ុន្តែ៦នាក់ បានចូលមកសារភាពហើយ ក្នុងចំណោមនោះ៥នាក់ មានដីការតាមចាប់ខ្លួន ប៉ុន្តែក្នុងនោះមាន៤នាក់ បានចូលមកសារភាពហើយនៅសល់តែម្នាក់ទៀតប៉ុណ្ណោះ គឺប៊ុន រដ្ឋា។
ចំពោះលោកម៉ម សូណង់ដូ វិញ ដែលសមាជិករបស់គាត់នាំគ្នាផ្តិតមេដៃទាមទារឲ្យដោះលែងនោះ សម្តេចបានឆ្លើយតបទៅវិញថា គឺអត់មានប្រយោជន៍នោះទេ ស្នាមមេដៃគ្មានទម្ងន់ទៅលើប្រព័ន្ធតុលាការទេ ដូច្នេះសូមឲ្យរកមេធាវីដែលខ្លាំងមក៕
ចែករំលែកព័តមាននេះ