យោងតាមបណ្តាមន្ត្រីនិងក្រុមគ្រូពេទ្យថាមនុស្សយ៉ាងតិច១៧នាក់បានត្រូវស្លាប់ហើយជាច្រើនសិបនាក់ទៀតត្រូវរបួសក្នុងការប៉ះទង្គិចគ្នារវាងកងកម្លាំងសន្តិសុខនិងបណ្តាជនប្រដាប់អាវុធស្ថិតក្នុងក្រុមប្រឆាំងមួយក្នុងជួរកងទ័ពកាលពីព្រឹកថ្ងៃទី៣១កក្កដានៅឯក្រសួងមហាផ្ទៃយេម៉ែន ។
ក្រុមគ្រូពេទ្យនៃមន្ទីរពេទ្យប៉ូលិសនិយាយថាសរុបសាកសពទាហាន១១នាក់ត្រូវបានបញ្ជូនមកកាន់មន្ទីរពេទ្យប៉ូលិសហើយទាហានជាច្រើនសិបនាក់ទៀតត្រូវរបួស។ កងកម្លាំងសន្តិសុខបានចាប់ខ្លួនទាហានប្រឆាំងស្លៀកពាក់ឯកសណ្ឋានកងកម្លាំងសន្តិសុខ២៨នាក់ហើយរកឃើញសាកសពទាហានប្រឆាំង៦នាក់នៅខាងក្នុងអគារក្រសួងមហាផ្ទៃ ។
អ្នកទទួលខុសត្រូវម្នាក់របស់ប៉ូលិសយេម៉ែន និយាយថា ពួកទាហានប្រឆាំងអះអាងថាពួកគេទទួលបញ្ជាពីសំណាក់ឧត្តមសេនីយ៍អាលីម៉ូហ៍សេនអាល់អាហ៍ម៉ា ឱ្យលុកចូលក្នុងក្រសួងមហាផ្ទៃដើម្បីការពារឧត្តមសេនីយ៍រូបនេះ ។រយៈពេល៣ថ្ងៃចុងក្រោយនេះមានការបាញ់កាំភ្លើងរប៉េះរប៉ោះរវាងកងកម្លាំងសន្តិសុខនិងពួកជនប្រដាប់អាវុធកុលសម្ព័ន្ធនៅជុំវិញក្រសួងមហាផ្ទៃ ។ នៅយេម៉ែនពួកកុលសម្ព័ន្ធបន្តដើរតួនាទីសំខាន់មួយក្នុងដំណើរការនយោបាយពីព្រោះពួកសកម្មប្រយុទ្ធជាច្រើនរយពាន់នាក់ ស្មោះត្រង់តែចំពោះបណ្តាមេដឹកនាំកុលសម្ព័ន្ធ ។
ការប្រយុទ្ធគ្នាកាលពីថ្ងៃទី៣១កក្កដាជាការប្រយុទ្ធយ៉ាងអាក្រក់បំផុតនៅរដ្ឋធានីយេម៉ែន ចាប់តាំងពីការឡើងកាន់អំណាចរបស់ប្រធានាធិបតីលោកអាបដរ៉ាបបូម៉ាន់សួរ ហាឌី កាលពីខែកុម្ភៈមក ។ ក្រុងសាណារយៈពេល១ខែជាទីលាននៃការប្រយុទ្ធគ្នានៅតាមដងវិថីរវាងកងទាហានប្រឆាំងគាំទ្រដោយពួកសកម្មប្រយុទ្ធដឹកនាំដោយប្រមុខកុលសម្ព័ន្ធលោកសាឌីក អាល់អាហ៍ម៉ា និងកងទ័ពដែលស្មោះត្រង់នឹងអតីតប្រធានាធិបតីលោកអាលីអាប់ឌុលឡាហ៍សាឡេហ៍ មុនពេលផ្ទេរអំណាចឱ្យលោកហាឌី ៕
ចែករំលែកព័តមាននេះ