រាជធានីភ្នំពេញ ៖ សាលារាជធានីភ្នំពេញកាលពីថ្ងៃទី៣១ កក្កដា ២០១២ បានចេញសេចក្តីប្រកាសព័ត៌មានមួយជាការឆ្លើយតបនឹងការលើកឡើងរបស់ជនមួយចំនួនដែលបានអះអាងថា «សមត្ថកិច្ចមិនបានបំពេញតួនាទីរបស់ខ្លួន បែរជាទារប្រាក់ដោយមិនបានបាញ់ទឹកពន្លត់អគ្គិភ័យ និងបាញ់ទឹកដែលផ្ទះឱ្យលុយប៉ុណ្ណោះ» ។ ការរិះគន់គ្មានមូលដ្ឋាននេះគឺពុំមែនចេតនាល្អក្នុងការរិះរកភាពរីកចម្រើនឡើយ។
សាលារាជធានីភ្នំពេញ សូមជម្រាបជូនដំណឹងដល់សាធារណជនទាំងអស់ក្នុងរាជធានីភ្នំពេញឱ្យបានជ្រាបថា កាលពីថ្ងៃទី២៣ កក្កដា ២០១២ វេលាម៉ោង២និង៣០នាទីរសៀលមានករណីអគ្គិភ័យមួយបានកើតឡើងនៅក្នុងសង្កាត់ទួលសង្កែ ខណ្ឌឫស្សីកែវ ។ នៅក្នុងហេតុការណ៍នេះសមត្ថកិច្ចការិយាល័យនគរបាលបង្កា និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញបានខិតខំធ្វើការអស់ពីសមត្ថភាពជួយទប់ស្កាត់កុំឱ្យឆេះរាលដាល និងពន្លត់អគ្គិភ័យដែលកំពុងឆាបឆេះ ព្រមទាំងខិតខំអំពាវនាវទៅអង្គភាពដែលមានរថយន្តពន្លត់អគ្គិភ័យឱ្យមកជួយចូលរួមអន្តរាគមន៍បាញ់ទឹកទាន់ពេលវេលា។
សាលារាជធានីភ្នំពេញបន្តថា រថយន្តពន្លត់អគ្គិភ័យដែលចូលរួមបាញ់ទឹកពន្លត់នៅពេលនោះមានរថយន្តពន្លត់អគ្គិភ័យអាកាសយានដ្ឋានភ្នំពេញអន្តរជាតិ រថយន្តអគ្គិភ័យរបស់ទីបញ្ជាការកងរាជអាវុធហត្ថរាជធានីភ្នំពេញ រថយន្តពន្លត់អគ្គិភ័យរបស់ក្រសួងមហាផ្ទៃ និងរថយន្តពន្លត់អគ្គិភ័យរបស់ខេត្តកណ្តាល។ បើគ្មានការខិតខំបែបនេះទេ ប្រហែលជាអគ្គិភ័យមិនអាចបញ្ចប់ក្នុងពេលពីរម៉ោងបន្ទាប់ ហើយភាពអន្តរាយផ្ទះសម្បែង និងទ្រព្យសម្បត្តិមិនមានទំហំប៉ុននេះទេ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ