រាជធានីភ្នំពេញ ៖ ទន្ទឹមការទទួលជោគជ័យក្នុងអាជីពជាពិធីការិនីក្នុងកម្មវិធី«សុខគា លក្ខិណា ប៊ីអាយជី» របស់ស្ថានីយទូរទស្សន៍CTNនោះ ស្រីស្រស់ធ្មេញច្រពើសថន លក្ខិណា បានក្លាយជាតួឯកជាលើកដំបូងក្នុងខ្សែភាពយន្តរឿង «អាបពាក់មួកសុវត្ថិភាព»។ប្រមាណជាងមួយឆ្នាំនេះ ថន លក្ខិណា ត្រូវគេមើលឃើញថា កំពុងតែកាក់កបយ៉ាងខ្លាំងក្នុងអាជីពសិល្បៈធ្វើឱ្យនាងប្រែមុខមាត់ថ្មីដោយភាពស៊ីវិល័យ និងឡូយឆាយ ។នាងអាចនឹងឡើងខ្ពស់ត្រដែតថែមមួយកម្រិតទៀតក្រោយពេលខ្សែភាពយន្តដែលនាងសម្តែងនេះដាក់បញ្ចាំង ។
ទាក់ទិននឹងការសម្តែងជាតួឯកជាលើកដំបូងនេះ ថន លក្ខិណា និយាយថា សព្វថ្ងៃនាងកំពុងតែមានការមមាញឹកក្នុងការថតរឿង «អាបពាក់មួកសុវត្ថិភាព» របស់ផលិតកម្មLD ។ នាងសម្តែងជាតួស្រីអាបពេលយប់ និងពេលថ្ងៃជាមនុស្សធម្មតា រួមសម្តែងជាមួយតួប្រុសលោកជា សុវណ្ណនរាណ៍ លោកបឺរី ស៊ីមន ឌីចេក្តឹប និងនាងប៊ីរីយ៉ា ។នេះជារឿងបែបកំប្លែង ហើយការតុបតែងមុខជាអាបមានលក្ខណៈគួរឱ្យស្រឡាញ់មិនអាក្រក់ទេ។ ខ្សែភាពយន្តនេះថតជិតចប់ហើយ និងគ្រោងដាក់បញ្ចាំងក្នុងពេលឆាប់ៗខាងមុខ ។
តារាមានរូបរាងខ្ពស់ស្រឡះសាច់សខ្ចី រូបនេះបញ្ជាក់ថា តាមរយៈការសម្តែងជាតួឯកលើកដំបូងនេះនាងហាក់មានការពិបាកបន្តិច ពិសេសក្នុងឈុតដក.ក ដែលនាងត្រូវធ្វើយ៉ាងណាឱ្យដូចអាបពិតៗ ។ ទោះជាជួបការពិបាកក៏រូបនាងមិនអល់អែកក្នុងការសម្តែងឡើយ ពោលគឺនាងខំប្រឹងប្រែងសម្តែងឱ្យបានល្អ ដើម្បីឱ្យសាច់រឿងមានការជក់ចិត្តដិតអារម្មណ៍ពីអ្នកទស្សនា ។
តាមរយៈខ្សែភាពយន្តនេះនាងលក្ខិណា សង្ឃឹមថានឹងទទួលបានការគាំទ្រច្រើនពីទស្សនិកជន ព្រោះរឿងនេះហាក់ខុសប្លែកពីខ្សែភាពយន្តផ្សេងដោយមានលក្ខណៈបែបកំប្លែងផង និងភ័យរន្ធត់ផង ។
តារាសម្តែង និងជាពិធីការិនីរូបនេះបញ្ជាក់ថា តាមពិតទៅនាងធ្លាប់សម្តែងជាតួឯក២ទៅ៣រឿងនាពេលកន្លងមក តែខ្សែភាពយន្តនោះមិនបានដាក់បញ្ចាំងឡើយ ហើយនាងក៏មិនបានដឹងពីមូលហេតុដែរ ។ដូច្នេះហើយទើបនាងចាត់ទុកថារឿង«អាបពាក់មួកសុវត្ថិភាព»ជាឱកាសលើកដំបូងក្នុងការគ្រងតំណែងជាតួឯកសម្រាប់អាជីពសិល្បៈរបស់នាង ។កន្លងមកខណៈទទួលបានជោគជ័យក្នុងអាជីពសិល្បៈនោះ ថន លក្ខិណា ធ្លាប់ជួបប្រទះពាក្យចចាមអារ៉ាមស្នេហា តែនាងតែងតែបដិសេធដោយលើកហេតុផលថារឿងស្នេហានាងមិនចង់មានការពាក់ព័ន្ធជាមួយទេ គឺគិតតែខិតខំប្រឹងប្រែងរៀនសូត្រ និងធ្វើការងារសិល្បៈឱ្យមានការរីកចម្រើន និងទទួលបានការគាំទ្រច្រើនប៉ុណ្ណោះ។ ចំណែកពាក្យចចាមអារ៉ាមដែលនិយាយមិនល្អអំពីរូបនាងនោះ គឺនាងតែងតែប្រកាសថា មិនបានប្រព្រឹត្តដូចពាក្យគេលើកឡើងនោះទេ ដូច្នេះនាងមិនខ្វល់ទេ ចង់អ្នកណានិយាយស្អីនិយាយទៅ ។
កញ្ញាថន លក្ខិណា ជាពិធីការិនីក្នុងកម្មវិធី«សុខគា លក្ខិណា និងប៊ីអាយជី» របស់ស្ថានីយទូរទស្សន៍CTN ។ ក្រៅពីនេះនាងក៏មានការមមាញឹកក្នុងការថតខារ៉ាអូខេ និងថតស្ប៉តផ្សាយពាណិជ្ជកម្មផងដែរ ។ឈ្មោះជាអាបពិតជាគួរឱ្យខ្លាចដែលគេមិនចង់ឃើញ ឬចូលជិត តែកញ្ញាថន លក្ខិណា សង្ឃឹមថា ភាពយន្តដែលនាងសម្តែងនោះនឹងស្រូបទាញបានអ្នកចូលរួមទស្សនាច្រើន៕
ចែករំលែកព័តមាននេះ