រាជធានីភ្នំពេញ ៖ ដោយសារតែវ័យកាន់តែចាស់នោះ តារាកំប្លែងចាស់វស្សា និងល្បីល្បាញក្នុងប្រទេសកម្ពុជានាយកុយ បានអូសទាញកូនប្រុសឱ្យមកចូលរួមក្នុងអាជីពកំប្លែងដើម្បីស្នងតំណែង ដោយដាក់ងារឱ្យថា «នាយកយ» ។ អ្នកកំប្លែងថ្មីនេះលេចមុខប្រហែលមួយខែហើយ ។
កន្លងមកនាយកុយធ្លាប់អះអាងថា ចង់ឱ្យនាយកយចាប់យកមុខរបររកស៊ីឱ្យបានគ្រាន់បើនឹងគេសិនចាំឱ្យចូលសម្ដែងសិល្បៈ ។ ពេលនេះលោកគិតថា វាជាវេលាមួយសមស្របសម្រាប់ឱ្យនាយកយចូលប្រឡូកក្នុងវិស័យសិល្បៈហើយ។ នាយកុយមានជំនឿថាការសម្តែងរបស់កូនប្រុសទី២របស់លោកនេះនឹងអាចធ្វើបានល្អនាពេលខាងមុខ ដោយសាររូបគេមានទេពកោសល្យស្រាប់ និងមានចំណង់ចំណូលចិត្ត ពិសេសគឺមានលោកជាអ្នកបង្ហាត់បង្ហាញ ។
នាយកុយបន្ថែមថាដោយសារបច្ចុប្បន្នក្រុមកំប្លែងរបស់លោកកាន់តែទទួលបានការគាំទ្រ និងបានបង្ហាញមុខស្ទើរគ្រប់បុស្តិ៍ទូរទស្សន៍ ហេតុនេះលោកក៏បន្ថែមសមាជិកជាកូនប្រុសរបស់លោកតែម្តង ។ លោកគិតថា កូនរបស់លោកគឺអាចមានពេលគ្រប់គ្រាន់ និងសក្តិសមសម្រាប់ឱ្យគេចាប់យកអាជីពកំប្លែងនេះ និងអាចជំនួសតំណែងលោកខណៈពេលដែលអាយុរបស់លោកកាន់ច្រើន ។
នាយកយ គឺជាតារាកំប្លែងចំណូលថ្មី បើទោះបីជាការសម្តែងរបស់លោកហាក់មានការចន្លោះប្រហោងច្រើនបន្តិចមែន តែតារា កំប្លែងរូបនេះកំពុងតែប្រឹងប្រែងកសាងកេរ្តិ៍ឈ្មោះក្នុងពិភពសិល្បៈកំប្លែងដើម្បីដើរតាមគន្លងឪពុកដែលជាតារាកំប្លែងដ៏ល្បីល្បាញក្នុងប្រទេសកម្ពុជា គឺនាយកុយ ។ នាយកយ ជាឈ្មោះដែលឪពុករបស់លោកដាក់សម្រាប់អាជីពកំប្លែង ប៉ុន្តែឈ្មោះពិតនោះគឺ ជី គឹមលី អាយុ៣២ឆ្នាំ និងបានរៀបអាពាហ៍ពិពាហ៍រួចហើយនៅឆ្នាំ២០០៣ និងមានកូន២នាក់ ។
ក្នុងការចាប់យកអាជីពកំប្លែងជាលើកដំបូងនេះនាយកយ គិតថា វាជាឱកាសមួយដែលត្រូវចាប់យកឱ្យបានព្រោះកន្លងមកលោកមិនដែលមានឱកាសបានចូលសម្តែងកំប្លែងឡើយ ដោយសារតែឪពុករបស់លោកគឺនាយកុយមិនទាន់ផ្តល់ឱកាស គឺឱ្យលោកគិតគូររឿងមុខរបររកស៊ីសិន ។
តារាកំប្លែងថ្មីនេះឱ្យដឹងនាពេលថ្មីៗនេះថា តាមពិតទៅលោកមាននិស្ស័យខាងផ្នែកសិល្បៈនេះតាំងពីតូចមកម៉្លេះ ពោលគឺពេលដែលលោកមានអាយុប្រហែល១៥ឆ្នាំ ដោយលោកធ្លាប់បានហាត់រៀនរាំតាមបែបប្រពៃណីខ្មែរនៅសាលាសន្ធរមុ៉ក ហើយលោកក៏ជាអ្នកសិល្បៈប្រចាំសាលាផងដែរ ។ ជារឿយៗពេលលោកនៅពីក្មេងនោះតែងតែធ្វើត្រាប់តាមកាយវិការកំប្លែងរបស់ឪពុកលោកជាមួយក្មេងៗដទៃទៀត ជាមួយក្តីរំពឹងទុកថាថ្ងៃណាមួយលោកនឹងអាចក្លាយជាអ្នកកំប្លែងម្នាក់ដូចជាឪពុករបស់លោកដែរ ។
លោក គឹមលី បន្តថា ដោយសារតែឪពុករបស់លោកបានប្រគល់ការងារផ្សេង គឺកាន់កាប់ឧបករណ៍ភ្លេងដើម្បីឱ្យលោកជួយមើលការខុសត្រូវនោះទើបធ្វើឱ្យលោកមានការមមាញឹកខ្លាំងក្នុងកិច្ចការងារនេះដោយមិនមានពេលចូលរួមសម្តែងក្នុងក្រុមកំប្លែងរបស់ឪពុកលោក ទើបតែពេលនេះឪពុករបស់លោកបានផ្តល់ឱកាស និងមានការជួយជំរុញពីក្រុមគ្រួសារផងនោះ ទើបលោកអាចឈានជើងចូលកំប្លែងជាលើកដំបូងនេះ ។
ការចាប់អាជីពកំប្លែងថ្មីនេះលោកទទួលស្គាល់ថានៅមានចន្លោះប្រហោងច្រើនព្រោះលោកកំពុងតែហាត់រៀននៅឡើយ ។ ទោះជាយ៉ាងណាក្តីលោកនឹងខំព្យាយាមប្រឹងប្រែងបន្ថែមទៀត ស្របពេលដែលលោកកំពុងទទួលបានការលើកទឹកចិត្ត និងជួយបង្ហាត់បង្រៀនពីឪពុករបស់លោក និងតារាកំប្លែងរួមក្រុមដូចជា នាយហុងដា នាងគ្រត នាងប្រិមប្រិយ និងនាយក្រិនជាដើម ។
នៅពេលសួរថាតើមានការពិបាកទេពេលត្រូវមកសម្តែងជាមួយឪពុក ហើយឈុតខ្លះត្រូវហៅឪពុកថា «អាកុយ» ពេញៗមាត់នោះ ? នាយកយឆ្លើយថា តាមពិតទៅត្រង់ចំណុចនេះលោកក៏មានការលំបាកដែរ ព្រោះលោកមិនធ្លាប់ គឺនៅតែអៀនមាត់នៅពេលលោកត្រូវហៅឪពុកថា «អា» ទៅតាមសាច់រឿងនោះ ។ ទោះជាយ៉ាងណាក្តីលោកនៅតែព្យាយាមសម្តែងឱ្យបានល្អព្រោះនេះជាសិល្បៈប៉ុណ្ណោះ មិនមែនជារឿងពិតឡើយ ។
នាយកយបញ្ជាក់ថា «ជាធម្មតាយើងជាអ្នកសិល្បៈគឺត្រូវធ្វើយ៉ាងណាដើម្បីឱ្យគេពេញចិត្ត និងសើចសប្បាយ បើយើងតាំងចិត្តថា នៅតែមិនហ៊ាននោះគឺយើងសម្តែងទៅមិនកើតទេ ហើយអ្នកទស្សនាក៏គេមិនចូលចិត្តយើងដែរ។ ម្យ៉ាងទៀតពេលដែលត្រូវឡើងសម្តែងម្តងៗនោះគឺឪពុកតែងតែជួយប្រាប់រហូតថា ពេលសម្តែងត្រូវនិយាយឱ្យម៉ាត់ៗ កុំស្ទាក់ស្ទើរ ទើបសម្តែងទៅសម ហេតុនេះខ្ញុំគិតថាត្រូវតែសម្តែងឱ្យបានទោះបីជាលើឆាកហៅឪពុក «អា» ក៏ដោយ ពេលឈប់សម្តែងគឺសុំទោសវិញទៅគឺបានហើយ។
ថ្វីបើពេលនេះការសម្តែងរបស់នាយកយត្រូវអ្នកទស្សនាវាយតម្លៃថានៅមិនទាន់ល្អក៏ដោយ តែតារាកំប្លែងដ៏ក្មេងខ្ចីរូបនេះនៅតែមានសុទិដ្ឋិ និយមថា នាយនឹងធ្វើឱ្យបានល្អ និងខិតខំធ្វើយ៉ាងណាឱ្យការសម្តែងរបស់នាយទទួលបានការគាំទ្រពីអ្នកទស្សនា ដើម្បីអាចស្នងតំណែងពីឪពុកនាពេលខាងមុខ ។ នាយកយបញ្ជាក់ថា ការសម្តែងនេះគឺមិនមែនជាការសាកល្បងឡើយ គឺអាចថាជាការសម្តែងដើម្បីចាប់យកជាអាជីពតែម្តង ព្រោះនេះជាការជំរុញ និងលើកទឹកចិត្តដោយផ្ទាល់ពីឪពុករបស់លោក ហើយបើការសម្តែងនេះអាចទទួលបានជោគជ័យនោះលោកនឹងចាប់អាជីពនេះរហូតតែម្តង ។
នេះជាលើកទីមួយហើយដែលតារាកំប្លែងនាយកុយ បណ្តុះកូនរបស់ខ្លួនឱ្យចូលរួមកំប្លែងជាមួយខ្លួន ។ នាយកយទំនងជាពន្លកថ្មី និងជាអ្នកស្នងមរតកកំប្លែងតែមួយគត់របស់នាយកុយ ៕
ចែករំលែកព័តមាននេះ