អ្នកវិទ្យាសាស្ត្រអាមេរិកជឿថា ផឹកស្រា១កែវក្នុង១ថ្ងៃជួយការពារស្ត្រីជៀសផុតពីជំងឺពុកឆ្អឹង ។ ក្រុមអ្នកស្រាវជ្រាវបានបញ្ជាក់ថា អាល់កុលមានដំណើរប្រព្រឹត្តប្រហាក់ប្រហែលគ្នាទៅនឹងអ័រម៉ូន Oestrogenដែលវាជួយបន្ថយនូវការផ្លាស់ប្តូរឆ្អឹង (ជាលិកាឆ្អឹងចាស់ត្រូវបានផ្លាស់ប្តូរចេញពីឆ្អឹង ហើយជាលិកាថ្មីត្រូវបានបង្កើតឡើង) ។
សាស្ត្រាចារ្យ Urszula Iwaaniecបាននិយាយថា ៖«ផឹកស្រាជាមធ្យមក្នុងនាមជាផ្នែកមួយមួយនៃបែបបទក្នុងការរស់នៅប្រកបដោយសុខភាពដែលរួមបញ្ចូលរបបអាហារត្រឹមត្រូវ និងការហាត់ប្រាណ គឺពិតជាអាចផ្តល់នូវអត្ថប្រយោជន៍ដល់សុខភាពឆ្អឹង ជាពិសេសសម្រាប់ស្ត្រីក្រោយពីការអស់រដូវ »។
សហអ្នកស្រាវជ្រាវសាស្ត្រាចារ្យ Russel Turnerបាននិយាយថា លទ្ធផលនៃការសិក្សានេះពិតជាសំខាន់ ដ្បិតវាបានបង្ហាញពីយន្តការកោសិកាសម្រាប់ដង់ស៊ីតេឆ្អឹងដែលកើនឡើងហើយដែលជារឿយៗត្រូវបានអង្កេតទៅលើបណ្តាស្ត្រីក្រោយពីការអស់រដូវនិងដែលពួកគេទាំងនោះជាអ្នកផឹកស្រាក្នុងកម្រិតមធ្យម ។ ការព្យាបាលដោយឱសថមួយចំនួនដើម្បីជួយទប់ស្កាត់ការបាត់បង់ដង់ស៊ីតេឆ្អឹងគឺពិតជាចាយអស់ប្រាក់ ហើយវាអាចមានផលរំខានផ្សេងៗដែលយើងមិនចង់ បាន ។
ដោយឡែក ការសិក្សាមុនៗក៏បានបង្ហាញផងដែរថា អ្នកផឹកស្រាជាមធ្យមមិនថាស្រីឬប្រុសទេគឺសុទ្ធតែមានដង់ស៊ីតេឆ្អឹងខ្ពស់ធៀបទៅនឹងអ្នកមិនផឹកសោះ ឬអ្នកផឹកដល់ងូត ប៉ុន្តែការរកឃើញនេះមិនត្រូវបានគេពន្យល់ពីភាពខុសគ្នាទេ ៕
ចែករំលែកព័តមាននេះ