រាជធានីភ្នំពេញ ៖ ក្រុមហ៊ុនLevi’s Strauss & Co ជាក្រុមហ៊ុនដ៏ធំនិងល្បីឈ្មោះបំផុតមួយនៅក្នុងពិភពលោក បានបើកយុទ្ធនាការដ៏ចម្លែកមួយដោយផ្តល់ឱកាសឱ្យអតិថិជនយកខោខូវប៊យចាស់ៗ ឬខោខូវប៊យលែងប្រើប្រាស់ទៅដូរក្នុងការទិញផលិតផលម៉ាកLevi’s គ្រប់ប្រភេទមកវិញ ដើម្បីទទួលបានការបញ្ចុះតម្លៃ២៥ដុល្លារសម្រាប់ការទិញចាប់ពីតម្លៃ៧០ដុល្លារឡើងទៅ ។ ពិធីសម្ពោធបើកយុទ្ធនាការនេះត្រូវបានគេធ្វើឡើងនៅក្នុងផ្សារទំនើបឡាក់គីក្បែរអាងទឹកអូឡាំពិក កាលពីថ្ងៃទី២៦ កក្កដា ក្រោមអធិបតីភាពលោកខៀវ កាញារីទ្ធ រដ្ឋមន្ត្រីក្រសួងព័ត៌មាន ។
មានមតិសំណេះសំណាលនៅក្នុងឱកាសនោះ លោកខៀវ កាញារីទ្ធ បានកោតសរសើរគំនិតច្នៃប្រឌិតរបស់ក្រុមហ៊ុនដែលបើកយុទ្ធនាការដ៏ល្អ ប្រពៃនេះ ដើម្បីនាំយកខោខូវប៊យចាស់ៗ ឬខោខូវប៊យដែលអតិថិជនឈប់ប្រើប្រាស់ទាំងនោះទៅផ្តល់ជូនដល់អង្គការមិត្តសម្លាញ់ ដើម្បីជាប្រយោជន៍ដល់កុមារកំព្រា ឬអ្នកក្រីក្រ ពីព្រោះខោខូវប៊យម៉ាកLevi’sនេះជាប្រភេទខោខូវប៊យដែលល្បីល្បាញ និងពេញនិយមប្រើប្រាស់។
Levi’s Strauss & Co ជាក្រុមហ៊ុនសម្លៀកបំពាក់ដ៏ធំ និងល្បីល្បាញបំផុតនៅលើពិភពលោក ហើយក៏ជាក្រុមហ៊ុននាំមុខគេខាងសម្លៀកបំពាក់ខោខូវប៊យ ។ ក្រុមហ៊ុនបានរចនាសម្លៀកបំពាក់ជាប្រភេទខោខូវប៊យប្រកបដោយភាពស្រស់សង្ហា និងជាជម្រើសសម្រាប់មនុស្សគ្រប់វ័យ ទាំងបុរស ស្ត្រី និងកុមារ ។ Levi’sត្រូវបានរៀបចំចរាចរនៅលើទីផ្សារជាង១១០ប្រទេស ទូទាំងពិភពលោកតាមរយៈការលក់ដុំ និងលក់រាយនៅតាមបណ្តាផ្សារទំនើប តាមបណ្តាញគេហទំព័រ ដេប៉ូលក់ផ្តាច់មុខ និងហាងលក់សម្លៀកបំពាក់ផ្ទាល់របស់ Levi’s ។
DKSH (Cambodia ) Ltd . នៅប្រទេសកម្ពុជា បានបើកដំណើរការជាលើកដំបូងក្នុងការលក់និងចែកចាយសម្លៀកបំពាក់ផលិតផលម៉ាក Levi’sនៅផ្សារទំនើប Lucky Department Storeនៅក្នុងខែតុលា ឆ្នាំ២០១០ ។នៅខែកុម្ភៈ ឆ្នាំ២០១២ DKSH (Cambodia) Ltd. បានទទួលនូវកម្មសិទ្ធិបញ្ញានិងសិទ្ធិផ្តាច់មុខតែមួយគត់ពីក្រសួងពាណិជ្ជកម្មនៃព្រះរាជាណាចក្រកម្ពុជា ក្នុងការចែកចាយផលិតផលLevi’sនៅលើទីផ្សារ រួមមានទាំងសម្លៀកបំពាក់ និងស្បែកជើង ។
បច្ចុប្បន្ននេះ Levi’s ដែលជាម៉ាកយីហោដ៏ល្បី និងមានលក្ខណៈជាប្រវត្តិសាស្ត្រតែមួយគត់ នៃសម្លៀកបំពាក់និងខោខូវប៊យ បានបង្កើតនូវរបត់ថ្មីជូនដល់អតិថិជន ដោយនាំមកជាមួយនូវយុទ្ធនាការប្តូរខោខូវប៊យចាស់ៗដែលឈប់ប្រើ ឬលែងត្រូវការជាមួយនឹងសម្លៀកបំពាក់ជាផលិតផលរបស់ម៉ាកដ៏ល្បី Levi’s ។ នេះជាលើកទីមួយហើយដែលLevi’s បាននាំមកនូវ យុទ្ធនាការមួយនេះ មកក្នុងព្រះរាជាណាចក្រកម្ពុជា ។
យុទ្ធនាការ«Levi’s Swap Jean »ដែលគួរឱ្យភ្ញាក់ផ្អើលនេះ នឹងផ្តល់ជូនចំពោះអតិថិជនដែលបានយកខោខូវប៊យចាស់ៗ របស់ខ្លួនមកប្តូរទោះជាម៉ាកណាមួយក៏បាន ។ ចំពោះការប្តូរនេះ ពួកគាត់នឹងទទួលបាននូវការបញ្ចុះតម្លៃ២៥ដុល្លារ ភ្លាមៗដោយគ្រាន់តែជាវផលិតផលម៉ាកLevi’sគ្រប់ប្រភេទចាប់ពី៧០ដុល្លារឡើងទៅ ។DKSH (Cambodia) Ltd. ក៏ដូចជាLevi’s ដែរ ជានិច្ចកាលតែងតែចូលរួមយ៉ាងសស្រាក់សស្រាំ និងអនុវត្តតាមទស្សនវិជ្ជានៃការ«ការផ្តល់ជូនទៅក្នុងសហគមន៍» ហេតុដូច្នេះហើយទើប DKSH (Cambodia) Ltd. នឹងធ្វើការបរិច្ចាគនូវខោខូវប៊យដែលអតិថិជនបានយកមកប្តូរ រួមជាមួយនឹងផលិតផលថែទាំសុខភាព និងផលិតផលប្រើប្រាស់ប្រចាំថ្ងៃ(Consumer Product)ដទៃទៀត ជូនដល់អង្គការមិត្តសម្លាញ់ដែលចាត់ទុកថាជាអំណោយសប្បុរសធម៌ចំពោះអ្នកែដលមានការខ្វះខាត។
អតិថិជន នឹងទទួលបានអត្ថប្រយោជន៍ពីយុទ្ធនាការប្តូរខោខូវប៊យនេះ គឺមិនត្រឹមតែទទួលបាននូវផលិតផល Levi’s ដែលជាម៉ាកដ៏ល្បីប៉ុណ្ណោះទេ ថែមទាំងបានចូលរួមនៅក្នុងសកម្មភាពសប្បុរសធម៌ក្នុងសង្គមផងដែរ ។ សូមចូលរួមបរិច្ចាគ ដោយយកខោខូវប៊យចាស់ៗរបស់លោកអ្នក មកប្តូរជាមួយនឹងផលិតផលLevi’s Licensed Store ដែលមានទីតាំងនៅក្នុងផ្សារទំនើបឡាក់គីក្បែរអាងទឹកអូឡំាពិក ៕
ចែករំលែកព័តមាននេះ