ខេត្តសៀមរាប ៖ យោងតាមសេចក្តីសម្រេចរបស់អគ្គបញ្ជាការនៃកងយោធពលខេមរភូមិន្ទ មន្ត្រីកងរាជអាវុធហត្ថខេត្តសៀមរាប ចំនួន២៤៧រូប ត្រូវបានបំពាក់ឋានន្តរស័ក្តិ ក្នុងនោះមានថ្នាក់អនុសេនីយ៍ឯកចំនួន៤៧រូប អនុសេនីយ៍ទោចំនួន៦១រូប អនុសេនីយ៍ត្រីចំនួន១៩រូប នាយចំណង់ចំនួន៣១រូប ព្រិន្ទបាលឯកចំនួន៦៣រូប និងព្រិន្ទបាលទោចំនួន២៦រូប ។
ពិធីបំពាក់ឋានន្តរស័ក្តិបានប្រារព្ធធ្វើនៅសាលប្រជុំបញ្ជាការដ្ឋានកងរាជអាវុធហត្ថខេត្ត កាលពីរសៀលថ្ងៃទី២៦ កក្កដា ក្រោមអធិបតីភាពលោកស៊ូ ភិរិន្ទ អភិបាលខេត្ត ដោយមានការចូលរួមពីលោកឧត្តមសេនីយ៍ទោ ប្រាក់ សិទ្ធ មេបញ្ជាការរង និងជាស្នងការនៃស្នងការដ្ឋានប្រភពកម្លាំងកងរាជអាវុធហត្ថលើផ្ទៃប្រទេស សមាជិកក្រុមប្រឹក្សាអ្នកច្បាប់ទីស្តីការគណៈរដ្ឋមន្ត្រី និងជាតំណាងលោកនាយឧត្តមសេនីយ៍សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស អស់លោក លោកស្រី ជាថ្នាក់ដឹកនាំតំណាងឱ្យស្ថាប័ន មន្ទីរ អង្គភាពពាក់ព័ន្ធនានា ក្នុងខេត្តជាច្រើនរូបទៀត ។
យោងតាមរបាយការណ៍របស់លោកឧត្តមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថខេត្តស្តីពីសភាពការណ៍សន្តិសុខសណ្តាប់ធ្នាប់សង្គមបានឱ្យដឹងថា នៅក្នុងរយៈពេលមួយឆមាសទី១ ឆ្នាំ២០១២កន្លងមកនេះ បទល្មើសកើតមានឡើងសរុបចំនួន១០ករណី ស្មើនឹង២៦លើក/១៧លើក កើនឡើង៩លើក បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១១ ។ ក្នុងនោះបទល្មើសឧក្រិដ្ឋកើតមានចំនួន៦ករណី ស្មើនឹង១៨លើក/៨លើក កើនឡើង១០លើក បទល្មើសមជ្ឈិមកើតមានចំនួន៤ករណីស្មើនឹង៨លើក/៩លើក ថយចុះ១លើក ។ គ្រោះថ្នាក់ចរាចរណ៍កើតមានចំនួន៣៣លើក/៤៥លើក ថយចុះ១២លើក បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១១ បណ្តាលឱ្យស្លាប់៣៥នាក់ របួសធ្ងន់-ស្រាល៥៧នាក់ ខូចខាតរថយន្ត១១គ្រឿង គោយន្ត២គ្រឿង ម៉ូតូ២៧គ្រឿង រ៉ឺម៉កម៉ូតូ១គ្រឿង និងកង់១គ្រឿង ។
លោកឧត្តមសេនីយ៍មេបញ្ជាការកងរាជអាវុធហត្ថខេត្តថ្លែងទៀតថា ដើម្បីធានាដល់ការសម្រេចបានទិសដៅភារកិច្ចការងារក្នុងឆមាសទី២ឆ្នាំ២០១២ ដែលលោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសបានដាក់ចេញនៅក្នុងកិច្ចប្រជុំបូកសរុបការងារឆមាសទី១ ឆ្នាំ២០១២កន្លងមកនេះ នាយ-នាយរង និងពលអាវុធហត្ថទូទាំងខេត្ត ប្តេជ្ញាលុបបំបាត់ចោលរាល់បាតុភាពអសកម្មនានាដែលធ្វើឱ្យប៉ះពាល់ដល់កិត្តិយសសេចក្តីថ្លៃថ្នូររបស់កងរាជអាវុធហត្ថពង្រឹងពង្រីកគុណភាពការងារឱ្យកាន់តែទទួលបានលទ្ធផលល្អ ៕
ចែករំលែកព័តមាននេះ